ເວັບໄຊ posttoday ລາຍງານວ່າ ທ່ານ ຫຼີ່ເຕົ້າຂຸຍ ນັກເສດຖະສາດຈາກມະຫາວິທະຍາໄລຊິງຫົວ ແລະ ທີ່ປຶກສາລັດຖະບານຈີນ ແນະນຳໃຫ້ທາງລັດຖະບານຈີນໃຊ້ການສົ່ງອອກຢາ ແລະ ສານຕັ້ງຕົ້ນເປັນອາວຸດຕອບໂຕ້ຫາກທາງລັດຖະບານ ສ. ອາເມລິກາ ກີດກັ້ນບໍ່ໃຫ້ຈີນເຂົ້າເຖິງຊິບຄອມພິວເຕີ.
ທ່ານ ຫຼີ່ ເປີດເຜີຍວ່າ ກວ່າ 90% ຂອງວັດຖຸດິບໃນການຜະລິດວິຕາມິນ ແລະ ຢາຕ້ານເຊື້ອຂອງ ສ. ອາເມລິກາ ລ້ວນຕ້ອງນຳເຂົາຈາກຈີນ ແລະ ສ.ອາເມລິກາກໍ່ບໍ່ສາມາດຜະລິດວັດຖຸດິບເຫຼົ່ານີ້ໄດ້ເອງໃນເວລາສັ້ນ “ແນ່ນອນວ່າເຮົາຈະບໍ່ເຮັດແບບນີ້ກັບໃຜກ່ອນ ແຕ່ຫາກ ສ. ອາເມລິກາກ້າຫຼິ້ນຕຸກຕິກ ເຮົາຈະຕອບໂຕ້ດ້ວຍວິທີເຫຼົ່ານີ້”.
ທ່ານ ຫຼີ່ ຍັງກ່າວຕື່ມອີກວ່າ ການປິດກັ້ນຈີນຈາກຊິບທັງໝົດເທົ່າກັບເປັນການກົດປຸ່ມລະເບີດນິວເຄຣຍ ແລະ ການທຳລາຍລະບົບເສດຖະກິດຂອງຈີນເທົ່າກັບເປັນການເປີດສົງຄາມກັບປາກທ້ອງຂອງປະຊາຊົນຈີນ ຈີນຈຶ່ງມີສິດເປີດສົງຄາມກັບ ສ.ອາເມລິກາດ້ວຍຢາເຊັ່ນດຽວກັນ.
ເມື່ອອາທິດທີ່ຜ່ານມາ ທາງ ສ.ອາເມລິກາ ໄດ້ມີຄຳສັ່ງຈຳກັດການເຂົ້າເຖິງເທັກໂນໂລຢີຊິບ ແລະ ຊັອຟ ແວຣ໌ ອາເມລິກາຂອງຫົວເວີ່ຍ ແລະ ຍັງຂຶ້ນບັນຊີດຳ ບໍລິສັດໃນເຄືອຂອງຫົວເວີ່ຍອີກ 38 ແຫ່ງ ໃນ 21 ປະເທດ ລວມເຖິງໄທ ໂດຍລະບຸວ່າບໍລິສັດເຫຼົ່ານີ້ອາດເປັນຕົວແທນຫົວເວີ່ຍໃນການເຮັດທຸລະກຳທີ່ຂັດກັບຜົນປະໂຫຍດຂອງ ສ.ອາເມລິກາ.
ຮຽບຮຽງຂ່າວ: ພຸດສະດີ