ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ວັນທີ 31 ສິງຫາ 2020 ວ່າ: ມີຜູ້ເສຍຊິວິດຍ້ອນພະຍາດໄຂ້ຍຸງລາຍສະສົມ 11 ຄົນແລ້ວໃນທົ່ວປະເທດ, ໃນນັ້ນ ເສຍຊິວິດໃໝ່ເພີ່ມຂື້ນ 1 ຄົນ ໃນວັນທີ 29 ສິງຫາ 2020 ຢູ່ແຂວງ ຄໍາມ່ວນ, ລວມເປັນ 5 ແຂວງ ແລະ ນະຄອນຫຼວງວຽງ ຈັນ ທີ່ພົບກໍລະນີຜູ້ ເສຍຊິວິດ.
ຂະນະທີ່ການເຝົ້າລະວັງພະຍາດໄຂ້ຍຸງລາຍກໍລະນີສະສົມທັງໝົດແຕ່ວັນທີ 28 ທັນວາ 2019-30 ສິງຫາ 2020 ມີທັງໝົດ 5.677 ກໍລະນີ ແລະ ເສຍຊີວິດ 10 ກໍລະນີ. ມາຮອດ 31 ສິງຫາ 2020 ນີ້ ຈຳນວນຜູ້ຕິດເຊື້ອໄຂ້ຍຸງລາຍລວມທັງໝົດ 5.732 ກໍລະນີ ແລະ ເສຍຊີວິດລວມເປັນ 11 ຄົນ.
ສຳລັບ ນະຄອນຫຼວງວຽງຈັນ ພົບຜູ້ຕິດເຊື້ອໄຂ້ຍຸງລາຍຫຼາຍກວ່າໝູ່ ຢູ່ທີ່ 1.326 ກໍລະນີ ແລະ ເສຍຊີວິດແລ້ວ 4 ຄົນ, ຮອງລົງມາແມ່ນແຂວງ ບໍລິຄຳໄຊ 676 ກໍລະນີ ແລະ ເສຍຊີວິດແລ້ວ 2 ກໍລະນີ, ແຂວງວຽງຈັນ 603 ກໍລະນີ, ສະຫວັນນະເຂດ 539 ກໍລະນີ ແລະ ເສຍຊີວິດ 1 ກໍລະນີ, ແຂວງບໍ່ແກ້ວ 564 ກໍລະນີ, ຫຼວງນໍ້າທາ 377 ກໍລະນີ, ຄຳມ່ວນ 313 ກໍລະນີ ແລະ ເສຍຊີວິດແລ້ວ 2 ຄົນ, ຫຼວງພະບາງ 321 ກໍລະນີ, ອັດຕະປື 295 ກໍລະນີ, ສາລະວັນ 295 ກໍລະນີ, ໄຊຍະບູລີ 175 ກໍລະນີ ແລະ ເສຍຊີວິດແລ້ວ 1 ຄົນ, ອຸດົມໄຊ 81 ກໍລະນີ, ເຊກອງ 74 ກໍລະນີ, ໄຊສົມບູນ 53 ກໍລະນີ, ຈຳປາສັກ 27 ກໍລະນີ, ຜົ້ງສາລີ 9 ກໍລະນີ, ຫົວພັນ 2 ກໍລະນີ, ຊຽງຂວາງ 2 ກໍລະນີ ແລະ ເສຍຊີວິດ 1 ກໍລະນີ.
ຕໍ່ສະພາບການແຜ່ລະບາດພະຍາດໄຂ້ຍຸງ ລາຍດັ່ງກ່າວ, ກົມຄວບຄຸມພະຍາດຕິດຕໍ່ ຍັງໄດ້ແນະນຳ ແລະ ຮຽກຮ້ອງ ໃຫ້ພໍ່ແມ່ ປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈ ໃນການ ປະຕິບັດ 5 ປ ຢ່າງເຄັ່ງຄັດ.
ຮຽບຮຽງຂ່າວ: ພຸດສະດີ