ຕໍ່ສະພາບການເຕີບໂຕທາງດ້ານເສດຖະກິດຂອງປະເທດປີນີ້ຂະຫຍາຍຕົວຊ້າ ໃນກອງປະຊຸມສົນທະນາທິດທາງເສດຖະກິດຂອງ ສປປ ລາວ ໃນຫົວຂໍ້ກ່ຽວກັບບົດບາດຂອງທຸລະກິດເລີ່ມໃໝ່ ແລະ ວິສາຫະກິດຂະໜາດນ້ອຍ ແລະ ກາງ ທີ່ຈັດຂຶ້ນໃນວັນທີ 30 ຕຸລາ 2018ທີ່ຜ່ານມາ ໂດຍການເປັນປະທານຂອງທ່ານ ບົວສອນ ບຸບຜາວັນ ປະທານສະຖາບັນຄົ້ນຄວ້າເສດຖະກິດແຫ່ງຊາດ (ຄສຄຊ) ພ້ອມດ້ວຍ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ບົວສອນ ບຸບຜາວັນ ໄດ້ກ່າວວ່າ ຈາກການຕິດຕາມ ແລະ ວິເຄາະຂອງ ສະຖາບັນຄົ້ນຄວ້າເສດຖະກິດແຫ່ງຊາດ (ຄສຄຊ) ເຫັນວ່າທິດທາງເສດຖະກິດຂອງປະເທດໃນຊຸມປີຜ່ານມາ ຖືວ່າເປັນປະເທດໜຶ່ງໃນພາກພື້ນອາຊຽນທີ່ມີຈັງຫວະການຂະຫຍາຍຕົວທາງເສດຖະກິດໄວ, ລາຍໄດ້ສະເລ່ຍຕໍ່ຫົວຄົນເພີ່ມຂຶ້ນຢ່າງຕໍ່ເນື່ອງ. ແຕ່ສຳລັບປີ 2018 ນີ້ ປະເທດເຮົາໄດ້ປະສົບກັບຄວາມຫຍຸ້ງຍາກທາງດ້ານການເງິນ – ງົບປະມານ, ຊ້ຳພັດຖືກໄພນ້ຳຖ້ວມເກືອບທຸກແຂວງ ອັນໄດ້ສ້າງຜົນກະທົບຕໍ່ການຜະລິດກະສິກຳ ແລະ ຊີວິດການເປັນຢູ່ຂອງຊາວກະສິກອນ.

• ຄາດຄະເນການຜະລິດກະສິກຳ ແລະ ປ່າໄມ້ໃນປີ 2018 ຈະມີການເຕີບໂຕແຕ່ 2,5% ເຊິ່ງຫຼຸດຈາກປີ 2017 ທີ່ມີການເຕີບໂຕ 2,9% ແລະ ມະຕິສະພາ 2,8%;
• ການຜະລິດອຸດສາຫະກຳໃນຂະແໜງໄຟຟ້າ, ບໍ່ແຮ່ມີການຂະຫຍາຍຕົວ 7,7% ເຊິ່ງຫຼຸດລົງຈາກປີ 2017 ທີ່ມີການຂະຫຍາຍຕົວ 11,6% ແບະ ມະຕິສະພາ 9,1%;
• ຂະແໜງບໍລິການມີການຂະຫຍາຍຕົວ 7,6% ເພີ່ມຂຶ້ນກວ່າປີ 2017 ທີ່ມີຫຍາຍຕົວພຽງ 4,4% ແລະ ມະຕິສະພາ 6,4%.

ໂດຍລວມແລ້ວອັດຕາການເພີ່ມຂອງ GDP ຄາດວ່າຈະບັນລຸໄດ້ແຕ່ 6,5% ເທົ່ານັ້ນ, ລາຍໄດ້ສະເລ່ຍຕໍ່ຫົວຄົນໄດ້ 2.599 ໂດລາ (ມະຕິສະພາ 2.536ໂດລາ), GNI ເທົ່າກັບ 2.209 ໂດລາ (ມະຕິສະພາ 2.004ໂດລາ) ຍ້ອນການເຕີບໂຕຫຼຸດລົງ ຈິ່ງມີຜົນກະທົບຕໍ່ການປະຕິບັດແຜນລາຍຮັບ ແລະ ລາຍຈ່າຍງົບປະມານ ກໍ່ຄືການປະຕິບັດແຜນການລົງທຶນຂອງລັດ, ການຊຳລະໜີ້ສິນ ແລະ ອື່ນໆ.

ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: ໜັງສືພິມເສດຖະກິດ-ການຄ້າ