ເຈົ້າໜ້າທີ່ຕຳຫຼວດສາມາດຈັບກຸມອະດີດຜົວຍິງເມຍ ແລະ ນ້ອງເມຍຈົນເສຍຊີວິດຄາທີ່ ພາຍຫຼັງເອົາຕົວຫຼົບໜີພຽງວັນດຽວຈາກການກໍ່ເຫດຄາຕະກຳສະເທືອນຂວັນ ທີ່ບ້ານແສງສະຫວ່າງ, ເມືອງໄຊເສດຖາ, ນະຄອນຫຼວງວຽງຈັນ ໃນວັນທີ 19 ກໍລະກົດຜ່ານມາ.
ເຈົ້າໜ້າທີ່ ປກສ ເມືອງໄຊເສດຖາ, ນະຄອນຫຼວງວຽງຈັນ ເປີດເຜີຍວ່າ: ທາງເຈົ້າໜ້າທີ່ຕຳຫຼວດໄດ້ລົງກວດກາສະຖານທີ່ເກີດເຫດພາຍຫຼັງໄດ້ຮັບແຈ້ງຂໍ້ມູນ ແລະ ໄດ້ພົບຜູ້ເສຍຊີວິດຈາກການຖືກຍິງຫຼາຍນັດ 2 ສົບ ຮູ້ຊື່ພາຍຫຼັງຄື ນາງ ອັກປະລິນຍາ ເຜົ່າສີວົງສາ ຫຼື ກີ້, ອາຍຸ 26 ປີ, ອາຊີບ ຄ້າຂາຍ ແລະ ນາງ ລາລິຕາ ເຜົ່າສີວົງສາ, ອາຍຸ 24 ປີ ອາຊີບຄ້າຂາຍ ເຊິ່ງທັງ 2 ເປັນເອື້ອຍນ້ອງກັນ. ພ້ອມກັນນັ້ນ, ກໍພົບຜູ້ບາດເຈັບ 1 ຄົນ ຄື ນາງ ປະກິດ ເຜົ່າສີວົງສາ, ອາຍຸ 55 ປີ ອາຊີບຄ້າຂາຍ ເຊິ່ງເປັນແມ່ຂອງຜູ້ເຄາະຮ້າຍ.
ຄາຕະກອນລາຍນີ້ຊື່ ທ້າວ ພຸດທະກອນ ຊາພັກດີ (ຕ້ອມ) ອະດີດສາມີຂອງນາງ ອັກປະລິນຍາ ໜຶ່ງໃນຜູ້ເຄາະຮ້າຍ, ອາຍຸ 32 ປີ, ອາຊີບກຳມະກອນ, ອາໄສຢູ່ບ້ານທົ່ງກາງ, ເມືອງສີສັດຕະນາກ, ນະຄອນຫຼວງວຽງຈັນ ຖືກຈັບກຸມໃນມື້ວານນີ້ພາຍຫຼັງພະຍາຍາມຫຼົບໜີຈາກເຈົ້າໜ້າທີ່.
ອີງຕາມຄຳໃຫ້ການຂອງ ນາງ ປະກິດ (ແມ່ຂອງຜູ້ເສຍຊີວິດ) ຮູ້ວ່າ ຜູ້ກໍ່ເຫດລົງມືຄັ້ງນີ້ ແມ່ນອະດີດລູກເຂີຍຂອງຕົນ ເຊິ່ງໄດ້ແຕ່ງດອງກັບນາງ ອັກປະລິນຍາ (ຜູ້ເສຍຊີວິດ) ໃນປີ 2017 ແລະ ມີລູກນຳກັນ 2 ຄົນ (ເພດຊາຍ) ອາຍຸ 3 ປີ ປາຍ ແລະ 1 ປີປາຍ. ໃນໄລຍະທັງສອງໃຊ້ຊີວິດເປັນຄູ່ຜົວເມຍ, ຜູ້ເປັນຜົວໄປພົວພັນກັບຢາເສບຕິດ, ຕິດການພະນັນທາງອອນລາຍ ແລະ ເຄີຍມີປາກສຽງໃຊ້ຄວາມຮຸນແຮງກັບເມຍເປັນປະຈໍາ. ມາຮອດເດືອນ ກຸມພາ 2020 ຜູ້ເປັນເມຍທົນຕໍ່ການກະທຳຂອງຜົວບໍ່ໄດ້ ຈິ່ງໄດ້ຮ້ອງຟ້ອງຂໍຢ່າຮ້າງ ຢູ່ສານປະຊາຊົນເຂດ 3 ນະຄອນຫຼວງ. ຕົກມາຮອດ ວັນທີ 19 ກໍລະກົດ 2021 ເວລາປະມານ 8:30 ໂມງ ທັງສອງຄົນພ້ອມດ້ວຍຍາດພີ່ນ້ອງໄດ້ພາກັນໄປຟັງຄຳຕັດສິນຂອງສານກ່ຽວກັບການລ້ຽງດູລູກທັງ 2 ຄົນ, ສານປະຊາຊົນວິນິດໄສ ໃຫ້ນາງ ອັກປະລິນຍາ ຫຼື ກີ້ (ຜູ້ເສຍຊີວິດ) ໄດ້ສິດຄຸ້ມຄອງ ແລະ ລ້ຽງດູລູກທັງ 2 ຄົນ, ສ່ວນທ້າວ ພຸດທະກອນ ຫຼື ຕ້ອມ (ຜູ້ເປັນພໍ່) ບໍ່ມີສິດຄຸມຄອງລູກແຕ່ມີພັນທະໃນການລ້ຽງດູຮອດ 18 ປີ ທັງສາມາດໄປມາຫາສູ່ໄດ້.
ຢ່າງໃດກໍຕາມ, ປັດຈຸບັນທາງເຈົ້າໜ້າທີ່ກຳລັງດຳເນີນການສືບສວນສອບສວນຫາສາເຫດຈູງໃຈເພີ່ມຕື່ມໃນການລົງມືກໍ່ເຫດສະຫຍອງຂວັນຂອງຄາຕະກອນຄັ້ງນີ້.
ຂໍ້ມູນຈາກ: ປ້ອງກັນຄວາມສະຫງົບນະຄອນຫຼວງວຽງຈັນ