ສຳນັກຂ່າວເດລີເມລ ລາຍງານເມື່ອວັນທີ 7 ເມສາ ວ່າ ເກົາຫຼີໃຕ້ພົບຜູ້ປ່ວຍໃນເມືອງ ແທກູ ຫຼື ແດກູ ສູນກາງການແຜ່ລະບາດໃນປະເທດທີ່ປິ່ນປົວດີແລ້ວ 51 ຄົນ ມີຜົນກວດເຊື້ອໂຄວິດ-19 ເປັນບວກອີກຄັ້ງ ຫຼັງຈາກພວກເຂົາໄດ້ຮັບອະນຸຍາດໃຫ້ອອກໂຮງໝໍບໍ່ພໍເທົ່າໃດມື້.
ສູນຄວບຄຸມ ແລະ ປ້ອງກັນການລະບາດແຫ່ງຊາດເກົາຫຼີໃຕ້ (KCDC) ສັນນິຖານວ່າ ໄວຣັດສາຍພັນໃໝ່ໃນຮ່າງກາຍຜູ້ປ່ວຍກຸ່ມນີ້ຖືກກະຕຸ້ນຂຶ້ນອີກຄັ້ງ ຫຼາຍກວ່າຈະແມ່ນການໄດ້ຮັບເຊື້ອໃໝ່ ພ້ອມລະບຸວ່າເຊື້ອໄວຣັດຊະນິດນີ້ສາມາດຢູ່ໃນພາວະສະຫງົບ ສົ່ງຜົນໃຫ້ກວດສອບບໍ່ພົບວ່າມີການຕິດເຊື້ອໃນເຊລຂອງມະນຸດ.
ທ່ານ ຊອງ ອຶນຄຍອງ ເລຂາທິການສູນ KCDC ຖະແຫຼງການວ່າ ໄດ້ສົ່ງເຈົ້າໜ້າທີ່ໄປທີ່ເມືອງແທກູຢ່າງຮີບດ່ວນ ເພື່ອເລັ່ງສອບສວນກໍລະນີພົບຜູ້ຕິດເຊື້ອຊໍ້າອີກ ແລະ ຈະເລັ່ງຫາມາດຕະການເພື່ອຮັບມືກັບສະຖານະການໃນລັກສະນະດັ່ງກ່າວທີ່ອາດຈະເກີດຂຶ້ນໃນອະນາຄົດ.
ດຣ. ພອລ ຮັນເຕີ ສາສະດາຈານດ້ານໂຣກລະບາດຈາກມະຫາວິທະຍາໄລ ອີສແຕງເກລຍ ໃນປະເທດ ອັງກິດ ໃຫ້ສຳພາດ ເດລີເມລອອນລາຍວ່າ ເຫັນດີກັບການສັນນິຖານຂອງເຄຊີດີຊີວ່າຜູ້ປ່ວຍກຸ່ມນີ້ບໍ່ໄດ້ຕິດເຊື້ອໃໝ່ ແຕ່ກໍ່ບໍ່ເຊື່ອວ່າໄວຣັດຈະຖືກກະຕຸ້ນອີກຄັ້ງເຊັ່ນດຽວກັນ ແຕ່ສ່ວນຕົວຄິດວ່າກໍລະນີດັ່ງກ່າວເປັນໄປໄດ້ສູງທີ່ຈະເກີດຄວາມຜິດພາດໃນການກວດຫາເຊື້ອໂຄວິດ-19 ໃນເບື້ອງຕົ້ນຈຶ່ງເຮັດໃຫ້ຜົນອອກມາເປັນລົບ.
ຮຽບຮຽງຂ່າວ: ພຸດສະດີ