ເຈົ້າແຂວງອຸດົມໄຊ ແລະ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ອອກຄຳສັ່ງແນະນຳເຖິງທ່ານເຈົ້າເມືອງ 7 ເມືອງ, ຫົວໜ້າພະແນກການ, ອົງການຈັດຕັ້ງທຽບເທົ່າ, ຫົວໜ້າກອງບັນຊາການ ປກຊ ແລະປກສ, ຫົວໜ່ວຍທຸລະກິດ, ບໍລິສັດ, ຫ້າງຮ້ານ, ພໍ່ຄ້າ ແລະ ປະຊາຊົນບັນດາເຜົ່າ ພາຍໃນແຂວງອຸດົມໄຊ ໃຫ້ປະຕິບັດມາດຕະການເລື່ອນຫຼືໂຈະການຈັດງານບຸນ ແລະ ຊຸມນຸມຕ່າງໆ ທີ່ມີຜູ້ເຂົ້າຮ່ວມເປັນຈຳນວນຫຼາຍເປັນການຊົ່ວຄາວ ເພື່ອປ້ອງກັນການແຜ່ລະບາດຂອງ COVID-19. ພ້ອມກັນນີ້, ກໍ່ໄດ້ແຈ້ງໄປເຖິງບັນດາເຈົ້າຂອງກິດຈະການຕ່າງໆເຊັ່ນບ້ານພັກ, ໂຮງແຮມ, ສະຖານທີ່ທ່ອງທ່ຽວ, ບໍລິສັດ, ຫົວໜ່ວຍທຸລະກິດໃຫ້ປະຕິບັດ ກວດກາ ແລະ ຄັດກອງພະນັກງານ ບຸກຄົນທີ່ເຂົ້າມາຍ້ຽມຢາມ; ຖ້າພົບເຫັນຄົນທີ່ມີອາການສົງໄສ ຫຼື ມີອາການໄຂ້ ຕ້ອງລາຍງານໃຫ້ພະແນກສາທາລະນະສຸກ ຫຼື ນຳສົ່ງເຂົ້າໂຮງໝໍຢ່າງຮີບດ່ວນ ເພື່ອຕິດຕາມ ແລະ ກວດຫາເຊື້ອພະຍາດ; ໃຫ້ບັນດາຄູອາຈານໃນໂຮງຮຽນຕ່າງໆ ຕິດຕາມກວດການັກຮຽນ ຖ້າໂຮງຮຽນໃດມີຜູ້ທີ່ມີອາການສົງໄສ ແມ່ນໃຫ້ນຳສົ່ງໂຮງໝໍຢ່າງຮີບດ່ວນ ຫຼື ຖ້າໂຮງຮຽນໃດມີການລະບາດເກີດຂຶ້ນແມ່ນໃຫ້ໂຈະການຮຽນຊົ່ວຄາວ ຈົນກວ່າສະພາບສະຫງົບຈຶງໃຫ້ເຂົ້າຮຽນຕໍ່.
ໃນເວລານີ້ປະເທດລາວຍັງເປັນໜຶ່ງໃນປະເທດທີ່ຍັງບໍ່ມີລາຍງານຄົນຕິດເຊື້ອພະຍາດໄວຣັສສາຍພັນໃໝ່.
