ລະດູໜາວ ໃກ້ຈະມາຮອດແລ້ວ ຫລາຍໆຄົົນທີ່ມັກລະດູການນີ້ ເພາະວ່າອາກາດບໍ່ຮ້ອນ ແລະ ເຢັນສະບາຍ ແຕ່ບາງຄົົນທີ່ມັກໜາວກໍບໍ່ມັກອາກາດເຢັນໆເຊັ່ນກັນ ມື້ນີ້ມີວິທີກຽມໂຕກ່ອນເຂົ້າລະດູໜາວງ່າຍໆມາຝາກກັນ ໂດຍການໃຊ້ສະໝຸນໄພຂອງບ້ານເຮົານີ້ເອງ ສາມາດຊ່ວຍແກ້ໜາວ ແລະ ຊ່ວຍປັບສົມດຸນຂອງທາດຕ່າງໆໃນຮ່າງກາຍຂອງເຮົາໄດ້ນໍາອີກ
ຕາມຫລັກທິດສະດີຂອງໝໍພື້ນເມືອງກ່າວໄວ້ວ່າ ຮ່າງກາຍຂອງຄົນເຮົາມີທາດເປັນອົງປະກອບນຳກັນທັງໝົດ 8 ທາດ ໄດ້ແກ່ ດິນ ນ້ຳ ລົມ ໄຟ ແລະ ອາການເຈັບປ່ວຍຂອງຄົນເຮົາ ມັກຈະຂຶ້ນຢູ່ກັບການເສຍສົມດຸນຂອງທາດນັ້ນໆ ສ່ວນໃຫຍ່ການເຈັບປ່ວຍໃນ ລະດູໜາວ ມັກຈະກ່ຽວກັບທາດນ້ຳໃນຮ່າງກາຍທີ່ເກີດການເສຍສົມດຸນຮ່າງກາຍຈະເກີດອາການທີ່ພົບເລື້ອຍໆ ຄື ອາການເຈັບຄໍ ແສບຄໍ ມີຂີ້ກະເທີ ອາການດັ່ງກ່າວເກີດຈາກກຸ່ມອາການຂອງພະຍາດລະບົບທາງເດີນຫາຍໃຈ ຄົນບ້ານເຮົາຈຶ່ງມີວິທີການເບິ່ງແຍງສຸຂະພາບໃນລະດູໜາວດ້ວຍການປັບໃຊ້ໂດຍການນຳເອົາສະໝຸນໄພເພື່ອປ້ອງການການແກ້ໜາວເພາະເປັນສະໝຸນໄພທີ່ຫາຊື້ໄດ້ງ່າຍຕາມຕະຫລາດ ຫລື ບາງເຮືອນກໍມີປູກໄວ້ໃນເຮືອນຂອງຕົນເອງ ການປັບສົມດຸນຂອງທາດນ້ຳ ມີດັ່ງຕໍ່ໄປນີ້
- ໝາກເພັດ ມີສານແຄບໄຊຊິນ (capsaicin) ຈະເຮັດໃຫ້ຊ່ວຍໃນການໄຫລວຽນຂອງເລືອດໃນຮ່າງກາຍຂອງເຮົາ ແລະ ຊ່ວຍໃນການທີ່ຈະເຮັດໃຫ້ເກີດຄວາມເຢັນບໍລິເວນປາຍນິ້ວມື ແລະ ນິ້ວຕີນຫລຸດລົງ
- ກະທຽມ ຈະຊ່ວຍເພີ່ມການໄຫລວຽນຂອງເລືອດ ໂດຍສະເພາະບໍລິເວນຜິວໜັງ ສາມາດນຳມາປຸງເປັນອາຫານ ຫລື ກິນສົດໆ ໄດ້ທັນທີ
- ຂີງ ເຊິ່ງມີສານ ຈິງເກີຣອນ (gingerol) ເຊິ່ງຈະຊ່ວຍຫລຸດໂຄເລດເຕີລໍຊະນິດທີ່ບໍ່ດີໃນຮ່າງກາຍ ແລະ ຊ່ວຍເຮັດໃຫ້ຫລອດເລືອດບໍ່ແຂງໂຕ
- ຂ່າ ຈະມີປະໂຫຍດໃນການບຳລຸງທາດໄຟ ແລະ ຊ່ວຍຍ່ອຍອາຫານແຖມຍັງຊ່ວຍແກ້ອາການປຸ້ນທ້ອງຮາກ ຊ່ວຍຫລຸດຂີ້ກະເທີ ບຳລຸງຮ່າງກາຍ ແລະ ຍັງຊ່ວຍເພີ່ມການໄຫລວຽນຂອງເລືອດ ເປັນສະໝຸນໄພຕ້ານມະເຮັງນໍາອີກ
- ຫວານຫົດເປັນພືດທີ່ມີລົດຮ້ອນ ເຊິ່ງມີວິຕາມິນເອ ບີ12 ແລະ ຍັງມີແຄຊຽມ ຊ່ວຍລະບົບການຍ່ອຍອາຫານ ແລະ ຈຸກ ສຽດໃນກະເພາະອາຫານນໍາອີກ
- ກະເພົາ ໃບສົດມີນ້ຳມັນຫອມລະເຫຍ ເຊິ່ງປະກອບດ້ວຍ linalool methyl chavicol ສັບພະຄຸນ ເປັນຢາຂັບລົມ ຊ່ວຍຫລຸດອາການຈຸກສຽດ ຍິ່ງຖ້ານຳໃບສົດມາຄັ້ນໃຫ້ເປັນນ້ຳຊ່ວຍໃນການຂັບຂີ້ກະເທີ ຂັບເຫື່ອ ແຕ່ຖ້າຫາກມີແຜ ຫລື ເປັນພະຍາດຜິວໜັງ ນຳນ້ຳກະເພົາທີ່ຄັ້ນແລ້ວມາທາບໍລິເວນຜິວໜັງ ເຊິ່ງຈະຊ່ວຍຂ້າເຊື້ອຈຸລິນຊີໄດ້ໃນບາງຊະນິດ ນອກຈາກນີ້ຍັງສາມາດປ້ອງກັນຍຸງໄດ້ດົນ 2 ຊົ່ວໂມງ
- ບົວລະພາ ເລືອກໃຊ້ແຕ່ໃບຄັ້ນເອົານ້ຳປະມານ 1 ຖ້ວຍ ມາປະສົມກັບນ້ຳເຜິ້ງ ກິນແກ້ໄອ ຈະຊ່ວຍຫລຸດອາການຫລອດລົມອັກເສບ ແລະ ຍັງສາມາດຊ່ວຍໃນການຂັບເຫື່ອໄດ້ດີນໍາອີກ
- ກະເດົາ ມີຄຸນຄ່າທາງອາຫານໄດ້ແກ່ ໂປຕີນ ຄາໂບໄຮເດດ ແຄຊຽມ ຟອດຟໍລັດ ເຫລັກ ເສັ້ນໃຍ ເບຕ້າແຄໂລທີນ ວິຕາມິນເອ ວິຕາມິບີ1 ແລະ 2 ວິຕາມິນຊີ ແລະ ໄນອາຊີນ ປະໂຫຍດຂອງກະເດົາ ມີສັບພະຄຸນບຳລຸງທາດໄຟ ສ້າງພູມຕ້ານທານໃຫ້ຮ່າງກາຍ ແລະ ແກ້ໄຂ ຊ່ວຍໃຫ້ຂັບຖ່າຍລະອຽດ ຂັບຖ່າຍຄ່ອງ ແລະ ຊ່ວຍໃຫ້ນອນຫລັບສະບາຍ ສ່ວນໃຫຍ່ຈະນິຍົມນຳດອກ ແລະ ໃບນຳມາກິນ
ນອກຈາກເລື່ອງການປັບສົມດຸນຂອງທາດໃນຮ່າງກາຍແລ້ວ ໃນ ລະດູໜາວ ຍັງມີບັນຫາເລື່ອງຜິວໜັງແຫ້ງ ຖືເປັນບັນຫາທີ່ສ້າງຄວາມລຳຄານແກ່ທຸກຄົນໄດ້ຫາກບໍ່ດູແລຮັກສາເພາະເມື່ອຜິວໜັງແຫ້ງຈະເຮັດໃຫ້ຮູ້ສຶກຄັນ ລຳຄານ ບາງຄົນຈະຮູ້ສຶກແສບຮ້ອນມັກເກົາບໍລິເວນຜິວໜັງທີ່ຄັນຈົນເກີດແຜອັກເສບເລືອດອອກ ແລະ ມີເຊື້ອພະຍາດເຂົ້າສູ່ຮ່າງກາຍເກີດອາການອັກເສບ ເຊິ່ງຫາກມີຜິວແຫ້ງ ມີຂໍ້ແນະນຳໃຫ້ນຳນ້ຳມັນໝາກກອກບໍລິສຸດທາງຈະຊ່ວຍໃຫ້ຜິວເກີດຄວາມຊຸ່ມຊື່ນໄດ້ດົນ ຫາກໃຊ້ນ້ຳມັນໝາກພ້າວ ຫລື ນ້ຳມັນງາ ຈະຊ່ວຍຫລຸດອາການອັກເສບຂອງຜິວໜັງ ປ້ອງກັນມະເຮັງຜິວໜັງທີ່ເກີດຈາກແສງແດດໄດ້
ປະໂຫຍດທັງຫລາຍຂອງພືດ ແລະ ສະໝຸນໄພທີ່ກ່າວມາທັງໝົດນີ້ ບໍ່ໄດ້ມີປະໂຫຍດສະເພາະ ລະດູໜາວ ພຽງເທົ່ານັ້ນ ທຸກຄົນສາມາດນຳມາປຸງອາຫານໄດ້ທຸກໆລະດູ ແລະ ອີກຢ່າງທີ່ທຸກຄົນຄວນສົນໃຈ ແລະ ໃສ່ໃຈທີ່ຈະເຮັດຮ່ວມໄປດ້ວຍຄືການໄດ້ອອກກຳລັງກາຍເປັນປະຈຳຢ່າງສະມໍ່າສະເໝີ ເພື່ອສຸຂະພາບຈະໄດ້ແຂງແຮງນໍາອີກ