ທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ກ່າວໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ໃນທ້າຍປີ 2018 ທີ່ຜ່ານມາວ່າ ໃນປີ 2019 ອົງການກວດສອບແຫ່ງລັດ ໄດ້ຂຶ້ນແຜນດຳເນີນການກວດສອບ ຈຳນວນ 99 ເປົ້າໝາຍ ໃນນັ້ນ, ກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ 46 ເປົ້າໝາຍ, ກວດສອບໂຄງການພັດທະນາແບບຍືນຍົງ 2 ເປົ້າໝາຍ, ໂຄງການລົງທຶນຂອງລັດຢູ່ຂັ້ນທ້ອງຖິ່ນ 6 ເປົ້າໝາຍ, ກວດສອບໂຄງການກູ້ຢືມເງິນ ແລະ ຊ່ວຍເຫຼືອລ້າ 21 ເປົ້າໝາຍ, ກວດສອບທະນາຄານລັດ 6 ເປົ້າໝາຍ ແລະ ວິສາຫະກິດລັດ 18 ເປົ້າໝາຍ.
ສຳລັບຂົງເຂດກວດສອບຄື: ກວດສອບລາຍຮັບ-ລາຍຈ່າຍງົບປະມານແຫ່ງລັດ, ໂຄງການພັດທະນາຊົນນະບົດ ແລະ ລຶບລ້າງຄວາມທຸກຍາກ, ໂຄງການພັດທະນາແບບຍືນຍົງ, ການນຳໃຊ້ທຶນໂຄງການຊ່ວຍເຫຼືອລ້າ ແລະ ກູ້ຢືມ, ການປ່ອຍສິນເຊື່ອ ແລະ ຜົນຂອງການດຳເນີນທຸລະກິດຂອງວິສາຫະກິດລັດ.
ທ່ານປະທານອົງການກວດສອບແຫ່ງລັດ ກ່າວຕື່ມອີກວ່າ: ເພື່ອຮັບປະກັນໃຫ້ແກ່ການເຄື່ອນໄຫວວຽກງານຂອງອົງການກວດສອບແຫ່ງລັດ ສຳເລັດຜົນຕາມລະດັບຄາດໝາຍ, ມີປະສິດທິພາບ – ປະສິດທິຜົນ ແລະ ປະຢັດ ທາງອົງການກວດສອບແຫ່ງລັດຈະໄດ້ສຸມໃສ່ຈັດຕັ້ງປະຕິບັດບາງມາດຕາຄື:
- ຄະນະພັກ-ຄະນະນຳ ອົງການກວດສອບແຫ່ງລັດ, ອົງການກວດສອບປະຈຳພາກ, ຄະນະແຕ່ລະຂັ້ນ ໃຫ້ຫັນເອົາທິດທາງວຽກງານຈຸດສຸມເປັນບ່ອນອີງໃນການຈັດຕັ້ງປະຕິບັດໜ້າວຽກໃຫ້ສຳເລັດຜົນ.
- ອົງການກວດສອບປະຈຳພາກ, ຫ້ອງການ, ບັນດາກົມ ແລະ ສະຖາບັນຝຶກອົບຮົມຈັດຕັ້ງການເຊື່ອມຊຶມບັນດາກົດໝາຍ, ນິຕິກຳທີ່ກ່ຽວຂ້ອງໃຫ້ເຂົ້າໃຈຢ່າງເລິກເຊິ່ງທົ່ວເຖິງ ແລະ ເພີ່ມທະວີການຕິດຕາມກວດກາ, ສະຫຼຸບຕີລາຄາ, ຖອດຖອນບົດຮຽນ ແລະ ແກ້ໄຂປັບປຸງວິທີເຮັດວຽກໃຫ້ມີຄວາມຄ່ອງຕົວ.
- ອົງການກວດສອບແຫ່ງລັດເອົາໃຈໃສ່ປະສານສົມທົບອົງການກວດສອບລັດຖະບານ, ກຳມະທິການ,ແຜນການ, ການເງິນ ແລະ ການກວດສອບ, ສະພາແຫ່ງຊາດ, ກະຊວງການເງິນ, ການຊວງແຜນການ ແລະ ການລົງທຶນ, ບັນດາກະຊວງ, ບັນດາແຂວງ – ນະຄອນຫຼວງ ໃນການຈັດຕັ້ງປະຕິບັດແຜນການກວດສອບປະຈຳປີ 2019.
- ອົງການກວດສອບປະຈຳພາກ ເອົາໃຈໃສ່ປະສານສົມທົບອົງການປົກຄອງທ້ອງຖິ່ນ, ອົງການກວດກາລັດຂັ້ນແຂວງ-ນະຄອນຫຼວງ ເພື່ອປະຕິບັດກົນໄກການປະສານງານ, ແຜນດຳເນີນກວດສອບ ແລະ ແກ້ໄຂມາດຕະການແນະນຳຜົນກວດສອບໃຫ້ເປັນຮູບປະທຳ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: laoedaily