![Laopost_savan](http://www.laopost.com/wp-content/uploads/2014/10/Laopost_savan.jpg)
ພິທີປາຖະກະຖາໂອກາດວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກຂອງ ສປປ ລາວ 17.10.1987 ແລະ 17-24.10.2003 ຂອງແຂວງສະຫວັນນະເຂດ ໄດ້ຈັດຂຶ້ນໃນຕອນເຊົ້າວັນທີ 17 ຕຸລາ 2014 ຜ່ານມານີ້, ທີ່ສະໂມສອນຫ້ອງວ່າການປົກຄອງແຂວງ, ມີບັນດາສະຫາຍເລຂາ-ຮອງເລຂາຄະນະພັກຮາກຖານ, ໜ່ວຍພັກ, ຄະນະພັກ-ຄະນະບັນຊາ ປກຊ-ປກສ, ພະແນກການກົມກອງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ສະຖາບັນການສຶກສາພາກລັດ ແລະ ເອກະຊົນ, ພະນັກງານ-ສະມາຊິກພັກ ຕະຫຼອດເຖິງບໍລິສັດຫ້າງຮ້ານຕ່າງໆພາຍໃນແຂວງເຂົ້າຮ່ວມຢ່າງຫຼວງຫຼາຍ.
ໂອກາດນີ້, ທ່ານ ວັນນະລາດ ຫົງສາທິລາດ ຮອງຫົວໜ້າຄະນະໂຄສະນາອົບຮົມແຂວງ ກໍໄດ້ນຳເອົາເອກະສານວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກຂອງ ສປປ ລາວ ຂຶ້ນຈັດຕັ້ງເຜີຍແຜ່ ໂດຍໄດ້ຍົກໃຫ້ຮູ້ກ່ຽວກັບຈຸດປະສົງ, ປະຫວັດຄວາມເປັນມາຂອງວັນດັ່ງກ່າວ, ຜົນສຳເລັດໃນການພັດທະນາຊົນ ນະບົດ ແລະ ແກ້ໄຂຄວາມທຸກຍາກຂອງລາວ ແລະ ແຂວງສະຫວັນນະເຂດ ຊຶ່ງມີບາງຕອນວ່າ: ໃນປີ 1992 ກອງປະຊຸມສະມັດຊາໃຫຍ່ອົງການສະຫະປະຊາຊາດ ໄດ້ປະກາດເອົາວັນທີ 17 ຕຸລາ ຂອງທຸກໆປີ ເປັນວັນສາກົນເພື່ອລຶບລ້າງຄວາມທຸກຍາກ. ໃນສະຖານະທີ່ ສປປ ລາວ ເປັນປະເທດສະມາຊິກຂອງອົງການສະຫະປະຊາຊາດ ຍາມໃດກໍຖືວ່າວຽກງານການແກ້ໄຂຄວາມທຸກຍາກຂອງປະຊາຊົນເປັນວຽກຍຸດທະສາດສຳຄັນ ແລະ ເປັນໜ້າທີ່ບູລິມະສິດຂອງທົ່ວພັກ-ລັດ, ທົ່ວປວງຊົນ ແລະ ໄດ້ມີຄວາມພະຍາມເອົາໃຈໃສ່ຊີ້ນຳການຈັດຕັ້ງປະຕິບັດວຽກງານດັ່ງກ່າວຢ່າງຕັ້ງໜ້າຕະຫຼອດມາ. ໃນກອງປະຊຸມວຽກງານລຶບລ້າງຄວາມທຸກຍາກທົ່ວປະເທດຄັ້ງທີ I ໃນວັນທີ 17-19 ມີນາ 2003 ໄດ້ກຳນົດ ແລະ ປະກາດເອົາວັນທີ 17-24 ຕຸລາ ຂອງທຸກໆປີ ເປັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກ. ຕະຫຼອດໄລຍະທີ່ຜ່ານມາການຈັດຕັ້ງປະຕິບັດວຽກງານການລຶບລ້າງຄວາມທຸກຍາກຂອງ ສປປ ລາວ ສືບຕໍ່ໄດ້ຮັບຜົນສຳເລັດຢ່າງດີເປັນກ້າວໆ ເຊິ່ງມາໃນປີ 2014 ທົ່ວປະເທດເຮົາ ມີຄອບຄົວທຸກຍາກ 92.328 ຄອບຄົວ, ກວມເອົາ 8,11% ຂອງຄອບຄົວທັງໝົດ, ທຽບໃສ່ປີ 2013 ເຫັນວ່າຈຳນວນຄອບຄົວທຸກຍາກໄດ້ຫຼຸດລົງ 24 ພັນກວ່າຄອບຄົວ, ເທົ່າກັບ 2,15% ພ້ອມກັນນັ້ນ, ຈຳນວນບ້ານພັດທະນາ ກໍໄດ້ເພີ່ມຂຶ້ນເປັນ 3.095 ບ້ານ. ປະຈຸບັນຂະບວນການຜະລິດເປັນສິນຄ້າ ແລະ ແກ້ໄຂຄວາມທຸກຍາກຂອງປະຊາຊົນ ພວມສືບຕໍ່ມີການຫັນປ່ຽນທີ່ຕັ້ງໜ້າ, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນໄດ້ປະມານ 13,5 ລ້ານກີບ, ຊີວິດການເປັນຢູ່ຂອງປະຊາຊົນ ແລະ ພະນັກງານ, ທະຫານ, ຕຳຫຼວດໄດ້ມີຄວາມພະຍາຍາມສືບຕໍ່ປັບປຸງໃຫ້ຄ່ອຍໆດີຂຶ້ນ. ສຳລັບຢູ່ແຂວງສະຫວັນນະເຂດ ໃນສົກປີ 2013-2014 ນີ້ ໄດ້ກ້າວໄປສູ່ການບັນລຸຄາດໝາຍໃໝ່ເປັນຕົ້ນ: ຈຳນວນເມືອງທີ່ມີບ້ານທຸກຍາກກວ່າ 51% ຫຼຸດລົງຍັງເຫຼືອ 1 ເມືອງຄື: ເມືອງນອງ, ທົ່ວແຂວງລວມມີຈຳນວນບ້ານທັງໝົດ 1.012 ບ້ານ, ສາມາດສ້າງເປັນບ້ານປ້ອງກັນຊາດດີໄດ້ແລ້ວ 538 ບ້ານ, ເປັນບ້ານປ້ອງກັນຄວາມສະຫງົບດີໄດ້ 494 ບ້ານ, ສ້າງເປັນບ້ານປອດຄະດີ 496 ບ້ານ, ບ້ານມີກອງທຶນບໍລິການເງິນກູ້ໃຫ້ປະຊາຊົນມີ 629 ບ້ານ, ບ້ານມີເສັ້ນທາງຄົມມະນາຄົມທຽວໄດ້ຕະຫຼອດປີມີ 861 ບ້ານ, ສ້າງເປັນບ້ານແບບຢ່າງສາທາລະນະສຸກມີ 299 ບ້ານ, ເປັນບ້ານສຳເລັດການສຶກສາຊັ້ນປະຖົມພາກບັງຄັບກວມແລ້ວ 100%, ສ້າງເປັນບ້ານວັດທະນະທຳ 330 ບ້ານ, ປະກາດຮັບຮອງເປັນບ້ານພັດທະນາ 179 ບ້ານ, ຈຳນວນຄອບຄົວທົ່ວແຂວງມີ 154.976 ຄອບຄົວ. ໃນນັ້ນ ຍັງມີຄອບຄົວທຸກຍາກຢູ່ 11.526 ຄອບຄົວ, ເທົ່າກັບ 7,44%. ກ່ຽວກັບການພັດທະນາເສດຖະກິດຂອງບ້ານທົດລອງສ້າງເປັນບ້ານພັດທະນານັ້ນ, ແຂວງ ແລະ ເມືອງຮ່ວມກັບບ້ານ ໄດ້ພ້ອມກັນຊອກທ່າແຮງຄວາມສາມາດບົ່ມຊ້ອນ ເພື່ອສ້າງໂຄງການຜະລິດເປັນສິນຄ້າຂອງແຕ່ລະຄອບຄົວ ຈັດຕັ້ງເປັນກຸ່ມການຜະລິດຕ່າງໆ. ຈາກການເຄື່ອນໄຫວຜ່ານມາ ເຫັນວ່າມີຫຼາຍບ້ານມີການຜະລິດ ໂດຍສະເພາະປູກເຂົ້າ, ປູກຜັກປອດສານພິດ, ປູກຫວາຍ, ຢາງໂບງ, ກ້ວຍ, ມັນຕົ້ນ, ໝາກເຜັດ, ລ້ຽງແບ້, ງົວ, ໝູ, ປາ, ໄກ່ ຯລຯ ສະເລ່ຍລາຍໄດ້ຂອງຄອບຄົວ 5-10 ລ້ານກີບຕໍ່ປີ, ສຳລັບຄອບຄົວຕົວແບບໄດ້ 18-32 ບ້ານກີບຕໍ່ປີ. ນອກນີ້, ລະບົບການຈັດຕັ້ງດ້ານການເງິນມີການຫັນປ່ຽນໄປຕາມລະບົບດີຂຶ້ນ ໃນສາມເມືອງທົດລອງ ມີການເກັບລາຍຮັບເຂົ້າງົບປະມານ 30,4 ຕື້ກີບ, ລື່ນແຜນການ 11,5%, ຊຶ່ງໃນ 9 ບ້ານທົດລອງແມ່ນມີກອງທຶນພັດທະນາບ້ານ.
ຂ່າວແລະພາບ: ສະຫວັນພັດທະນາ