ປັດຈຸບັນ, ນະຄອນຫຼວງວຽງຈັນກໍາລັງເລັ່ງປັບປຸງບ່ອນນັ່ງລໍຖ້າລົດເມຢູ່ຕາມເສັ້ນທາງຕ່າງໆຕື່ມອີກ 105 ຈຸດ, ພາຍຫຼັງໄດ້ລົງມືສໍາເລັດແລ້ວກວ່າ 60 ກວ່າຈຸດ ເພື່ອເປັນການຮອງຮັບປີທ່ອງທ່ຽວລາວ.
ໃນໂອກາດເປີດການນໍາໃຊ້ສາລາບ່ອນນັ່ງລໍຖ້າລົດເມ ແລະ ການສະໜັບສະໜູນປີທ່ອງທ່ຽວລາວເມື່ອບໍ່ດົນຜ່ານມານີ້້, ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ໃຫ້ຮູ້ວ່າ: ໂຄງການກໍ່ສ້າງບ່ອນນັ້ງລໍຖ້າລົດເມ ໄດ້ເລີ່ມເຮັດການສໍາຫຼວດ ແລະ ເຮັດການກໍ່ສ້າງ ມາແຕ່ຕົ້ນປີ 2017 ໂດຍບໍລິສັດ ບລຸກ ຣາດ໌ ດີຊາຍ ກຣຸບ ຈໍາກັດຜູ້ດຽວ ເປັນຜູ້ຮັບຜິດຊອບຄ່າໃຊ້ຈ່າຍທັງໝົດໃນການກໍ່ສ້າງ ແລະ ເປັນການຊ່ວຍເຫຼືອລ້າໃຫ້ແກ່ລັດຖະບານ ໂດຍໂຄງການດັ່ງກ່າວ ໄດ້ຖືກຕິດຕາມ ແລະ ກວດກາ ຈາກອົງການປົກຄອງນະຄອນຫຼວງວຽງຈັນ,ພະແນກ, ຍທຂ, ລັດວິສາຫະກິດລົດເມ ແລະ ອົງການ JICA ເພື່ອແນໃສ່ສ້າງຄວາມສະດວກໃຫ້ແກ່ຜູ້ໃຊ້ບໍລິການລົດເມຕາມເສັ້ນທາງຫຼວງໄດ້ມີບ່ອນນັ່ງລໍຖ້າ ເປັນທີ່ຮຽບຮ້ອຍ ແລະ ສ້າງໂສມໜ້າໃໝ່ໃຫ້ແກ່ຕົວເມືອງ.
ຜູ້ຮັບຜິດຊອບໂຄງການດັ່ງກ່າວ, ໃຫ້ຮູ້ວ່າ: ໃນປີຜ່ານມາ ໄດ້ນໍາເຂົ້າສາລາບ່ອນນັ່ງລໍຖ້າລົດເມທັງໝົດ 60 ຊຸດ ແລະ ປ້າຍຈອດລົດເມ 100 ປ້າຍ, ປັດຈຸບັນໄດ້ກໍ່ສ້າງສໍາເລັດແລ້ວ 60 ຈຸດ ຕາມເສັ້ນທາງຕະຫຼາດເຊົ້າ-ວັດໄຕ, ຕະຫຼາດເຊົ້າ-ດົງໂດກ, ຕະຫຼາດເຊົ້າ-ທ່າເດື່ອ ແລະ ເສັ້ນທາງອື່ນໆ ລວມມູນຄ່າ 4 ຕື້ກວ່າກີບ, ໃນປີນີ້ ຈະເລັ່ງໃຫ້ສໍາເລັດໃຫ້ຄົບຕາມ 105 ຈຸດ ແລະ ຕິດປ້າຍ ຈອດລົດເມຕາມຄໍາແນະນໍາຂອງອົງການ JICA. ພ້ອມດຽວກັນນັ້ນ ຍັງໄດ້ມີການຕິດປ້າຍຄໍາຂວັນໂຄສະນາ ປະຊາສໍາພັນປີທ່ອງທ່ຽວລາວ 2018 ຕາມເສັ້ນທາງ ແລະ ຈຸດບ່ອນັ່ງລໍຖ້າລົດເມໃຫ້ແກ່ມວນຊົນ ແລະ ນັກທ່ອງທ່ຽວໄດ້ຮັບຮູ້ເຂົ້າໃຈ.
ແຫລ່ງຂ່າວ : ໜັງສືພິມລາວພັດທະນາ ແລະ muan.la