ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ອອກຄຳແນະນຳ ໃນວັນທີ 7 ຕຸລາ 2020 ກ່ຽວກັບການຕິດຕາມກວດກາຮ້ານບັນເທີງ, ຄາຣາໂອເກະ ແລະ ການອະນຸມັດຈັດງານບຸນປະເພນີ, ງານດອງ ແລະ ການທ່ອງທ່ຽວເປັນກຸ່ມ ໃຫ້ພະແນກ ຖວທ ນະຄອນຫຼວງ, ແຂວງ, ຫ້ອງການ ຖວທ ເມືອງ ແລະ ພາກສ່ວນກ່ຽວຂ້ອງທົ່ວປະເທດ ຊາບວ່າ:
- ໃຫ້ພະແນກ ຖວທ ນະຄອນຫຼວງ, ແຂວງ, ຫ້ອງການ ຖວທ ເມືອງ ເປັນເຈົ້າການປະສານສົມ ທົບກັບກຳລັງປ້ອງກັນຄວາມສະຫງົບ ແລະ ຄະນະສະເພາະກິດນະຄອນຫຼວງ, ແຂວງ, ເມືອງ ຕິດຕາມກວດກາຮ້ານບັນເທີງ, ຄາຣາໂອເກະ ໃຫ້ສືບຕໍ່ປິດ, ກໍລະນີກວດພົບຜູ້ລະເມີດ ໃຫ້ປະຕິບັດວິໄນຕາມລະບຽບການ;
- ການຈັດງານບຸນປະເພນີ ແລະ ເທສະການຕ່າງໆ ໃຫ້ປະຕິບັດຕາມມາດຕະການປ້ອງກັນການ ຕິດເຊື້ອ ແລະ ການແຜ່ເຊື້ອໃນຊຸມຊົນ ທີ່ຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ ເປັນຕົ້ນ ປະຕິບັດຫຼັກການສຸຂານາໄມ, ແທກອຸນຫະພູມ, ໃສ່ຜ້າອັດປາກ-ດັງ, ໃສ່ເຈວລ້າງມື ແລະ ຫຼີກລ້ຽງຄວາມແອອັດ;
- ການຈັດງານດອງ ໃຫ້ຖືເອົາການສູ່ຂວັນຕາມປະເພນີ ແລະ ຈົດທະບຽນສົມລົດເປັນຫຼັກ, ສະເພາະງານລ້ຽງໃຫ້ຈັດແບບກະທັດຮັດ, ປະຢັດ ແລະ ໃຫ້ປະຕິບັດຕາມມາດຕະການປ້ອງກັນການຕິດເຊື້ອ ແລະ ແຜ່ເຊື້ອໃນຊຸມຊົນ ທີ່ຄະນະສະເພາະກິດວາງອອກຢ່າງຖືກຕ້ອງ ແລະ ເຂັ້ມງວດ ເປັນຕົ້ນ ປະ ຕິບັດຫຼັກການສຸຂານາໄມ, ແທກອຸນຫະພູມ, ໃສ່ຜ້າອັດປາກ-ດັງ, ໃສ່ເຈວລ້າງມື ແລະ ຫຼີກລ້ຽງຄວາມແອອັດ.
- ສ່ວນການທ່ອງທ່ຽວເປັນກຸ່ມ ສຳລັບນັກທ່ອງທ່ຽວທີ່ມາຈາກ ປະເທດທີ່ບໍ່ມີການລະບາດຂອງພະ ຍາດໂຄວິດ-19 ໃນຊຸມຊົນໃຫ້ປະຕິບັດຄື: ສະມາຄົມທ່ອງທ່ຽວ, ບໍລິສັດທ່ອງທ່ຽວເປັນຜູ້ຂົນຂວາຍ, ເຕົ້າ ໂຮມນັກທ່ອງທ່ຽວ ແລະ ດຳເນີນຕາມຂັ້ນຕອນການຂໍອະນຸຍາດ ຈາກຄະນະສະເພາະກິດເພື່ອປ້ອງ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19.
- ໃຫ້ພາກສ່ວນກ່ຽວຂ້ອງ ຜັນຂະຫຍາຍ ແລະ ຈັດຕັ້ງປະຕິບັດຕາມຄຳແນະນະສະບັບນີ້ ຢ່າງເຂັ້ມງວດ.
ຮຽບຮຽງຂ່າວ: ພຸດສະດີ