ສຳນັກຂ່າວຕ່າງປະເທດລາຍງານຈາກປະເທດເກົາຫຼີໃຕ້ ເມື່ອວັນທີ 17 ກຸມພາ 2019 ວ່າ ຄະນະຜູ້ແທນຂອງລັດຖະບານເກົາຫຼີເໜືອນຳໂດຍທ່ານ ຄິມ ຊາງ ຊອນ ເລຂາທິການຄະນະກຳມາທິການຄວາມສຳພັນກັບຕ່່າງປະເທດ ໄດ້ເດີນທາງຮອດນະຄອນຫຼວງຮ່າໂນ້ຍ ເມືອງຫຼວງຂອງຫວຽດນາມ ເມື່ອວັນເສົາທີ່ຜ່ານມາ ເພື່ອກຽມຄວາມພ້ອມສຳລັບການປະຊຸມສຸດຍອດຄັ້ງທີ 2 ລະຫວ່າງທ່ານ ຄິມ ຈອງ ອຶນ ຜູ້ນຳເກົາຫຼີເໜືອ ກັບ ທ່ານ ໂດນັລ ທຣໍ້າ ຜູ້ນຳສະຫະລັດ ທີ່ຈະມີຂຶ້ນໃນລະຫວ່າງວັນທີ 27-28 ກຸມພາ 2019 ນີ້.
ໃນຂະນະດຽວກັນ, ມີລາຍງານວ່າ ຜູ້ນຳເກົາຫຼີເໜືອຈະເດີນທາງມາຮອດຫວຽດນາມໃນວັນທີ 25 ກຸມພາ 2019ນີ້ ເຊິ່ງແຫຼ່ງຂ່າວໃຫ້ຂໍ້ມູນວ່າ ການທີ່ທ່ານ ຄິມ ເດີນທາງມາຮອດກ່ອນລ່ວງໜ້າຫຼາຍມື້ ເນື່ອງຈາກວ່າຜູ້ນຳຕ້ອງການໃຊ້ເວລາຢ້ຽມຢາມ ແລະ ສຶກສາໂຄງການດ້ານເສດຖະກິດ ແລະ ອຸດສາຫະກຳຂອງຫວຽດນາມ ທີ່ແຂວງບັ໊ກນິດ ແລະ ແຂວງໄຮຟອງ ຢູ່ທາງພາກເໜືອຂອງຫວຽດນາມ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews