spot_img
Homeຂໍ້ມູນກ່ຽວກັບປະເທດລາວປະຫວັດສາດລາວ“ຄວາມເປັນມາຂອງບຸນປີໃໝ່ລາວ ຫຼື ຫຼາຍຄົນເອີ້ນວ່າ ກຸດສົງການ”

“ຄວາມເປັນມາຂອງບຸນປີໃໝ່ລາວ ຫຼື ຫຼາຍຄົນເອີ້ນວ່າ ກຸດສົງການ”

Published on

6635

“ຄວາມເປັນມາຂອງບຸນປີໃໝ່ລາວ ຫຼື ຫຼາຍຄົນເອີ້ນວ່າ ກຸດສົງການ”
ພໍແຕ່ຮອດຍາມເດືອນສີ່ຕໍ່ໃສ່ເດືອນຫ້າລ່ວງເຂົ້າມາເຖິງ (ຫມາຍເຖິງເດືອນລາວ) ກໍ່ພໍດີແມ່ນໄລຍະແຫ່ງການກະກຽມເພື່ອສະເຫລີມສະຫລອງສົ່ງທ້າຍປີເກົ່າ ແລະຕ້ອນ ຮັບປີໃຫມ່ລາວ( ສົ່ງ ພ.ສ ເກົ່າ ຕ້ອນຮັບ ພ.ສ ໃຫມ່) ເຊິ່ງເປັນວັນແຫ່ງການໄຂສັງກາດໃຫມ່ວັນຂຶ້ນປີໃຫມ່ ຫຼື ບາງທ້ອງຖິ່ນມັກນິຍົມເອີ້ນວ່າ: ກຸດສົງການ. ເຊິ່ງເລີ່ມແຕ່ວັນທີ 13-15 ຫລື 16 ຂອງເດືອນເມສາໃນທຸກໆປີ. ຄຳວ່າ “ກຸດ” ສົງການໃນທີ່ນີ້ກໍຄືຫມາຍເຖິງການຂາດ ຫຼື ສິ້ນໄປຂອງວັນເດືອນປີເກົ່າຫລືຂາດຈາກປີເກົ່າ ແລ້ວຕໍ່ໃສ່ປີໃຫມ່ຈິ່ງເອີ້ນວ່າ ປີໃຫມ່ນັ້ນເອງ. ຕາມປະຫວັດ ຫລື ປະເພນີຂອງວັນຂຶ້ນປືໃຫມ່ໄດ້ມີການກ່າວໄວ້ດັ່ງນີ້: ກ່ອນຫນ້ານີ້ຫລາຍພັນປີຜ່ານມາແລ້ວ ໄດ້ມີບູລຸດຜູ້ຍິ່ງໃຫຍ່ທ່ານຫນຶ່ງເຊິ່ງມີນາມວ່າ: ທ້າວ ທຳມະບານກຸມມານ ເປັນຄົນທີ່ມີສະຕິປັນຍາທີ່ແຫລມຄົມສະຫລຽວສະຫລາດ ແລະ ມີໄຫວພິບປະຕິພານທີ່ສູງສົ່ງສາມາດຮຽນຮູ້ຈົບໄຕເພດ (ຮູ້ໂລກທັງສາມຄືມະນຸດສະໂລກ, ເທວາໂລກ ແລະ ພົມມະໂລກ), ນອກຈາກນັ້ນ ກໍຍັງເປັນຜູ້ຮູ້ພາສາສັດນຳອີກ. ເມື່ອຄວາມເກັ່ງກ້າສາມາດຂອງບູລຸດທ່ານນີ້ຊ່າລືໄປຮອດໄປເຖິງຫູຂອງພະຍາກະບິນ ລະພົມ (ຜູ້ເປັນໃຫຍ່ກ່ວາພົມທັງຫລາຍ) ກໍເກີດມີແນວຄິດຢາກລົງມາທົດສອບ ຫລື ທົດລອງເບິ່ງສະຕິປັນຍາຂອງ ທ້າວທຳມະບານ ກຸມມານ, ຢູ່ມາວັນຫນຶ່ງພະຍາກະບິນລະພົມຈິ່ງຕັດສິນໃຈລົງມາເພື່ອທົດລອງເບິ່ງສະຕິປັນຍາຂອງທ້າວທຳມະບານກຸມມານ, ຝ່າຍພະຍາກະບິນລະພົມໄດ້ຍື່ນຄຳຂາດເປັນຄຳຖາມປິດສະຫນາ 3 ຂໍ້ເພື່ອໃຫ້ ເປັນໂຈດແກ່ທ້າວທຳມະບານກຸມມານຄຳຖາມ 3 ຂໍ້ມີດັ່ງນີ້:

1. ຕອນເຊົ້າລາສີຂອງຄົນຢູ່ໃສ?
2. ຕອນສວາຍລາສີຂອງຄົນຢູ່ໃສ?
3. ຕອນຄໍ່າລາສີຂອງຄົນຢູ່ໃສ?

ຕໍ່ຄຳຖາມທັງ 3 ຂໍ້ນີ້ແມ່ນໃຫ້ເວລາໃນການຄົ້ນຄິດພິຈາລະນາ 7 ວັນ ຈິ່ງລົງມາຫາຄຳຕອບ, ແຕ່ຝ່າຍພະຍາກະບິນລະພົມໄດ້ຕັ້ງເດີມພັນໄວ້ວ່າ: ຖ້າຕອບບໍ່ໄດ້ແມ່ນໃຫ້ຕັດຄໍ ແລະ ຖ້າຕອບຖືກຕົນເອງກໍຂໍຍອມຕັດຄໍເຊັ່ນກັນ. ໃນເມື່ອພະຍາກະບິນລະພົມກັບໄປແລ້ວ, ບັນຫາ ດັ່ງກ່າວໄດ້ສ້າງຄວາມຫນັກອົກຫນັກໃຈໃຫ້ແກ່ທ້າວທຳມະບານກຸມມານຢ່າງມະຫາສານຢູ່ມາຮອດມື້ທີ 6 ກໍຍັງຫາຄຳຕອບບໍ່ໄດ້ ທ້າວຈິ່ງ ຕັດສິນໃຈຍ່າງຫນີອອກຈາກບ້ານ ເພື່ອໄປຕາຍເອົາດາບຫນ້າດີກ່ວາ, ດ້ວຍຄວາມອິດເມື່ອໂຮຍແຮງໃນການເດີນທາງຫມົດມື້ ທ້າວຈິ່ງເຂົ້າໄປພັກຜ່ອນຫລັບນອນຢູ່ກ້ອງຮົ່ມຕົ້ນຕານຕົ້ນຫນຶ່ງຢູ່ແຄມທາງ. ພໍໄກ້ຮອດຍາມອະລຸນວັນໃຫມ່ມາເຖິງທ້າວທຳມະບານກຸມມານໄດ້ຍິນສຽງຂອງນົກອິນຊີສອງຜົວເມຍທີ່ນອນຢູ່ເທິງປາຍຕົ້ນຕານ ນັ້ນລົມກັນວ່າ: ມື້ອື່ນເຊົ້າພວກເຮົາ ຈະໄປຫາກິນຢູ່ທາງໃດ, ນົກອິນຊີໂຕຜົວຕອບເມຍວ່າ: ບໍ່ຍາກມື້ອື່ນເຮົາຈະໄດ້ກິນຊີ້ນ ແລະ ເລືອດຂອງ ທ້າວ ທຳມະບານ ກຸມມານ ຢ່າງແນ່ນອນ. ເພາະວ່າລາວຕອບບັນຫາຂອງພະຍາກະບິນລະພົມບໍ່ໄດ້. ອິນຊີໂຕເມຍຖາມ ຜົວວ່າບັນຫານັ້ນມີຫຍັງແດ່ເຈົ້າຕອບໄດ້ບໍ? ຝ່າຍຜົວວ່າຕອບໄດ້, ບັນຫາມີດັ່ງນີ້:

1. ຕອນເຊົ້າລາສີຂອງຄົນແມ່ນຢູ່ໃບຫນ້າດັ່ງ ນັ້ນຕື່ນ ນອນມາຄົນຈິ່ງມັກລ້າງຫນ້າເພື່ອ ໃຫ້ສະອາດແລະມີລາສີງົດງາມ.
2. ຕອນສວາຍລາສີຂອງຄົນແມ່ນຢູ່ໃນຫນ້າເອິກ, ດັ່ງນັ້ນຄົນຈິ່ງມັກເອົານ້ຳລ້າງຫນ້າເອິກ.
3. ຕອນຄໍ່າລາສີຂອງຄົນແມ່ນຢູ່ຕີນດັ່ງນັ້ນຄົນຈິ່ງມັກລ້າງຕີນແລ້ວຈິ່ງເຂົ້ານອນ, ທັງນີ້ ກໍເພື່ອຄວາມສະອາດ ແລະ ຫ່າງໄກຈາກພະຍາດໂລຄາ.
ເມື່ອທ້າວທຳມະບານກຸມມານທີ່ນອນຢູ່ໃນກ້ອງຮົ່ມຕານໄດ້ຮູ້ຄວາມ ຈິ່ງທຸກຢ່າງຈາກນົກອິນຊີທັງສອງຜົວ-ເມຍຄືແນວນັ້ນກໍ່ມີຄວາມຕື່ນເຕັ້ນ, ດີອົກດີໃຈ ແລະ ຟ້າວຟັ່ງ ກັບຄືນເມືອບ້ານດ້ວຍຄວາມປື້ມປິຕິ, ພໍຮອດເວລານັດຫມາຍພະຍາກະບິນລະພົມກໍລົງມາຕາມສັນຍາ ແລະ ທ້າວ ທຳມະບານ ກຸມມານ ກໍ່ສາມາດຕອບໄດ້ໝົດ ທຸກຂໍ້ ແລະ ຖືກກັບຄວາມຈິງ. ດັ່ງນັ້ນ ທັງພະຍາກະບິນລະພົມຈິ່ງຍິນຍອມຕັດຄໍຕົນເອງເພື່ອເປັນການຖວາຍບູຊາໃນພູມປັນຍາ ຂອງທ້າວທຳມະບານກຸມມານ, ດັ່ງນັ້ນ ພະຍາກະບິນລະພົມຈິ່ງເອີ້ນລູກສາວທັງ 7 ຄົນມາຫາ ແລ້ວສັ່ງໃຫ້ເອົາພາພານທອງ ຄຳມາຮອງຮັບເອົາຫົວຂອງພໍ່ເພື່ອເອົາໄປໄວ້ໃນຖ້ຳພູເຂົາໄກລາດ, ເພາະຫົວຂອງພະຍາກະບິນລະພົມຖ້າຕົກໃສ່ນ້ຳ, ອາກາດ, ແຜ່ນດິນກໍຈະເປັນພິດເປັນໄພສົ່ງຜົນອັນຕະລາຍຕໍ່ມວນມະນຸດ, ໃນແຕ່ລະປີໃຫ້ລູກສາວທັງ 7 ຄົນພັດປ່ຽນກັນເອົາຫົວຂອງພໍ່, ຂີ່ເທິງຫລັງສັດອອກມາຈາກຖ້ຳພູເຂົາໄກລາດເພື່ອມາຫົດສົງ.

ໂດຍ: Bounsuay

ແຫລ່ງຂ່າວຈາກ: ພັດທະນາລາວ

ບົດຄວາມຫຼ້າສຸດ

ມີໃຜຊື່ຍາວກວ່ານີ້ບໍ່? ຊາຍຊາວນິວຊີແລນມີຊື່ຍາວທີ່ສຸດໃນໂລກ ໃຊ້ເວລາອ່ານ 20 ນາທີ ຈຶ່ງອ່ານແລ້ວ

ມາຮູ້ຈັກກັບຊາຍຜູ້ທີ່ມີຊື່ທີ່ຍາວທີ່ສຸດໃນໂລກ, ລໍເລນ ວອດກິນ (Laurence Watkins) ອາຍຸ 60 ປີ, ອາໄສຢູ່ເມືອງໂອດແລນ ປະເທດນິວຊີແລນ ລາວມີຈໍານວນຊື່ຍາວເຖິງ 2,253 ຄໍາ. ຜ່ານມາຊາຍຄົນນີ້ຫຼົງໄຫຼໃນລາຍການ Ripley's...

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄຂຂຶ້ນຢ່າງເປັນທາງການ

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ເປີດຂຶ້ນໃນວັນທີ 21 -...

ກຳນົດຈັດງານ 5 ວັນ ບຸນນະມັດສະການພຣະທາດຫຼວງວຽງຈັນ ຈະຈັດຂຶ້ນໃນລະຫວ່າງວັນທີ 1-5 ພະຈິກ 2025

ໃນວັນທີ 21 ຕຸລາ 2025 ພິທີຖະແຫຼງຂ່າວ ງານປະເພນີບຸນນະມັດສະການ ພຣະທາດຫຼວງ ແລະ ງານວາງສະແດງສິນຄ້າ ປະຈຳປີ ຄສ 2025 ຈັດຂຶ້ນ ທີ່ເດີ່ນພຣະທາດຫຼວງວຽງຈັນ...

ຍີ່ປຸ່ນ ຊ່ວຍເຫຼືອລ້າໂຄງການເກັບກູ້ລະເບີດບໍ່ທັນແຕກ ຢູ່ແຂວງ ຈຳປາສັກ ສາລະວັນ ແລະ ເຊກອງ ມູນຄ່າ 4,5 ລ້ານໂດລາສະຫະລັດ

ລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອວຽກງານ ລບຕ ຢູ່ພາກໃຕ້ຂອງລາວ ໃນວັນທີ 20 ຕຸລາ 2025 ທີ່ນະຄອນຫຼວງວຽງຈັນ ສປປ ລາວ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດຍີ່ປຸ່ນ ປະຈໍາລາວ ໄດ້ຈັດພິທີລົງນາມເອກະ...