ເວັບໄຊຂ່າວໜັງສືພິມວຽງຈັນໃໝ່ລາຍງານເມື່ອວັນທີ 29 ສິງຫາ 2018ວ່າ ໃນທ້າຍອາທິດທີ່ຜ່ານມາກະຊວງການເງິນ ຈັດກອງປະຊຸມປະກອບຄຳເຫັນໃສ່ຮ່າງແນະນຳກ່ຽວກັບການຈັດຕັ້ງປະຕິບັດລາຍຈ່າຍເງິນເດືອນ ເງິນອຸດໜູນ ແລະ ເງິນນະໂຍບາຍ ໃຫ້ພະນັກງານ-ລັດຖະກອນຜ່ານລະບົບທະນາຄານ ໂດຍເປັນປະທານຂອງທ່ານ ບຸນເຫຼືອ ສິນໄຊວໍຣະວົງ ຫົວໜ້າກົມນະໂຍບາຍການເງິນ ແລະ ນິຕິກຳ ມີທ່ານນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນເຫຼືອ ສິນໄຊວໍຣະວົງ ໄດ້ກ່າວວ່າ ຈຸດປະສົງຂອງກອງປະຊຸມຄັ້ງນີ້ ເພື່ອປະກອບຄຳເຫັນໃສ່ຮ່າງແນະນຳກ່ຽວກັບການຈັດຕັ້ງປະຕິບັດລາຍຈ່າຍເງິນເດືອນ ເງິນອຸດໜູນ ແລະ ເງິນນະໂຍບາຍ ໃຫ້ພະນັກງານ-ລັດຖະກອນ ຜ່ານລະບົບທະນາຄານ ເພື່ອຄວາມເປັນເອກະພາບໃນການເບີກຈ່າຍເງິນດັ່ງກ່າວ ໃນແຕ່ລະເດືອນໃນຂອບເຂດທົ່ວປະເທດ.
ຮ່າງແນະນຳກ່ຽວກັບການຈັດຕັ້ງປະຕິບັດລາຍຈ່າຍເງິນເດືອນ ເງິນອຸດໜູນ ແລະ ເງິນນະໂຍບາຍໃຫ້ພະນັກງານ-ລັດຖະກອນຜ່ານລະບົບທະນາຄານ ໄດ້ແບ່ງຄວາມຮັບຜິດຊອບໃນການຈັດຕັ້ງປະຕິບັດຄື: ບັນດາຫົວໜ່ວຍງົບປະມານຂັ້ນສູນກາງ ແລະ ທ້ອງຖິ່ນ ປະກອບເອກະສານບັນຊີຈຳນວນພົນ ຊັ້ນ-ຂັ້ນເງິນເດືອນ ການອຸດໜູນຂອງພະນັກງານ-ລັດຖະກອນ ສົ່ງຫາກະຊວງພາຍໃນ ຫຼື ຂະແໜງພາຍໃນຂັ້ນທ້ອງຖິ່ນຂອງງວດຕໍ່ໄປບໍ່ໃຫ້ກາຍວັນທີ 15 ຂອງເດືອນສຸດທ້າຍໃນແຕ່ລະງວດ ເອກະສານລາຍຈ່າຍເງິນເດືອນ ເງິນອຸດໜູນ ເງິນນະໂຍບາຍ ສົ່ງຫາກົມງົບປະມານແຫ່ງລັດ ຫຼື ຂະແໜງງົບປະມານແຫ່ງລັດຂັ້ນທ້ອງຖິ່ນ ເພື່ອຄົ້ນຄວ້າອະນຸມັດລາຍຈ່າຍຂອງງວດຕໍ່ໄປບໍ່ໃຫ້ກາຍວັນທີ 30 ຂອງເດືອນສຸດທ້າຍໃນແຕ່ລະງວດ ແລະ ໃບຖອນເງິນສົ່ງຫາຄັງເງິນແຫ່ງຊາດ ຫຼື ຄັງເງິນແຫ່ງຊາດປະຈຳທ້ອງຖິ່ນ ເພື່ອກວດກາຄວາມຖືກຕ້ອງບໍ່ໃຫ້ກາຍວັນທີ 15 ຂອງແຕ່ລະເດືອນ.
ສ່ວນກະຊວງພາຍໃນ ຫຼື ຂະແໜງພາຍໃນຂັ້ນທ້ອງຖິ່ນ ກວດກາ ແລະ ຢັ້ງຢືນເອກະສານບັນຊີຈຳນວນພົນ ຊັ້ນ-ຂັ້ນເງິນເດືອນ ການອຸດໜູນຂອງຫົວໜ່ວຍງົບປະມານຂອງງວດຕໍ່ໄປບໍ່ໃຫ້ກາຍວັນທີ 20 ຂອງເດືອນສຸດທ້າຍແຕ່ລະງວດ ກົມງົບປະມານແຫ່ງລັດ ຫຼື ຂະແໜງງົບປະມານແຫ່ງລັດຂັ້ນທ້ອງຖິ່ນ ກວດກາ ແລະ ອະນຸມັດລາຍຈ່າຍເງິນເດືອນ ເງິນອຸດໜູນ ເງິນນະໂຍບາຍໃຫ້ບັນດາຫົວໜ່ວຍງົບປະມານ ບໍ່ໃຫ້ກາຍວັນທີ 10 ຂອງເດືອນທຳອິດໃນງວດທີ່ປະຕິບັດລາຍຈ່າຍ ແລະ ຄັງເງິນແຫ່ງຊາດ ຫຼື ຄັງເງິນແຫ່ງຊາດປະຈຳທ້ອງຖິ່ນ ກວດກາເອກະສານລາຍຈ່າຍເງິນເດືອນ ເງິນອຸດໜູນ ເງິນນະໂຍບາຍຂອງຫົວໜ່ວຍງົບປະມານບໍ່ໃຫ້ກາຍວັນທີ 20 ຂອງແຕ່ລະເດືອນ ແລະ ສົ່ງເອກະສານລາຍຈ່າຍເງິນເດືອນ ເງິນອຸດໜູນ ເງິນນະໂຍບາຍໄປຈ່າຍຢູ່ທະນາຄານເປັນແຕ່ລະວັນ ເຊິ່ງເລີ່ມແຕ່ວັນທີ 24-30 ຂອງແຕ່ລະເດືອນ ແລະ ທະນາຄານຜູ້ໃຫ້ບໍລິການຕ້ອງໂອນເງິນເດືອນເຂົ້າບັນຊີເງິນຝາກຂອງພະນັກງານ-ລັດຖະກອນ ໃນລະຫວ່າງວັນທີ 25-30 ຂອງແຕ່ລະເດືອນ ທັງນີ້ ເພື່ອຄວາມເປັນເອກະພາບໃນການເບີກຈ່າຍເງິນເດືອນ ເງິນອຸດໜູນ ແລະ ເງິນນະໂຍບາຍໃຫ້ພະນັກງານ-ລັດຖະກອນຜ່ານລະບົບທະນາຄານໃນຂອບເຂດທົ່ວປະເທດ.
ແຫລ່ງຂ່າວ: www.vientianemai.net