ໂຮງງານກັ່ນນໍ້າມັນແຫ່ງທຳອິດຂອງລາວ ຈະທົດລອງຜະລິດນ້ຳມັນເຊື້ອໄຟ ໃນວັນທີ 30 ພະຈິກ 2020 ທີ່ຈະມາເຖິງນີ້, ພາຍຫຼັງໄດ້ເລີ່ມກໍ່ສ້າງໃນປີ 2015, ຊຶ່ງໂຮງງານກັ່ນນໍ້າມັນແຫ່ງນີ້ ຈະຊ່ວຍຫຼຸດຜ່ອນການນຳເຂົ້ານ້ຳມັນເຊື້ອໄຟ ຈາກຕ່າງປະເທດ ພ້ອມທັງຫຼຸດຜ່ອນລາຄານ້ຳມັນໃນຕະຫຼາດພາຍໃນນຳອີກ, ໂດຍຈະຜະລິດ ນ້ຳມັນແອັດຊັງ, ກາຊວນ ແລະ ອາຍແກັດ ໃຫ້ໄດ້ 1 ລ້ານໂຕນຕໍ່ປີ.
ໜັງສືພິມວຽງຈັນທາມ ລາຍງານວ່າ ຮອງຜູ້ອຳນວຍການ ບໍລິສັດເປໂຕຣເຄມີລາວ ຈຳກັດ, ທ່ານ ປານີ ພວງເພັດ ໄດ້ໃຫ້ສຳພາດຕໍ່ສື່ມວນຊົນ ຫວ່າງບໍ່ດົນມານີ້ ວ່າ: ໂຮງງານກັ່ນນໍ້າມັນ ຂອງບໍລິສັດເປໂຕຣເຄມີລາວ ຈຳກັດ ຕັ້ງຢູ່ເຂດພັດທະ ນາກວມລວມໄຊເສດຖາ ນະຄອນຫຼວງວຽງຈັນ, ໃນເນື້ອທີ່ທັງໝົດ 280.000 ຕາແມັດ, ໂດຍໃຊ້ເງິນລົງທຶນ 179 ລ້ານໂດລາສະຫະລັດ ພາຍໃຕ້ບໍລິສັດເປໂຕຣເຄມີ ລາວ-ຈີນ ແຂວງຢຸນນານ ກັບ ກຸ່ມບໍລິສັດ ກໍ່ສ້າງ ແລະ ລົງທຶນແຂວງຢຸນນານ ຮຸ້ນສ່ວນຈຳກັດ ຖືຮຸ້ນ 75%, ລັດວິສາຫະກິດນໍ້າມັນເຊື້ອໄຟລາວ ຖືຫຸ້ນ 20% ແລະ ບໍລິສັດຮ່ວມທຶນລາວ-ຈີນຈຳກັດ ຖືຫຸ້ນ 5%,ຊື່ງ ວັດຖຸດິບ ສ່ວນຫຼາຍແມ່ນນຳເຂົ້າມາຈາກປະເທດສິງກະໂປ.
ໃນຫຼາຍປີຜ່ານມາ, ສປປ ລາວ ໄດ້ນຳເຂົ້ານ້ຳມັນເຊື້ອໄຟຫລາຍລ້ານໂຕນຕໍ່ປີ ໃນລາຄາທີ່ສູງຫຼາຍ, ສະນັ້ນ ໂຄງການໂຮງງານກັ່ນນໍ້າມັນເປໂຕຣເຄມີ ຈະຊ່ວຍໃນການຫຼຸດຜ່ອນການນຳເຂົ້ານ້ຳມັນ ແລະ ຫຼຸດຜ່ອນທາງດ້ານລາຄາ. ພ້ອມນີ້, ກໍຍັງສາມາດສ້າງວຽກເຮັດງານທຳໄດ້ຫຼາຍຕຳແໜ່ງ ງານ, ຊຶ່ງປັດຈຸບັນ ມີພະນັກງານເຖິງ 400 ຄົນ, ໃນນັ້ນ, ຄົນລາວປະມານ 100 ຄົນ.
ຮຽບຮຽງຂ່າວ: ພຸດສະດີ