ກອງປະຊຸມໃຫຍ່ ຄັ້ງທີ IV ຂອງອົງຄະນະພັກມະຫາວິທະຍາໄລແຫ່ງຊາດ (ມຊ) ໄດ້ຈັດຂຶ້ນ ວັນທີ 16 ມິຖຸນາ 2015 ທີ່ ມຊ ໂດຍເປັນປະທານຂອງສະຫາຍ ສຈ.ດຣ. ສຸກກົງແສງ ໄຊຍະເລີດ ກຳມະການສູນກາງພັກ ຄະນະປະຈຳພັກກະຊວງສຶກສາທິການ ແລະ ກີລາ ອະທິການບໍດີ ມຊ ໂດຍໃຫ້ກຽດເຂົ້າຮ່ວມຂອງສະຫາຍ ດຣ. ພັນຄຳ ວິພາວັນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກີລາ ມີຮອງເລຂາຄະນະພັກ ບັນດາຄະນະພັກກະຊວງ ເລຂາຄະນະພັກ ພະນັກງານອາວຸໂສບຳນານ ແຂກຖືກເຊີນ ແລະ ສະມາຊິກພັກ.
ໃນກອງປະຊຸມສະຫາຍ ຮສ.ດຣ.ສາຍຂອງ ສາຍນາສິນ ເລຂາຄະນະພັກ ຮອງອະທິການບໍດີ ມຊ ກໍ່ໄດ້ຂຶ້ນຜ່ານບົດສະຫຼຸບຕີລາຄາຄືນ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ມຊ ນັບແຕ່ທ້າຍປີ 2010 ເປັນຕົ້ນມາ ໂດຍໄດ້ຍົກໃຫ້ຜົນງານອັນພົ້ນເດັ່ນ ໃນການຈັດຕັ້ງປະຕິບັດວຽກງານໄລຍະຜ່ານມາ ເຊິ່ງເຫັນໄດ້ວ່າ ມຊ ແມ່ນສະຖາບັນການສຶກສາຊັ້ນສູງແຫ່ງໜຶ່ງຂອງລາວ ໄດ້ຮັບການສ້າງຕັ້ງມາ ແຕ່ປີ 1996 ປັດຈຸບັນ ມີພະນັກງານຄູ-ອາຈານ ທັງໝົດ 1.938 ຄົນ ຍິງ 846 ຄົນ ແລະ ນັກສຶກສາທຸກລະບົບ 26.430 ຄົນ ຍິງ 10.138 ຄົນ ນັກສຶກສາຕ່າງປະເທດ 857 ຄົນ ມາຈາກ 18 ປະເທດ ໂຄງປະກອບການຈັດຕັ້ງມີ 12 ຄະນະວິຊາ 11 ຫ້ອງການ 2 ສະຖາບັນ 1 ຫໍສະໝຸດກາງ 2 ສູນຄົ້ນຄວ້າ ໂຮງຮຽນພອນສະຫວັນ ແລະ ຊົນເຜົ່າ ກຽມມະຫາວິທະຍາໄລ ແລະ ໂຮງໝໍ 1 ແຫ່ງ ມຊ ປະກອບມີ 5 ວິທະຍາເຂດ ແລະ 1 ສຳນັກງານອະທິການບໍດີ ແລະ ອົງຄະນະພັກ ມຊ ປະກອບມີ 13 ຄະນະພັກຮາກຖານ ມີ 75 ໜ່ວຍພັກ ມີຈຳນວນສະມາຊິກພັກທີ່ເປັນພະນັກງານຄູ-ອາຈານ ແລະ ນັກສຶກສາ ມີ 1.485 ສະຫາຍ ຍິງ 560 ສະຫາຍ ສຳຮອງ 182 ສະຫາຍ.
ດ້ານການຊີ້ນຳ-ນຳພາ ແມ່ນໄດ້ເອົາໃຈໃສ່ທຸກຂົງເຂດວຽກງານອັນເດັ່ນ ກໍ່ແມ່ນຂົງເຂດວຽກງານວິຊາສະເພາະໃນ 5 ປີຜ່ານມາ ໄດ້ພັດທະນາປັບປຸງ ແລະ ສ້າງບັນດາຫຼັກສູດຕາມມາດຕະຖານຫຼັກສູດແຫ່ງຊາດ ທີ່ກະຊວງສຶກສາທິການ ແລະ ກີລາວາງອອກ ທັງນີ້ ກໍ່ເພື່ອຍົກສູງຄຸນະພາບຂອງຫຼັກສູດ ໂດຍອີງໃສ່ເງື່ອນໄຂຕົວຈິງຂອງປະເທດ ຂອງຂະແໜງການຜູ້ສອນ-ຜູ້ຮຽນ ແລະ ຕາມຄວາມຕ້ອງການຂອງຕະຫຼາດແຮງງານໃນສັງຄົມ ຍ້ອນແນວນັ້ນ ປັດຈຸບັນ ມຊ ຈຶ່ງໄດ້ເປີດສອນທັງໝົດ 192 ຫຼັກສູດ ໃນນັ້ນມີຫຼັກສູດລະດັບປະລິນຍາເອກ 3 ຫຼັກສູດ ປະລິນຍາໂທ 43 ຫຼັກສູດ ປະລິນຍາຕີ 122 ຫຼັກສູດ ແລະ ຫຼັກສູດອະນຸປະລິນຍາ 4 ຫຼັກສູດ ອັນພົ້ນເດັ່ນແມ່ນໄດ້ລົບລ້າງ ລະບົບການຮຽນສາຍພິເສດຢູ່ ມຊ ຢ່າງສິ້ນເຊິງ.
ນອກຈາກນີ້ ຍັງໄດ້ປັບປຸງກົນໄກການຄຸ້ມຄອງ ການຈັດຕັ້ງປະຕິບັດ ການບໍລິຫານວິຊາການ ການປະສານງານກັບຄະນະວິຊາຕ່າງໆ ເພື່ອຄົ້ນຄວ້າເງື່ອນໄຂ ການເຂົ້າຮຽນຫຼັກສູດຕໍ່ເນື່ອງຂອງນັກສຶກສາ ສະໜອງຂໍ້ມູນດ້ານວິຊາການໃນການເຂົ້າສຶກສາຢູ່ ມຊ ສ້າງ ແລະ ປັບປຸງລະບຽບຫຼັກການໃນການຂຽນ ການແປ ການຮຽບຮຽງ ການພິມ ແລະ ຈຳໜ່າຍ ເອກະສານວິຊາການໃນທົ່ວ ມຊ ໂດຍລວມແລ້ວ ສາມາດຍາດໄດ້ຜົນງານຫຼາຍດ້ານ.
ຄຽງຄູ່ກັບຜົນງານທີ່ຍາດໄດ້ນັ້ນ ກໍ່ຍັງມີຈຸດອ່ອນຂໍ້ຄົງຄ້າງທີ່ຄະນະພັກຊຸດໃໝ່ ຈະຕ້ອງໄດ້ສືບຕໍ່ປັບປຸງແກ້ໄຂໃນ 5 ປີຕໍ່ໜ້າ ເພື່ອເຮັດໃຫ້ທຸກຂົງເຂດວຽກງານ ໄດ້ຮັບການພັດທະນາດີຂຶ້ນເປັນກ້າວໆ ເອົາໃຈໃສ່ການຂະຫຍາຍພັກ ການປັບປຸງການຈັດຕັ້ງປັບປຸງກົນໄກຄຸ້ມຄອງ ການບໍລິຫານ ແລະ ອື່ນໆ ເພື່ອເຮັດໃຫ້ການຮຽນ-ການສອນນັບມື້ດີຂຶ້ນ ເຮັດໃຫ້ເປັນສະຖາບັນການສຶກສາທີ່ສ້າງຊັບພະຍາກອນມະນຸດ ທີ່ມີຄຸນະພາບ ເພື່ອຮັບໃຊ້ສັງຄົມ ແລະ ປະເທດຊາດ.
ຕອນທ້າຍກອງປະຊຸມ ຍັງໄດ້ປ່ອນບັດເລືອກເອົາຄະນະບໍລິຫານງານພັກ ມຊ ຊຸດໃໝ່ ມີຜູ້ລົງສະໝັກທັງໝົດ 15 ສະຫາຍ ເລືອກເອົາ 11 ສະຫາຍ ໂດຍໄດ້ເຫັນດີເປັນເອກະສັນເລືອກເອົາສະຫາຍ ສຈ.ດຣ.ສົມສີ ຍໍພັນໄຊ ເປັນເລຂາຄະນະພັກ ສະຫາຍ ຮສ.ດຣ.ພຸດ ສິມມາລາວົງ ເປັນຮອງເລຂາ ສະຫາຍ ຮສ.ດຣ.ອຸດົມ ພອນຄຳເພັງ ເປັນປະທານກວດກາ ສະຫາຍ ຮສ.ດຣ.ຮຸ່ງ ເພັດຈັນທະວົງ ແລະ ສະຫາຍ ຮສ. ໂພສີ ທິບດາວັນ ເປັນຮອງປະທານກວດກາ ພ້ອມນັ້ນ ກອງປະຊຸມຍັງໄດ້ເລືອກເອົາຜູ້ແທນສົມບູນ ໄປເຂົ້າຮ່ວມກອງປະຊຸມໃຫຍ່ ຄັ້ງທີ VIII ຂອງອົງຄະນະພັກກະຊວງສຶກສາທິການ ແລະ ກີລາ ທີ່ຈະຈັດຂຶ້ນໃນຕໍ່ໜ້າ ນອກນີ້ ຜູ້ເຂົ້າຮ່ວມຍັງໄດ້ຮັບຟັງການໂອ້ລົມ ເພື່ອເປັນທິດເຍືອງທາງໃນການຈັດຕັ້ງປະຕິບັດ ຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກຕົນຈາກ ສະຫາຍ ດຣ. ພັນຄຳ ວິພາວັນ ຕື່ມອີກ.
ແຫລ່ງຂ່າວ: ວຽງຈັນໃໝ່