ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດອາເມລິກາ ເມື່ອວັນທີ 23 ມັງກອນ 2019 ວ່າ ເຈົ້າໜ້າທີ່ໃນສັງກັດໜ່ວຍງານລັດຖະບານກາງສະຫະລັດທີ່ຕ້ອງພັກງານເນື່ອງຈາກພາວະ shut down ຫຼື ການລະງັບແຜນງົບປະມານລາຍຈ່າຍບາງຢ່າງ, ເຊິ່ງຍືດເຍື້ອມາຕັ້ງແຕ່ວັນທີ 22 ທັນວາ 2018 ທີ່ຜ່ານມາ ໄດ້ລວມຕົວກັນປະທ້ວງຄັ້ງໃໝ່ເມື່ອວັນພຸດ (23/01/2019) ໂດຍສ່ວນໃຫຍ່ຂຽນຂໍ້ຄວາມສະແດງຄວາມບໍ່ພໍໃຈຕໍ່ທັງຝ່າຍທຳນຽບຂາວ ແລະ ລັດຖະສະພາສະຫະລັດ ລົງໃນຈານເຈ້ຍ ເຊິ່ງສະແດງໃຫ້ເຫັນວ່າຕະຫຼອດເວລາທີ່ຜ່ານມານັ້ນ ເຈົ້າໜ້າທີ່ຕ້ອງຖືຈານເຈ້ຍຕໍ່ແຖວຮັບອາຫານຟີຣຕາມຮ້ານອາຫານ ທີ່ເຮືອນຄົວພິເສດເພື່ອໃຫ້ບໍລິການອາຫານຟີຣແກ່ເຈົ້າໜ້າທີ່ລັດຖະບານກາງ ຜູ້ທີ່ບໍ່ໄດ້ຮັບຄ່າຕອບແທນຕະຫຼອດໄລຍະເວລາຊັດດາວ.
ຂະນະທີ່ປະທານາທິບໍດີ ໂດນັລ ທຣໍ້າ ກັບ ລັດຖະສະພາສະຫະລັດຍັງບໍ່ສາມາດອ່ອນຂໍ້ໃຫ້ກັນ ຫຼື ບັນລຸຂໍ້ຕົກລົງໃດໆໄດ້ເລີຍ ເຖິງແມ່ນວ່າພາວະຊັດດາວຈະແກ່ຍາວເວລາດົນເກີນ 1 ເດືອນແລ້ວ ເຊິ່ງສາເຫດແມ່ນມາຈາກຄວາມຂັດແຍ້ງເລື່ອງງົບປະມານໃນການສ້າງກຳແພງຊາຍແດນທາງພາກໃຕ້ລະຫວ່າງສະຫະລັດກັບເມັກຊິກ ທີ່ຕ້ອງໃຊ້ງົບປະມານສູງເຖິງ 5.700 ລ້ານໂດລາ.
ຫຼ້າສຸດ, ທ່ານ ນາງ ແນນຊີ ເປໂລຊີ ປະທານສະພາຜູ້ແທນປະຊາຊົນ ຍື່ນໜັງສືສະບັບໃໝ່ຕໍ່ຜູ້ນຳສະຫະລັດ ວ່າການຖະແຫຼງນະໂຍ ບາຍປະຈຳປີຕໍ່ລັດຖະສະພາສະຫະລັດຊຸດໃຫຍ່ທີ່ແຄປິຕໍ ຮິວ ຈະບໍ່ສາມາດເກີດຂຶ້ນໄດ້ຕາມກຳນົດການໃນວັນທີ 29 ມັງກອນ 2019ນີ້ ຫາກຜູ້ນຳສະຫະລັດບໍ່ສາມາດຢຸດຕິພາວະຊັດດາວໄດ້ກ່ອນ ແຕ່ທຣໍ້າກັບກ່າວວ່າເຂົາຈະ “ຫາທາງເລືອກອື່ນ” ເພື່ອກ່າວສຸນທໍລະພົດໃນຄັ້ງນີ້ ແຕ່ຍັງບໍ່ໄດ້ໃຫ້ຂໍ້ມູນເພີ່ມເຕີມ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews.co.th