ເວັບໄຊ shanghai.ist ໄດ້ລາຍງານວ່າ ເມືອງເສິງຕູ ເມືອງສຳຄັນ ທີ່ຕັ້ງໃນມົນທົນເສສວນ ທາງພາກຕະເວັນຕົກສ່ຽງໃຕ້ຂອງປະເທດ ກຽມຄິດຄົ້ນສ້າງເດືອນປອມຂຶ້ນມາ ເພື່ອໃຊ້ປະໂຫຍດໃນການເປັນແສງສະຫວ່າງສ່ອງທາງໃນຕອນກາງຄືນ ແທນການໃຊ້ໄຟຟ້າ ໂດຍລາຍງານເຜີຍວ່າ ໂຄງການນີ້ໄດ້ຮັບການເປີດເຜີຍຈາກ ທ່ານ ຫວູ ຊ່ານເຟິງ ປະທານບໍລິສັດ ວິທະຍາສາດ ແລະ ເທັກໂນໂລຍີການບິນ ແລະ ອາວະກາດເສິງຕູ (Chengdu Aerospace Science and Technology Microelectronics) ທີ່ເຄີຍເວົ້າໄວ້ໃນການປະຊຸມນະວັດຕະກຳ ແລະ ການເປັນຜູ້ປະກອບການໃນເສິງຕູເມື່ອອາທິດທີ່ຜ່ານມາ.
ເດືອນປອມດັ່ງກ່າວ ຈະຖືກສົ່ງໄປອາວະກາດ ເພື່ອສ່ອງແສງລົງມາ ຫຼັງຈາກມີການຄຳນວນແລ້ວວ່າ ຂະໜາດດວງເດືອນທີ່ມີເສັ້ນຜ່ານສູນກາງ 10 ເຖິງ 80 ກິໂລເມັດ ແລະ ສາມາດໃຫ້ຄວາມສະຫວ່າງກວ່າເດືອນແທ້ເຖິງ 8 ເທົ່າ, ທ່ານ ຫວູ ຍັງລະບຸວ່າ ແສງສະຫວ່າງທີ່ສ່ອງລົງມານີ້ຈະບໍ່ລົບກວນທຳມະຊາດຂອງສິ່ງທີ່ມີຊີວິດອື່ນໆທັງພືດ ແລະ ສັດ.
ທັງນີ້, ໂຄງການດັ່ງກ່າວເປັນພຽງແນວຄິດ ແລະ ຄາດວ່າ ໃນປີ 2020 ຈະມີການເປີດຕົວຢ່າງເປັນທາງການ ເຊິ່ງຫາກສ້າງສຳເລັດແທ້ຈະຊ່ວຍໃຫ້ປະຢັດຄ່າໄຟຟ້າຂອງເມືອງໃນແຕ່ລະເດືອນໄດ້ຫຼາຍເທົ່າ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: news.mthai.com, posttoday
ຮູບປະກອບ: posttoday