ພິທີລົງນາມສັນຍາການຮ່ວມມືໂຄງການພັດທະນາ ແລະ ສົ່ງເສີມການທ່ອງທ່ຽວ ແລະ ໂຄງການຜະລິດ-ຕິດຕັ້ງປ້າຍປະຫວັດ ຮູບພາບ ຂໍ້ມູນສະຖານທີ່ທ່ອງທ່ຽວໃນ ສປປ ລາວ ໄດ້ມີຂຶ້ນວັນທີ 3 ພຶດສະພາ 2013 ຢູ່ໂຮງແຮມນະຄອນສັກ ລະຫວ່າງທ່ານ ວີລະສານ ຄຳດາລານິກອນ ປະທານຄະນະກຳມະການບໍລິຫານມູນນິທິລາວພັດທະນາຜາສຸກ ແລະ ທ່ານ ສະຖາພອນ ວັດທະນາສິຣິນຸກຸນ ປະທານບໍລິສັດ SW Holding Group ໂດຍຊ້ອງໜ້າທ່ານ ຄຳໃສ ສຸລິນທອນ ປະທານໃຫຍ່ມູນນິທິລາວພັດທະນາຜາສຸກ ທ່ານ ທົມ ມີສິຣິ ຜູ້ປະສານງານຝ່າຍຕ່າງປະເທດບໍລິສັດ SW Holding Group ແລະ ແຂກຖືກເຊີນ.
ທ່ານ ຄຳໃສ ສຸລິນທອນ ໄດ້ກ່າວວ່າ: ການລົງນາມຄັ້ງນີ້ເປັນການເລີ່ມຕົ້ນການຮ່ວມມືລະຫວ່າງມູນນິທິລາວພັດທະນາຜາສຸກ ກັບບໍລິສັດ SW Holding Group ປະເທດໄທຈຳກັດ ເພື່ອຮ່ວມກັນພັດທະນາ ແລະ ສົ່ງເສີມການທ່ອງທ່ຽວ ໂດຍໄລຍະເລີ່ມຕົ້ນຈະເນັ້ນໃສ່ການຕິດຕັ້ງປ້າຍໂຄສະນາ ເຊິ່ງແຂວງຈະເປັນຜູ້ກຳນົດທີ່ຕັ້ງຂອງປ້າຍໃຫ້ ພ້ອມທັງໃຫ້ປະຫວັດ ແລະ ຂໍ້ມູນຕ່າງໆຂອງແຫຼງທ່ອງທ່ຽວ ຈາກນັ້ນ ກໍຈະໄດ້ຜ່ານອົງການທ່ອງທ່ຽວແຫ່ງຊາດ ຈຶ່ງຈະສາມາດຕິດຕັ້ງໄດ້ການສຳປະທານຕິດຕັ້ງປ້າຍໂຄສະນານີ້ແມ່ນມູນນິທິລາວພັດທະນາຜາສຸກເປັນຜູ້ໄດ້ຮັບສິດ ແລະ ໄດ້ຮ່ວມກັບບໍລິສັດພາຍໃນມາແລ້ວ 2-3 ປີ ເຫັນວ່າພົບຄວາມຫຍຸ້ງຍາກຫຼາຍທາງດ້ານທຶນຮອນ ແລະ ການຕະຫຼາດ ເພາະວ່າການທີ່ເຮົາສ້າງປ້າຍຂຶ້ນ ກໍຄືກັບໜ້າໜັງສືພິມ ນອກຈາກຈະໃສ່ຂໍ້ມູນຕ່າງໆຂອງແຫຼ່ງທ່ອງທ່ຽວແລ້ວ ພວກເຮົາກໍຈະແບ່ງພື້ນທີ່ໄວ້ໃຫ້ບໍລິສັດມາໂຄສະນາໃນປ້າຍ ແລະ ຈະເກັບຄ່າຈາກການໂຄສະນານັ້ນມາຈ່າຍຄ່າບໍລິການ ດັ່ງນັ້ນ ການຮ່ວມມືກັບບໍລິສັດ SW Holding Group ຈະມີຜົນດີໃນການປະຕິບັດໂຄງການເພາະບໍລິສັດດັ່ງກ່າວ ມີທ່າແຮງດ້ານການເງິນ ການຕິດຕັ້ງປ້າຍນີ້ຈະມີຜົນປະໂຫຍດຫຼາຍ ເພາະນອກຈາກຈະເປັນການເປີດໂຕບັນດາແຫຼງທ່ອງທ່ຽວໃນທົ່ວປະເທດສູ່ສັງຄົມທັງພາຍໃນ ແລະ ຕ່າງປະເທດແລ້ວ ຍັງເປັນການອຳນວຍຄວາມສະດວກ ຊ່ວຍຊີ້ບອກເສັ້ນທາງໃຫ້ແກ່ນັກທ່ອງທ່ຽວໄປເຖິງແຫຼງທ່ອງທ່ຽວໄດ້ງ່າຍຂຶ້ນ.