ປັດຈຸບັນ ແມ່ນຢູ່ໃນໄລຍະລະດູແລ້ງ ຫຼາຍພື້ນທີ່ໄດ້ປະເຊີນກັບສະພາບອາກາດຮ້ອນອົບເອົ້າ ບາງວັນອຸນຫະພູມສູງເຖິງ 40-42 ອົງສາ ເຊິ່ງໄລຍະດັ່ງກ່າວ ກໍມັກຈະເກີດເຫດໄຟໄໝ້ເຮືອນປະຊາຊົນຈຳນວນຫຼາຍ ອາດເປັນຍ້ອນການໃຊ້ໄຟຟ້າຫຼາຍເກີນໄປ ຈົນເຮັດໃຫ້ໄຟຟ້າເກີດລັດວົງຈອນ.
ອີງຕາມການລາຍງານຂອງພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ວັນທີ 7 ພຶດສະພາ 2020 ໃຫ້ຮູ້ວ່າ: ໃນເດືອນເມສາ 2020 ຜ່ານມາ ທົ່ວນະຄອນຫຼວງວຽງຈັນມີອັກຄີ ໄພເກີດຂຶ້ນ 7 ຄັ້ງ ໃນນີ້ໄໝ້ເຮືອນ 3 ຄັ້ງ ໄໝ້ລົດ 1 ຄັ້ງ ແລະ ໄໝ້ປ່າຫຍ້າ 3 ຄັ້ງ ມູນຄ່າຄວາມເສຍຫາຍ 265 ລ້ານກວ່າກີບ ແລະ 10.000 ໂດລາສະຫະລັດ ເຊິ່ງສາເຫດຂອງການເກີດອັກຄີໄພແມ່ນມາຈາກໄຟຟ້າຊ໋ອດ 2 ຄັ້ງ, ໃຕ້ທຽນບູຊາ 1 ຄັ້ງ, ໄຟຊ໋ອດສາຍມັດລົດ 1 ຄັ້ງ ແລະ ຈູດປ່າຊະຊາຍ 3 ຄັ້ງ.
ເພື່ອຫຼີກລ່ຽງຈາກບັນຫາດັ່ງກ່າວ ຈຶ່ງໄດ້ຮຽກຮ້ອງໃຫ້ທົ່ວສັງຄົມເພີ່ມທະວີຄວາມເອົາໃຈໃສ່ ໃນການສະກັດກັ້ນ ແລະ ປ້ອງກັນອັກຄີໄພຢ່າງເຂັ້ມງວດ ໂດຍສະເພາະໃຫ້ເອົາໃຈໃສ່ກວດກາລະບົບໄຟຟ້າພາຍໃນເຮືອນຂອງຕົນເປັນປົກກະຕິ ເອົາໃຈໃສ່ເປັນພິເສດໃນການຈູດຂີ້ເຫຍື້ອ, ຈູດປ່າ ເພື່ອບໍ່ໃຫ້ແຜ່ລາມໄປໄໝ້ເຮືອນຂອງປະຊາຊົນ ທີ່ຢູ່ບໍລິເວນໃກ້ຄຽງ ເພາະໄລຍະນີ້ແມ່ນຢູ່ໃນໄລຍະລະດູແລ້ງ ອາກາດແຫ້ງ ເຊິ່ງອາດມີຄວາມສ່ຽງເຮັດໃຫ້ເກີດໄຟໄໝ້ໄດ້ງ່າຍ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ໜັງສືພິມວຽງຈັນໃໝ່