ສຸດຍອດໄອເດຍ! ນັກຮຽນຈາກໂຮງຮຽນສວນບຸນໂຍປະຖຳ (ປະເທດໄທ) ອອກແບບ “ຝາບາດຕິດຈີພີເອສ” ເພ່ືອໃຫ້ປະຊາຊົນຜູ້ທີ່ຖ້າໃສ່ບາດຕອນເຊົ້າສາມາດຮູ້ເສັ້ນທາງພຣະອອກບິນພະບາດ.
ເຟສບຸ໊ກ Origimon ໄດ້ເປີດເຜີຍຜົນງານຂອງນັກຮຽນທີ່ຊະນະການປະກວດນະວັດຕະກຳພາຍໃຕ້ໂຄງການແຂ່ງຂັນເຕັກນິກການພັດທະນາທັກສະດ້ານວິສະວະກຳແຫ່ງຊາດ ທີ່ຈັດຂຶ້ນໂດຍ ສວທຊ. ເຊິ່ງໜ່ຶງໃນນັ້ນເປັນຜົນງານຂອງ ທີມຈາກໂຮງຮຽນສວນບຸນໂຍປະຖຳ ຈັງຫວັດລຳພູນ ທີ່ຊະນະໃນສາຂາຟື້ນຟູວິຖີຊຸມຊົົນ ດ້ວຍຜົນງານ “ຕັກບາດເຕີມບຸນ”
ຝາບາດຈີພີເອສນີ້ຈະຄອຍຕິດຕາມຕຳແໜ່ງເສັ້ນທາງຂອງພຣະທີ່ອອກມາບິນພະບາດໃນຕອນເຊົ້າ ເພື່ອໃຫ້ບັນດາພໍ່ອອກແມ່ອອກທີ່ລໍຖ້າໃສ່ບາດຮູ້ໄດ້ວ່າພຣະກຳລັງຍ່າງຮອດເສັ້ນທາງໃດແລ້ວ.
ຝາບາດຖືກອອກແບບ ແລະ ພິມດ້ວຍເຄ່ືອງ 3D Printer ມາທົດແທນຝາບາດແບບເກົ່າ ແລະ ມີການຈັດອົງປະກອບຂອງຝາແບບທີ່ສາມາດຖອດອອກມາລ້າງໄດ້ ພ້ອມຍັງໃຊ້ເສັ້ນພລາສຕິກທີ່ໃຊ້ກັບອາຫານໄດ້ອີກດ້ວຍ. ນອກຈາກນີ້, ຍັງມີແອັຟສຳລັບຕິດຕາມທີ່ໃຊ້ໄດ້ຢ່າງງ່າຍດາຍ.
ຮຽບຮຽງຂ່າວ: ພຸດສະດີ