ສຳນັກຂ່າວຕ່າງປະເທດລາຍງານວ່າ ລົດໂຮງໝໍທີ່ຕິດຕັ້ງເຕັກໂນໂລຊີສັນຍານບໍ່ມີສາຍ (5G) ໄດ້ສະແດງປະສິດຕິພາບໃນການຊ່ວຍເຫຼືອຜູ້ປະສົບໄພແຜ່ນດິນໄຫວຮຸນແຮງໃນມົນທົນເສສວນ ທາງຕາເວັນຕົກສຽງໃຕ້ຂອງ ສປ ຈີນ ເມື່ອຕົ້ນອາທິດທີ່ຜ່ານມາ.
ຂະນະທີ່ຜູ້ບາດເຈັບສາຫັດລາຍໜຶ່ງກຳລັງຮັບການປິ່ນປົວມານຳໂຮງໝໍເມືອງໜິງ ເມື່ອວັນທີ 18 ມິຖຸນາ 2019 ກໍໄດ້ມີການສົ່ງພາບອັນຕຣາຊາວຄວາມລະອຽດສູງຂອງຜູ້ບາດເຈັບໄປທີ່ແພດຊ່ຽວຊານໃນເສິງຕູ ຊຶ່ງຫ່າງອອກໄປຫຼາຍກວ່າ 200 ກີໂລແມັດຜ່ານເຄືອຂ່າຍ 5G.
ບັນດາທີມແພດຜູ້ຊ່ຽວຊານຈາກໂຮງໝໍປະຊາຊົນມົນທົນເສສວນໃນນະຄອນເສິງຕູ ເມືອງເອກຂອງມົນທົນກໍເຮັດການວິເຄາະພາບ ອັນຕຣາຊາວທີ່ໄດ້ຮັບມາວ່າຜູ້ບາດເຈັບມີອາການມ້າມແຕກ ແລະ ແນະນຳແນວທາງການຮັກສາທັນທີ.
ລາຍງານລະບຸວ່າ ລົດໂຮງໝໍຄັນນີ້ຮ່ວມພັດທະນາໂດຍໂຮງໝໍປະຊາຊົນມົນທົນເສສວນ ແລະ ໄຊນ່າໂມບາຍ ຜູ້ໃຫ້ບໍລິການໂທລະຄົມມະນາຄົມລາຍໃຫຍ່ຂອງຈີນ ຖືກສົ່ງລົງພື້ນທີ່ທັນທີພາຍຫຼັງເກີດເຫດແຜ່ນດິນໄຫວ.
ທັງນີ້ ໜ່ວຍງານທ້ອງຖິ່ນເສສວນລາຍງານວ່າ ເຫດແຜ່ນດິນໄຫວຂະໜາດ 6.0 ແມັກນິຈູດຊຶ່ງສັ່ນສະເທືອນເມືອງອີ໋ປິນ ອຳເພີສາງໜິງ ເມື່ອຄືນວັນທີ 17 ມິຖຸນາ 2019 ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 13 ລາຍ ແລະ ມີຜູ້ບາດເຈັບເກືອບ 200 ຄົນ.
ຮຽບຮຽງຂ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: www.sanook.com