ອິນເດຍ ແລະ ຫຼາຍປະເທດໃນອາຊີ ເພີ່ມການນຳເຂົ້ານ້ຳມັນຈາກຣັດເຊຍຈົນເປັນແຫຼ່ງລາຍໄດ້ສຳຄັນຂອງລັດຖະບານຣັດເຊຍ ເຊິ່ງໃນຂະນະນີ້ຢູ່ໃນແຮງກົດດັນ ແລະ ມາດຕະການລົງໂທດຈາກຊາດຕະເວັນຕົກທີ່ນຳມາໃຊ້ເພື່ອຈຳກັດລາຍໄດ້ຂອງຣັດເຊຍ.
ໃນໄລຍະປີ 2022 ເປັນຕົ້ນມາ ອິນເດຍນຳເຂົ້ານ້ຳມັນຈາກຣັດເຊຍໄປແລ້ວເກືອບ 60 ລ້ານບາເຣວ ເມື່ອທຽບກັບປີກາຍນີ້ປະລິມານ 12 ລ້ານບາເຣວ.
ນາຍົກລັດຖະມົນຕີສີລັງກາ ໄດ້ກ່າວວ່າ: ສີລັງກາຍິນດີຊື້ນ້ຳມັນຈາກຣັດເຊຍເພີ່ມຂຶ້ນ ເນື່ອງຈາກປະເທດກຳລັງຕ້ອງການນ້ຳມັນເຊື້ອໄຟຈຳນວນຫຼາຍເພື່ອມາຊຸກຍູ້ເສດຖະກິດ ໂດຍໃນເດືອນພຶດສະພາທີ່ຜ່ານມານີ້ ສີລັງກາສັ່ງຊື້ນ້ຳມັນດິບຈາກຣັດເຊຍ 99.000 ໂຕນ ເພື່ອໃຫ້ໂຮງງານກັ່ນນ້ຳມັນເຮັດວຽກຕໍ່ໄປໄດ້.
ຕັ້ງແຕ່ທີ່ຣັດເຊຍ-ຢູເຄຣນມີການຂັດແຍ່ງກັນ ເຮັດໃຫ້ລາຄານ້ຳມັນໂລກໄດ້ເພີ່ມສູງຂຶ້ນ, ເຮັດໃຫ້ໂຮງງານກັ່ນນ້ຳມັນຕ່າງໆໃນອິນເດຍ ແລະ ປະເທດອື່ນໆໃນອາຊີຫັນໄປຊື້ນ້ຳມັນຈາກຣັດເຊຍ ເຊິ່ງໄດ້ຮັບສ່ວນຫຼຸດໃນລາຄາຖືກກວ່າຕະຫຼາດໂລກປະມານ 30-35 ໂດລາຕໍ່ບາເຣວ.
ອາຊີກາຍເປັນຕະຫຼາດທີ່ສຳຄັນຂອງຣັດເຊຍ ໂດຍມີອິນເດຍເປັນລູກຄ້າອັນດັບໜຶ່ງ ຕາມມາດ້ວຍຈີນ, ໂດຍຕົວເລກໃນການຂົນສົ່ງນ້ຳມັນຈາກຣັດເຊຍມາຍັງອິນເດຍເພີ່ມຂຶ້ນຈາກລະດັບ 100.000 ບາເຣວຕໍ່ມື້ ໃນເດືອນກຸມພານີ້, ມາຢູ່ທີ່ລະດັບ 870.000 ບາເຣວຕໍ່ມື້ໃນເດືອນພຶດສະພາ.
ໃນຂະນະດຽວກັນ ອາເມຣິກາ ແລະ ສະມາຊິກພັນທະມິດເອີຣົບ ກຳລັງຫາລືໃນມາດຕະການ ແລະ ຈັດຕັ້ງກຸ່ມຂຶ້ນເພື່ອກຳນົດລາຄານ້ຳມັນທີ່ຣັດເຊຍສົ່ງອອກ, ເຊິ່ງມີເປົ້າໝາຍເພື່ອກຳຈັດແຫຼ່ງລາຍໄດ້ຂອງຣັດເຊຍ.
ແຫຼ່ງຂ່າວຈາກ ເອພີ