ວາລະສານຈໍາເມືອງລາວໄດ້ເຂົ້າສຳພາດ ທ່ານ ບຸນມາ ຈັນທະວົງສາ ຜູ້ອຳນວຍການຂອງລັດວິສາຫະກິດການບິນລາວຄົນໃໝ່ ກ່ຽວກັບທິດທາງຂອງທ່ານກ່ຽວກັບການພັດທະນາສາຍການບິນລາວ.
ຢາກໃຫ້ທ່ານເລົ່າປະຫວັດຄວາມເປັນມາຂອງທ່ານໃຫ້ຟັງແນ່?
ຂ້າພະເຈົ້າສັງກັດຢູ່ການບິນແຕ່ເລີ່ມເຂົ້າຮຽນວິຊາຊີບ ຮັບໃຊ້ທະຫານອາກາດ ແຕ່ປີ 1972, ໃນໄລຍະນັ້ນ, ກໍຖືກສົ່ງໄປຮຽນຕໍ່ຢູ່ອະດີດສະຫະພາບໂຊວຽດທາງດ້ານວິສະວະກຳ ແລະ ກັບມາຮັບໃຊ້ທະຫານອາກາດ;ຈົນເຖິງທ້າຍປີ 2001 ຂ້າພະເຈົ້າໄດ້ຖືກແຕ່ງຕັ້ງໃຫ້ມາຮັບຜິດຊອບບໍລິສັດນ້ອຍໆແຫ່ງໜື່ງທີ່ລົ້ມລະລາຍແລ້ວ ຊື່ບໍລິສັດ ອາກາດລາວ (ແອຣ໌ລາວ) ເຊິ່ງເຄື່ອນໄຫວມາໄລຍະໜຶ່ງ ແຕ່ບໍ່ປະສົບຜົນສຳເລັດ, ຂ້າພະເຈົ້າໄດ້ດຳເນີນການພັດທະນາຈົນກາຍມາເປັນບໍລິສັດ ລາວເດີນອາກາດ ໃນປະຈຸບັນ.
ທ່ານເຮັດວຽກກ່ຽວກັບການບິນມາດົນປານໃດແລ້ວ?
ຂ້າພະເຈົ້າໃຊ້ຊີວິດກັບການບິນມາຕະຫຼອດໄລຍະ 40 ປີແລ້ວ.
ທ່ານຄິດວ່າຈະນໍາພາການບິນລາວໄປໃນທິດທາງໃດໃນອະນາຄົດ?
ໃນຖານະທີ່ເປັນສາຍການບິນແຫ່ງຊາດ ຂ້າພະເຈົ້າຈະສືບຕໍ່ພາລະກິດຂອງການບິນລາວຕໍ່ໄປ ຮັບໃຊ້ສັງຄົມທັງພາຍໃນປະເທດ ແລະ ຕ່າງປະເທດໃຫ້ກາຍເປັນສາຍການບິນຄົບສູດ ທີ່ມີເອກະລັກຂອງຄວາມເປັນລາວ ແລະ ສາມາດແຂ່ງຂັນ ແລະ ເຊື່ອມໂຍງກັບສາຍການບິນອື່ນໆໄດ້ ນັ້ນຄືເປົ້າໝາຍຂອງຂ້າພະເຈົ້າ.
ທ່ານນາຍົກເປັນຄົນມອບຕໍາແໜ່ງນີ້ໃຫ້ທ່ານເອງເລີຍບໍ?
ຖືກຕ້ອງແລ້ວຂ້າພະເຈົ້າຖືກທາບທາມມາກ່ອນໜ້ານີ້ເກືອບປີແລ້ວ ແຕ່ວ່າງຽບໄປ ບໍ່ມີຄວາມແນ່ນອນວ່າຈະໄດ້ມາຮັບຕໍາແໜ່ງແທ້ ຫຼື ບໍ່. ທ່ານນາຍົກມີຂໍ້ຕົກລົງອອກມາໃນວັນທີ 14/09/2018 ແລະ ມີພິທີເຊັນຮັບຕໍາແໜ່ງໃນວັນຈັນ ວັນທີ 24/09/2018 ເຮັດໃຫ້ຂ້າພະເຈົ້າຕັ້ງຕົວບໍ່ທັນ ແລະ ຕື່ນເຕັ້ນທີ່ສຸດເພາະວ່າໜ້າທີ່ປະທານຂອງສາຍການບິນລາວກໍເປັນໜ້າທີ່ໃຫຍ່ ແລະ ທ້າທາຍຫຼາຍ.
ທ່ານມີການວາງແຜນປະຕິບັດງານໃນປະຈຸບັນແນວໃດ?
ຈະຕ້ອງສືກສາຫາສາເຫດທີ່ແທ້ຈິງຂອງບັນຫາທີ່ມີຢູ່ໃນປະຈຸບັນເຊິ່ງບັນຫາຕົ້ນຕໍແມ່ນວິກິດທາງການເງິນ.ເພື່ອແກ້ໄຂບັນຫາດັ່ງກ່າວຈຶ່ງຫາວິທີຫຼຸດລາຍຈ່າຍລົງ ແລະ ເພີ່ມລາຍຮັບຂຶ້ນ, ເນັ້ນປະສິດທິພາບຂອງບຸກຄະລາກອນ, ການຈັດຕັ້ງພາຍໃນ ແລະ ລະບົບການບໍລິຫານລາຍຈ່າຍ. ສ່ວນລາຍຮັບ ແມ່ນຈະແກ້ໄຂຂອດການບໍລິການໃຫ້ມີຄຸນນະພາບດີກວ່າເກົ່າເຮັດແນວໃດໃຫ້ສາຍການບິນຢູ່ໃນໃຈຂອງຜູ້ໂດຍສານ, ຫັນຄູ່ແຂ່ງມາເປັນຄູ່ຮ່ວມມື ແລະ ຫັນວິກິດໃຫ້ເປັນໂອກາດ ໂດຍຊອກຫາຄູ່ຮ່ວມມື ແລະ ຊອກຜູ້ສະໜັບສະໜູນໃນທຸກດ້ານ.
ທ່ານຄິດວ່າຈຸດແຂງຂອງການບິນລາວນີ້ແມ່ນມີແນວໃດແນ່?
ຂ້າພະເຈົ້າຄິດວ່າ ຄວາມສາມາດຂອງການບິນລາວນີ້ມີຄວາມສາມາດບົ່ມຊ້ອນພາຍໃນຫຼາຍເຊັ່ນ: ມີພະນັກງານທີ່ມີຄວາມຮູ້, ຄວາມສາມາດ ແລະ ປະສົບການຫຼາຍ, ມີພາຫະນະທີ່ທັນສະໄໝ ແລະ ມີລະບົບ, ມີເສັ້ນບິນ, ມີມາດຕະຖານຄວາມປອດໄພລະດັບສາກົນ. ນອກນັ້ນຄົນລາວເຮົາມີເອກະລັກ ເຮົາມີຮອຍຍິ້ມທີ່ໜ້າຮັກ ສະນັ້ນ ຂ້າພະເຈົ້າຈິ່ງຄິດວ່າຈະດຶງເອົາຄວາມສາມາດນີ້ມານໍາໃຊ້ຢ່າງເຕັມທີ່ຈິ່ງຢາກຂໍໃຫ້ສັງຄົມຊ່ວຍໃນການໃຫ້ຄໍາເຫັນວ່າຢາກເຫັນສາຍການບິນລາວນີ້ແບບໃດ ແລະ ຈະເອົາຈຸດນັ້ນມາປັບປຸງ.
ໃນນາມສ່ວນຕົວ ຕາມເສັ້ນທາງທີ່ການມີລາວບິນໄປເຖິງ ສະຖານທີ່ໃດທີ່ທ່ານມັກໄປຢ້ຽມຢາມຫຼາຍທີ່ສຸດ?
ຂ້າພະເຈົ້າມັກຊຽງຂວາງເພາະເປັນບ້ານເກີດຂອງຂ້າພະເຈົ້າ ເວົ້າຄວາມຈິງວ່າຊຽງຂວາງຍັງເປັນແຂວງທີ່ຍັງບໍ່ມີການທ່ອງທ່ຽວ ແຕ່ໃນທັດສະນະຂອງຂ້າພະເຈົ້າຄິດວ່າ ຊຽງຂວາງນີ້ມີສະຖານທີ່ທ່ອງທ່ຽວຫຼາຍ ອາດຈະຫຼາຍກວ່າຫຼວງພະບາງດ້ວຍຊໍ້າ ແຕ່ວ່າຈຸດດຶງດູດການທ່ອງທ່ຽວຍັງບໍ່ໄດ້ຂຸດຄົ້ນອອກມາ ຍັງບໍ່ໄດ້ມີການໂຄສະນາ. ຊຽງຂວາງມີຈຸດເດັ່ນໜຶ່ງ ແມ່ນອາກາດດີ, ທຳມະຊາດສວຍງາມ,ມິວັດທະນະທຳທີ່ເປັນເອກະລັກຂອງຊຽງຂວາງ, ເປັນແຫຼ່ງປະຫວັດສາດ, ມີຫຼາກຫຼາຍຊົນເຜົ່າ ແລະ ອາຫານແຊບ ມີໃຫ້ເລືອກຫຼາກຫຼາຍ ສະນັ້ນການທ່ອງທ່ຽວນີ້ມີຄົບທຸກດ້ານ. ແຕ່ຖ້າເວົ້າເລື່ອງເສັ້ນທາງຕ່າງປະເທດກໍຍັງບໍ່ມີບ່ອນໃດທີ່ຂ້າພະເຈົ້າມັກເປັນພິເສດ. ແຕ່ວ່າ, ຖ້າເລືອກໄປທ່ຽວ ມັກໄປທ່ຽວທະເລຫຼາຍກວ່າ.
ຕໍ່ກັບຂໍ້ຕົກລົງຂອງລັດຖະບານລາວ ແລະ ຍີ່ປຸ່ນ ທີ່ມີຮ່ວມກັນວ່າຈະເປີດເສັ້ນບິນ ວັດໄຕ-ນາລີຕະ ແມ່ນມີຄວາມເປັນໄປໄດ້ບໍ?
ຂ້າພະເຈົ້າຄິດວ່າຈະສືບຕໍ່ຄົ້ນຄວ້າ ແລະ ສຶກສາຄວາມເປັນໄປໄດ້ຂອງການເປີດເສັ້ນບິນຈາກວຽງຈັນໄປຍີ່ປຸ່ນ ແລະ ອາດເປັນໄປໄດ້ວ່າຈະບິນຈາກ ວຽງຈັນ ໄປເມືອງ ຟຸກຸໂອກະກ່ອນ. ສ່ວນວຽງຈັນ-ນາຣິຕະ ອາດຈະເປັນໄລຍະຕໍ່ໄປ. ນອກນັ້ນ, ຄິດວ່າຈະວາງແຜນເສັ້ນບິນໄປປະເທດໃກ້ຄຽງກໍຄື ໄຕ້ຫວັນ, ຮົງກົງ ແລະ ເພີ່ມເສັ້ນບິນໃນຈີນແຜ່ນດິນໃຫຍ່, ຈະສືບຕໍ່ຮັກສາບັນດາເສັ້ນບິນຂອງການບິນລາວທີ່ມີຢູ່ໃນປະຈຸບັນ.
ທ່ານຄິດວ່າໃນອະນາຄົດຈະໄດ້ມີການຮ່ວມງານລະຫວ່າງສາຍການບິນລາວເດີນອາກາດ ແລະ ການບິນລາວຫຼາຍຂຶ້ນບໍ່?
ນີ້ເປັນຄໍາຖາມທີ່ດີຫຼາຍ ທັງສອງສາຍການບິນນີ້ເປັນລັດວິສາຫະກິດ ເປັນບໍລິສັດຂອງລັດທັງສອງ; ສະນັ້ນຂ້າພະເຈົ້າຄິດວ່າ ຈະໃຫ້ສອງບໍລິສັດນີ້ຈັບມືກັນ ແບ່ງຂົງເຂດຮັບໃຊ້ ເພາະວ່າຈຸດພິເສດຂອງລາວເດີນອາກາດ ກໍມີພາລະກິດຕ່າງຫາກ ແລະ ໃນໃກ້ໆນີ້ຂ້າພະເຈົ້າຈະຈັດກອງປະຊຸມລະຫວ່າງສອງບໍລິສັດ ເພື່ອປຶກສາຫາລືກ່ຽວກັບການຮ່ວມມືກັນໃນອະນາຄົດ.
ແຫຼ່ງຂໍ້ມູນ: ວາລະສານຈໍາປາເມືອງລາວ ສະບັບເດືອນ ພະຈິກ-ຕຸລາ 2018