BERLIN News ລາຍງານວ່າ: ເຫດການອຸທົກກະໄພຄັ້ງໃຫຍ່ໃນຮອບສະຕະວັດໄດ້ໄຫຼພັດເຂົ້າຖ້ວມຫຼາຍໝູ່ບ້ານເຂດພື້ນທີ່ເອີຣົບຕາເວັນຕົກ ໃນວັນທີ 15 ກໍລະກົດ ເຮັດໃຫ້ມີລາຍງານຜູ້ເສຍຊີວິດແລ້ວ 67 ຄົນ ອີກ 1,300 ກວ່າຄົນສູນຫາຍໂດຍທີ່ຍັງບໍ່ຮູ້ຊາຕາກຳ.
ເນື່ອງຈາກມີຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ເກີດນໍ້າຖ້ວມກະທັນຫັນໃນເຂດພື້ນທີ່ເອີຣົບຕາເວັນຕົກ ເຊິ່ງໄດ້ຂ້າຊີວິດປະຊາຊົນຊາວເຢຍລະມັນຜູ້ບໍລິສຸດຢ່າງໜ້ອຍ 58 ລາຍ, ແລະແບນຊິກອີກ 9 ລາຍ ຂະນະທີ່ຍັງມີຜູ້ສູນຫາຍອີກຫຼາຍຮ້ອຍຄົນໂດຍທີ່ຍັງບໍ່ຮູ້ຊາຕາກຳ ເນື່ອງຈາກການຕິດຕໍ່ເກີດອຳມະພາດ, ຖະໜົນຫົນທາງຖືກຕັດຂາດພ້ອມກາຍເປັນທະເລຂະໜາດໃຫຍ່, ບ້ານເຮືອນຖືກພັດຖະຫຼົ່ມ. ເຫດການນີ້ຍັງສົ່ງຜົນກະທົບເຖິງປະເທດອ້ອມຂ້າງນຳອີກ ເຊັ່ນ ໂຮນລັງ, ລຸກຊຳບວກ ແລະ ສະວິດເຊີແລນ ເຊິ່ງທາງການໄດ້ອອກແຈ້ງເຕືອນເຝົ້າລະວັງໃນຫຼາຍພູມີພາກຂອງຝຣັ່ງເສດ.
ປັດຈຸບັນເຈົ້າໜ້າທີ່ກູໄພຫຼາຍກວ່າພັນຄົນກຳລັງເຮັດວຽກຢ່າງໜັກໃນການພະຍາຍາມເຂົ້າຊ່ວຍເຫຼືອຜູ້ທີ່ໄດ້ຮັບຜົນກະທົບ ໂດຍມີການອົບພະຍົບປະຊາຊົນໄປສູ່ເຂດປອດໄພ ເນື່ອງຈາກຝົນຍັງຕົກໜັກຂຶ້ນ ອາດເຮັດໃຫ້ປະລິມານນໍ້າສູງຂຶ້ນ ແລະ ອາດກະທົບຕໍ່ເຂື່ອນບາງແຫ່ງນໍາອີກ.