spot_img
Homeຊີວິດແລະຄວາມຮັກຈົດໝາຍເຖິງຫຼານສາວ

ຈົດໝາຍເຖິງຫຼານສາວ

Published on

Laopost

ສະບາຍດີ ອີ່ນ້ອຍ ຫຼານສາວສຸດທີ່ຮັກຂອງແມ່ເຖົ້າ, ກ່ອນອື່ນໝົດ ແມ່ເຖົ້າຫວັງວ່າຫຼານສາວຂອງແມ່ເຖົ້າຄົງສະບາຍດີ ແລະມີຄວາມຫ້າວຫັນໃສ່ການສຶກສາຮ່ຳຮຽນດີເນາະ!. ສ່ວນແມ່ເຖົ້າແມ່ນສະບາຍດີ ແຕ່ຍັງບໍ່ແຈບເຈີນຳຄວາມຄິດຮອດຄິດເຖິງຫຼານສາວຢູ່ຕະຫຼອດ ບໍ່ຮູ້ວ່າຫຼານຢູ່ຫໍພັກນັ້ນຢູ່ກິນແນວເລີ ຕື່ນຈັກໂມງ, ໄປໂຮງຮຽນຈັກໂມງ, ເລີກໂຮງຮຽນມາຫໍພັກແລ້ວຫຼານເຮັດຫຍັງແດ່ ແລະກ່ອນນອນຫຼານເຮັດຫຍັງ? ກ່ອນແມ່ເຖົ້າເປັນຫ່ວງເລື່ອງນີ້ເພາະແມ່ເຖົ້າເຫັນພຶດຕິກຳຂອງນັກສຶກສາບາງຄົນທີ່ພັກຢູ່ຫໍພັກໃກ້ເຮືອນເຮົານີ້:

ແມ່ຕູ້ໄດ້ລັກສັງເກດເບິ່ງພຶດຕິກຳນັກສຶກສາສາວຜູ້ໜຶ່ງທີ່ພັກຢູ່ຫໍພັກຂ້າງເຮືອນເຮົາ ລາວເປັນຄົນມີຮູບຮ່າງໜ້າຕາຜິວພັນສວຍງາມ ຍ່າງໄປໂຮງຮຽນເທື່ອໃດບໍ່ແມ່ນແຕ່ພວກຜູ້ບ່າວເຂົາແນມດອກ ພວກຜູ້ສາວກໍພາກັນແນມ ລວມທັງແມ່ເຖົ້າກໍແນມລາວຄືກັນ ອອນຊອນນຳຄວາມງາມຂອງລາວ ເສຍດາຍແຕ່ທ່າທາງການຍ່າງຂອງລາວຂ້ອນຂ້າງແຂງ ກະໂດ່ງກະເດ່ງ ເວີກໆ ວາກໆ ປານນັ້ນພວກຜູ້ບ່າວກະຍັງຫຸ້ມບໍ່ແມ່ນຂອງງ່າຍ ແຕ່ລາວກໍບໍ່ແມ່ນຊິມັກໃຜໂລໆເລໆ.

ຕອນຍ່າງໄປຮຽນແມ່ຕູ້ເຫັນລາວໃຊ້ສາຍສຽບຫູຟັງເພງໃນໂທລະສັບ ສ່ວນມືແມ່ນກົດຢູ່ໂທລະສັບຫັ້ນ, ຕອນກັບຈາກໂຮງຮຽນແມ່ຕູ້ກໍເຫັນລາວໃຊ້ສາຍສຽບຫູຍ່າງກົ້ມກົດໂທລະສັບມາ, ເວລາແມ່ຕູ້ຍ່າງກາຍຫ້ອງພັກຂອງລາວ ແມ່ຕູ້ກໍເຫັນລາວນັ່ງຈິ້ມໂທລະສັບຢູ່ຫັ້ນ ຄັນບໍ່ນັ່ງຈິ້ມກໍນອນຈິ້ມ ທຸກເວລາແມ່ນແຕ່ຕອນລາວຕາກເຄື່ອງ ກວ່າຊິແລ້ວກໍໃຊ້ເວລາດົນເພາະທັງຈິ້ມໂທລະສັບ ທັງຕາກເຄື່ອງ.. ເວລາທີ່ບໍ່ເຫັນລາວຈິ້ມໂທລະສັບແມ່ນຕອນກິນເບຍ ຫຼືບາງເທື່ອນັ່ງກິນເຂົ້າກັບໝູ່ຢູ່ກະຍັງຫຼິ້ນໂທລະສັບ.

ນັ້ນແມ່ນ ບຸກຄົນຕົວຢ່າງທີ່ແມ່ເຖົ້າຢາກບອກໃຫ້ຫຼານຮູ້ວ່າ ຫຼານສາວຂອງແມ່ເຖົ້າຢ່າເປັນຈັ່ງຊັ້ນເດີ, ນອນກໍຄວນຕື່ນແຕ່ເຊົ້າ ແຕ່ງຢູ່ຄົວກິນ, ອະນາໄມຮ່າງກາຍ, ເບິ່ງບົດຮຽນ, ກິນເຂົ້າ ແລ້ວໄປໂຮງຮຽນ, ເວລາຢູ່ຫ້ອງຮຽນກໍຕິດຕາມອາຈານໃຫ້ດີ ຟັງໃຫ້ໄດ້ຍິນທຸກຄຳຂອງອາຈານ ຖ້າບໍ່ເຂົ້າໃຈກໍບອກວ່າບໍ່ເຂົ້າໃຈ ໃຫ້ອາຈານເພິ່ນອະທິບາຍໃຫ້ຟັງໃໝ່. ບາດກັບມາຫ້ອງພັກ ຫຼານກໍເອົາບົດຮຽນມາທົບທວນ, ຕອນແລງກິນເຂົ້າແລ້ວຫຼານກໍລີດເຄື່ອງນຸ່ງໄວ້, ແກ້ບົດເຝິກຫັດ ຫຼືອ່ານບົດຮຽນວິຊາກຽມຊິໄປຮຽນນັ້ນເພື່ອທຳຄວາມເຂົ້າໃຈໄວ້ລ່ວງໜ້າ, ຖ້າວ່າງໆ ແນ່ກໍເຂົ້າຫ້ອງສະໝຸດຂອງໂຮງຮຽນ ຊອກອ່ານໜັງສື ຖ້າບໍ່ຢາກອ່ານບົດຮຽນ ຫຼານກໍອ່ານເລື່ອງອື່ນກໍໄດ້ ລ້ວນແຕ່ເປັນປະໂຫຍດທັງນັ້ນ. ເລື່ອງໂທລະສັບນະ ຫຼານກະຫຼິ້ນເລັກໆ ນ້ອຍໆ ທີ່ສຳຄັນນັ້ນໃຫ້ຮູ້ຈັກຊອກຂໍ້ມູນດີໆ ປ້ອນເຂົ້າສະໝອງ ສະສົມໄວ້ໃຊ້ໃນອະນາຄົດຂອງຫຼານຫັ້ນລະ…

ແມ່ເຖົ້າບໍ່ມີຫຍັງຫຼາຍເດີ ດ້ວຍຄວາມຮັກ ຄວາມຫ່ວງໃຍ ເວລາໃດແມ່ເຖົ້າກໍຄິດຮອດຫຼານຢູ່ສະເໝີ ຢ້ານແຕ່ຫຼານມົວເມົານຳວັດຖຸສິ່ງຂອງຈົນລືມເຝິກຝົນຫຼໍ່ຫຼອມຕົນເອງ. ແມ່ເຖົ້າຖ້າເບິ່ງຜົນງານຂອງຫຼານຢູ່ສະເໝີເດີ ແລະຖ້າຫຼານມີບັນຫາຫຍັງ ກໍໂທມາຫາແມ່ເຖົ້າ ຮັກສະເໝີເນີ່ນ້ອຍເນີ່ ປິດພາກຮຽນແລ້ວມາຢາມແມ່ເຖົ້າແດ່.

ຈາກແມ່ເຖົ້າຜູ້ຄອງຄອຍ

ບົດຄວາມຫຼ້າສຸດ

ຜູ້ນຳຄົນໃໝ່ ອີ ແຈມະຢອງ ຄວ້າຕຳແໜ່ງປະທານາທິບໍດີ ຄົນທີ 14 ສ.ເກົາຫຼີ

ອີ ແຈມະຢອງ ຄວ້າໄຊຊະນະການເລືອກຕັ້ງປະທານາທິບໍດີ ສ.ເກົາຫຼີ ພາຍຫຼັງ ຍຸນຊ໋ອກຍອນ ຖືກຖອດອກກຈາກຕໍາແໜ່ງ. ສຳນັກຂ່າວຕ່າງປະເທດລາຍງານໃນວັນທີ 3 ມິຖຸນາ 2025 ຜ່ານມານີ້ວ່າ: ເກົາຫຼີໃຕ້ຈັດການເລືອກຕັ້ງປະທານາທິບໍດິຄັ້ງພິເສດ ເພື່ອຫາຜູ້ນຳຄົນໃໝ່ແທນ ທ່ານ...

ຈີນປະກາດ ເປີດບໍລິການວີຊາພິເສດ “ASEAN visa”

ຈີນປະກາດເປີດຕົວ ວີຊ່າອາຊຽນ ໄຟຂຽວນັກທຸລະກິດ 10 ບັນປະເທດອາຊຽນລວມເຖິງ ຕີມໍແລັດສະແຕ ເດີນທາງເຂົ້າອອກສະດວກ ສຳນັກຂ່າວຕ່າງປະເທດລາຍງານໃນວັນທີ 4 ມິຖຸນາ 2025, ຈີນປະກາດເປີດຕົວ  "ASEAN Visa" ຫຼື...

ມອບ-ຮັບໜ້າທີ່ລະຫວ່າງເຈົ້ານະຄອນຫຼວງພະບາງ ຜູ້ເກົ່າ ແລະ ຮັກສາການເຈົ້ານະຄອນຫຼວງພະບາງ ຜູ້ໃໝ່

ແຕ່ງຕັ້ງທ່ານ ທ່ານ ສະເຫວີຍ ສີລາວັນ ຮັກສາການເຈົ້ານະຄອນ ຫຼວງພະບາງ ຜູ້ໃໝ່ ໃນວັນທີ 4 ມິຖຸນາ 2025 ທີ່ຫ້ອງປະຊຸມໃຫຍ່ຫ້ອງວ່າການນະຄອນຫຼວງພະບາງ ບ້ານຄອຍ ໄດ້ຈັດພິທີ ມອບ-ຮັບໜ້າທີ່ລະ...

ທ່ານ ອານຸພາບ ວົງໜໍ່ແກ້ວ ເປັນຮອງລັດຖະມົນຕີກະຊວງການຕ່າງປະເທດຄົນໃໝ່

ປະກາດແຕ່ງຕັ້ງ ທ່ານ ອານຸພາບ ວົງໜໍ່ແກ້ວ ເປັນຮອງລັດຖະມົນຕີກະຊວງການຕ່າງປະເທດຄົນໃໝ່ ຢ່າງເປັນທາງການ ວັນທີ 4 ມິຖຸນາ 2025 ຢູ່ກະຊວງການຕ່າງປະເທດ ໄດ້ຈັດພິທີປະກາດການ ຈັດຕັ້ງຕຳແໜ່ງບໍລິຫານຮອງລັດຖະມົນຕີ, ຫົວໜ້າກົມ ແລະ...