ພາຫະນະສວ່ນບຸກຄົນບໍ່ວ່າຈະເປັນລົດຖີບ, ລົດຈັກ, ລົດໃຫຍ່ ແມ່ນຖືກອອກແບບມາເພື່ອອຳນວຍຄວາມສະດວກສະບາຍໃຫ້ແກ່ການເດີນທາງຂອງຄົນເຮົາ ໃຫ້ໄປທີ່ໝາຍບໍ່ວ່າຈະເປັນໂຮງຮຽນ, ຫ້ອງ ການ ຫຼື ສະຖານທີ່ຕ່າງໆໄດ້ຢ່າງສະດວກສະບາຍ ແລະ ວ່ອງໄວຂຶ້ນ. ດັ່ງທີ່ພວກເຮົາຮູ້ນຳກັນດີວ່າ ມີອຸບັດຕິເຫດເກີດຂຶ້ນຢ່າງຫຼວງຫຼາຍໃນປະເທດລາວ, ເຫັນຕາມຂ່າວສານໃນແຕ່ລະວັນ, ບາງຄົນເຫັນຕາມທ້ອງຖະໜົນເກືອບທຸກມື້. ແນ່ນອນອຸບັດຕິເຫດເຫລົ່ານັ້ນແມ່ນສ້າງຄວາມເສຍຫາຍໃຫ້ເເກ່ຊີວິດ ແລະ ຊັບສິນຂອງຜູ້ກ່ຽວຂ້ອງ.
ແຕ່ທ່ານເຄີຍລອງຄິດເບິ່ງບໍວ່າອຸປະຕິເຫດສ້າງຜົນເສຍຫາຍຕໍ່ເສດຖະກິດຂອງປະເທດຫຼາຍປານໃດ? ເມື່ອເກີດມີອຸບັດຕິເຫດ ຜົນກະທົບທັງທາງກົງ ແລະ ທາງອອ້ມຫຼາຍປະການແມ່ນສົ່ງຜົນຕໍ່ທາງດ້ານເສດຖະກິດເປັນຕົ້ນແມ່ນ:
ເກີດຄ່າໃຊ້ຈ່າຍຕໍ່ຜູ້ທີ່ເກີດອຸບັດຕິເຫດໂດຍກົງຫລືຜູ້ກ່ຽວຂ້ອງ:
- ຄ່າໃຊ້ຈ່າຍໃນການປິ່ນປົວ
- ຄ່າໃຊ້ຈ່າຍໃນງານສົບ
- ຄວາມເຈັບປວດ ແລະ ທໍລະມານ
- ການຂາດແຮງງານເນື່ອງຈາກບໍ່ສາມາດເຮັດວຽກໄດ້.
ຄ່າໃຊ້ຈ່າຍໃນການປິ່ນປົວກໍລະນີເກີດອຸບັດຕິເຫດເປັນພາລະອັນໜັກໜ່ວງຂອງໂຮງໝໍລັດ, ແລະ ຄ່າໃຊ້ຈ່າຍໃນງານສົບ ກໍລະນີເກີດການເສຍຊີວິດກໍເປັນພາລະອັນໜັກໜ່ວງໃຫ້ແກ່ຄອບຄົວຂອງຜູ້ປະສົບອຸບັດຕິເຫດ. ແລະເຮັດໃຫ້ບຸກຄົນທີ່ກ່ຽວຂ້ອງບໍ່ສາມາດເຮັດວຽກໄດ້ເປັນເວລາຍາວນານ.
ທຸກໆອຸບັດຕິເຫດທີ່ເຮັດໃຫ້ເກີດການບາດເຈັບສາຫັດ ຫຼື ກໍລະນີມີການເສຍຊີວິດ, ຈະເຮັດໃຫ້ຈຳນວນແຮງງານໃນການເຮັດວຽກພາຍໃນປະເທດຫຼຸດລົງໄປທັນທີໜຶ່ງຄົນ. ສິ່ງດັ່ງກ່າວ, ສ້າງພາລະທາງດ້ານເສດຖະກິດໃຫ້ກັບປະເທດເພາະວ່າ ຕ້ອງໄດ້ມີການຈ້າງບຸກຄົນອື່ນມາເຮັດວຽກປ່ຽນແທນ, ການຈ້າງບຸກຄົນເຂົ້າມາປ່ຽນແທນຈະເຮັດໃຫ້ເກີດມີຄ່າໃຊ້ຈ່າຍທີ່ກ່ຽວຂ້ອງເກີດຂຶ້ນເປັນຕົ້ນແມ່ນ ການເສຍເວລາ ແລະ ເງິນໃນການຝຶກອົບຮົມພະນັກງານໃໝ່ ເພື່ອທົດແທນຕຳແໜ່ງງານທີ່ຂາດໄປດັ່ງກ່າວນັ້ນ.
ມູນຄ່າຄວາມເສຍຫາຍຈາກຄວາມເຈັບປວດ ແລະ ທໍລະມານທີ່ເກີດຂຶ້ນແມ່ນບໍ່ສາມາດປະເມີນໄດ້, ແຕ່ກໍເຮັດໃຫ້ບັນດາຄອບຄົວຂອງຜູ້ທີ່ປະສົບອຸບັດຕິເຫດບໍ່ສາມາດມາດເຮັດວຽກໄດ້ເຕັມປະສິດທິພາບເນື່ອງຈາກໄດ້ຮັບຜົນກະທົບ ແລະ ຄວາມເຈັບປວດທາງດ້ານຈິດໃຈ.
ຄວາມເສຍຫາຍທາງດ້ານຊັບສິນ
- ການສ້ອມແປງພາຫານະທີ່ເປ່ເພ
- ຄວາມສູນເສຍການປະກອບສ່ວນທາງເສດຖະກິດ
- ການສ້ອມແປງຊັບສິນຂອງລັດທີ່ເສຍຫາຍເປ່ເພ
ການສ້ອມແປງພາຫານະອາດຈະມີຄ່າໃຊ້ຈ່າຍຢ່າງຫຼວງຫຼາຍໃຫ້ແກ່ບຸກຄົນທີ່ປະສົບອຸບັດຕິເຫດ, ແລະ ຕ້ອງໃຊ້ເວລາໃນການສ້ອມແປງ, ຍິ່ງອຸບັດຕິເຫດໃດທີ່ເຮັດໃຫ້ເກີດຄວາມເປ່ເພເສຍຫາຍຫຼາຍເທົ່າໃດ ຍິ່ງຕ້ອງໃຊ້ເວລາຫຼາຍຂຶ້ນໃນການສ້ອມແປງ ເຊິ່ງນັ້ນໝາຍຄວາມວ່າ ເຈົ້າຂອງພາຫະນະຈະບໍ່ສາມາດເດີນທາງໄປວຽກໄດ້ສະດວກຄືເກົ່າ ສະນັ້ນຈິ່ງເຮັດໃຫ້ເກີດຄວາມເສຍຫາຍທາງດ້ານປະສິດທິພາບຂອງແຮງງານທີ່ຕາມມາ.
ພາຫະນະທີ່ຖືກນຳໃຊ້ທາງດ້ານເສດຖະກິດລວມມີ: ລົດເມ, ລົດເມຂະໜາດນ້ອຍ, ລົດຕຸກໆ ຫລື ລົດຂົນສົ່ງທາງທຸລະກິດອື່ນໆ ແມ່ນມັກມີສວ່ນກ່ຽວຂ້ອງກັບການເກີດອຸບັດຕິເຫດຢູ່ເລື້ອຍໆ. ສະນັ້ນເມື່ອພາຫະນະດັ່ງກ່າວບໍ່ສາມາດນຳໃຊ້ໄດ້ຈະເຮັດໃຫ້ປະສິດທິພາບໃນການດຳເນີນທຸລະກິດຫຼຸດລົງ ຈິ່ງສ້າງຄວາມເສຍຫາຍທາງດ້ານເສດຖະກິດຕາມມາ.
ເມື່ອພາຫະນະເກີດອຸບັດຕິເຫດເຮັດໃຫ້ເກີດຄວາມເສຍຫາຍຕໍ່ກັບຊັບສິນຂອງລັດເຊັ່ນ: ເສົາໄຟຈະລາຈອນ ຫຼື ປ້າຍການຈະລາຈອນ. ຊັບສິນເຫຼົ່ານີ້ຕ້ອງໄດ້ຮັບການສ້ອມແປງ ຫຼື ປ່ຽນແທນ ໂດຍນຳໃຊ້ງົບປະມານຂອງລັດ ເຊິ່ງເປັນການສ້າງຄວາມເສຍຫາຍທາງດ້ານເສດຖະກິດໂດຍກົງ.
ຄ່າໃຊ້ຈ່າຍດ້ານການບໍລິຫານ
- ຄ່າໃຊ້ຈ່າຍໃນການສືບສວນຂອງເຈົ້າໜ້າທີ່
- ຄ່າໃຊ້ຈ່າຍທາງດ້ານກົດໝາຍ
- ຄ່າໃຊ້ຈ່າຍກ່ຽວກັບການປະກັນໄພ
– ການສືບສວນຂອງເຈົ້າໜ້າທີ່ແມ່ນໃຊ້ເວລາ ແລະ ມີຄ່າໃຊ້ຈ່າຍທາງດ້ານການເງິນ, ແລະ ເວລາທີ່ເຈົ້າໜ້າທີ່ນຳໃຊ້ໃນການສືບສວນກ່ຽວກັບອຸບັດຕິເຫດນັ້ນສາມາດນຳໄປເຮັດວຽກປະເພດອື່ນທີ່ມີປະສິດທິຜົນກ່ວາໃຫ້ສຳເລັດ.
– ຄ່າໃຊ້ຈ່າຍທາງດ້ານກົດໝາຍອາດຈະກ່ຽວຂ້ອງກັບ ຄ່າເອກະສານປະເພດຕ່າງໆ ແລະ ການໃຊ້ເວລາໃນການຈັດການອຸບັດຕິເຫດໃນແຕ່ລະກໍລະນີທີ່ເກີດຂຶ້ນ.
– ຄ່າໃຊ້ຈ່າຍກ່ຽວກັບປະກັນໄພ, ເປັນຕົ້ນແມ່ນພາກສວ່ນທີ່ເຮັດການປະກັນໄພ ເຊີ່ງການດຳເນີນການຮຽກຮ້ອງຄ່າປະກັນໄພອາດຈະເຮັດໃຫ້ເສຍເວລາ ແລະ ມີຄ່າໃຊ້ຈ່າຍອື່ນໆທີ່ກ່ຽວຂ້ອງ.
ເຊິ່ງບັນດາຄ່າໃຊ້ຈ່າຍ ແລະ ຄວາມສູນເສຍທັງໝົດທີ່ກ່າວມາ, ຕໍ່ການເກີດອຸບັດຕິເຫດໜຶ່ງຄັ້ງ ອາດຈະມີມູນຄ່າຫຼາຍລ້ານກີບ ຫຼື ຫລາຍກວ່ານັ້ນ. ເຊິ່ງຄວາມສູນເສຍທາງດ້ານເສດຖະກິດອັນເປົ່າປະໂຫຍດນີ້ ສາມາດຫຼີກລ້ຽງໄດ້ງ່າຍໆໂດຍການຂັບຂີ່ຢ່າງພອດໄພ ແລະ ມີຄວາມລະມັດລະວັງ.
ຮູ້ກົດ, ນຳໃຊ້, ຂັບຂີ່ປອດໄພ.
ຂຽນໂດຍ: ແຟນຊິສ ສະຫວັນຄຳ