ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 65 ປີ (20/1/1949-20/1/2014) ທີ່ໄດ້ໝູນວຽນມາຄົບຮອບອີກວາລະໜຶ່ງ ກະຊວງປ້ອງກັນປະເທດ ໄດ້ຈັດພິທີສວນສະໜາມ ສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວ ແລະ ເຂັ້ມແຂງກຽມພ້ອມສູ້ຮົບຂອງກອງທັບປະຊາຊົນລາວຂຶ້ນ ຕອນເຊົ້າວັນທີ 16 ມັງກອນ 2014 ນີ້ ທີ່ວິທະຍາຄານນາຍທະຫານບົກ ໃຫ້ກຽດເຂົ້າຮ່ວມຂອງສະຫາຍ ພົນໂທ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ບັນດາສະຫາຍກົມການເມືອງສູນກາງພັກ ກໍ່ຄືການນຳພັກ-ລັດ ນາຍ ແລະ ພົນທະຫານ ຕຳຫຼວດ ຕະຫຼອດຮອດມວນຊົນທົ່ວໄປ ເຂົ້າຮ່ວມຊົມຢ່າງຫຼວງຫຼາຍ.
ໃນພິທີສະຫາຍ ພົນຕີ ສຸວອນ ເລືອງບຸນມີ ກຳມະການສູນກາງພັກ ຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດໄດ້ຂຶ້ນກ່າວ ຊຶ່ງບາງຕອນສະຫາຍໄດ້ກ່າວວ່າ: ຕະຫຼອດໄລຍະ 38 ປີແຫ່ງການປະຕິບັດ ສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ສ້າງສາປະເທດຊາດ ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງ ໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນ ຕິດພັນກັບການພັດທະນາຊົນນະບົດຮອບດ້ານຂອງພັກ ເດັດດ່ຽວເດີນຕາມແນວທາງປ່ຽນແປງໃໝ່ຂອງພັກ ຮັກສາ ແລະ ເສີມຂະຫຍາຍທາດແທ້ປະຕິວັດ ມູນເຊື້ອອັນດີງາມ ເຝິກຝົນຫຼໍ່ຫຼອມທັດສະນະຄຸນສົມບັດສິນທຳປະຕິວັດ ຕັ້ງໜ້າປັບປຸງກໍ່ສ້າງກຳລັງຂອງຕົນ ໃຫ້ນັບມື້ເຂັ້ມແຂງໃນທຸກດ້ານ ຮູ້ຈັກອີງໃສ່ກຳລັງແຮງສັງລວມຂອງທົ່ວປວງຊົນ ຫັນເອົາກຳລັງລົງສູ່ຮາກຖານຢ່າງແຂງແຮງ ປັບປຸງອຳນາດການປົກຄອງຢູ່ຮາກຖານ ຊ່ວຍເຫຼືອປະຊາຊົນປັບປຸງຊີວິດການເປັນຢູ່ ເຮັດໃຫ້ສະພາບຢູ່ຮາກຖານມີຄວາມສະຫງົບໂດຍພື້ນຖານ ປະຊາຊົນບັນດາເຜົ່າມີຄວາມເຊື່ອໝັ້ນ ຕໍ່ແນວທາງນະໂຍບາຍຂອງພັກ-ລັດ ແລະ ເຊື່ອໝັ້ນຕໍ່ກອງທັບ ພ້ອມກັນທຳມ້າງກົນອຸບາຍຍຸດທະສາດຫັນປ່ຽນໂດຍສັນຕິ ການກໍ່ຄວາມບໍ່ສະຫງົບ ການກໍ່ການລຸກຂຶ້ນໂຄ່ນລົ້ມ ແຊກຊຶມ ແລະ ການເຄື່ອນໄຫວເກາະຜິດບຽບຢຶດຊາຍແດນ ຂອງອິດທິກຳລັງປໍລະປັກໄດ້ຢ່າງທັນການ ຮັກສາຄວາມສະຫງົບທາງດ້ານການເມືອງ ຄວາມເປັນລະບຽບຮຽບຮ້ອຍຂອງສັງຄົມໄດ້ເປັນຢ່າງດີ.
ລວມຄວາມວ່າ ຕະຫຼອດກວ່າເຄິ່ງສະຕະວັດແຫ່ງການຕໍ່ສູ້ ແລະ ເຄື່ອນໄຫວຢ່າງລຽນຕິດ ໃນເງື່ອນໄຂທີ່ຫຍຸ້ງຍາກລຳບາກ ແລະ ທຸລະກັນດານທີ່ສຸດນັ້ນ ພາຍໃຕ້ການນຳພາຂອງພັກ ກອງທັບປະຊາຊົນລາວ ໄດ້ເຮັດສຳເລັດພາລະກິດປະຕິວັດ ແລະ ເຮັດຫຼ້ອນພາລະກຳປະຫວັດສາດອັນໜັກໜ່ວງຂອງພັກ ທີ່ມອບໝາຍໃຫ້ຢ່າງສະຫງ່າງາມ ສ້າງຜົນງານອັນດີເດັ່ນ ວິລະກຳອັນລ້ຳເລີດປະດັບໄວ້ໜ້າປະຫວັດສາດຂອງຊາດຢ່າງສົມກຽດ ສ້າງມູນເຊື້ອອັນດີງາມ ເພື່ອໃຫ້ຄົນຮຸ່ນຫຼັງໄດ້ສຶກສາຮ່ຳຮຽນເອົາ ສະນັ້ນ ກອງທັບປະຊາຊົນລາວ ຈຶ່ງສົມແລ້ວທີ່ໄດ້ຮັບນາມມະຍົດ ເປັນກອງທັບວິລະຊົນຂອງຊາດລາວວິລະຊົນ ໄດ້ຮັບຄຳສັນລະເສີນຈາກພັກ-ລັດ ກອງທັບຍາມໃດກໍ່ນຳໜ້າໃນທຸກວຽກງານ ເດັດດ່ຽວຜ່ານຜ່າອຸປະສັກ ຕີເອົາຊະນະສັດຕູທຸກໂຕ ສຳເລັດທຸກໜ້າທີ່ ສົມເປັນກຳລັງແກ່ນສານທີ່ເຂັ້ມແຂງຂອງການປະຕິວັດ ເປັນເຄື່ອງມືອັນແຫຼມຄົມຂອງພັກ.
ການສວນສະໜາມ ສະແດງສິລະປະຍຸດຂອງກຳລັງປະກອບອາວຸດ ໃຫ້ການນຳພັກ-ລັດ ແລະ ມວນຊົນທົ່ວໄປໄດ້ເບິ່ງໄດ້ຊົມຄັ້ງນີ້ ມີຈຳນວນ 11 ກ້ອນກຳລັງຄື: ນຳໜ້າດ້ວຍກ້ອນທຸງໄຊກອງທັບ ຕາມດ້ວຍກ້ອນກຳລັງທະຫານບົກ ກ້ອນກຳລັງທະຫານອາກາດ ເຫຼົ່າຮົບຊາຍແດນ ເຫຼົ່າຮົບຕີພິເສດ ທະຫານຮາບ ກອງຊ່າງແສງ ເຫຼົ່າຮົບສື່ສານ ເຫຼົ່າຮົບເສນາຮັກ ກຳລັງທະຫານທ້ອງຖິ່ນ ກອງກຽດຕີຍົດ ສຳລັບການສະແດງຂອງເຫຼົ່າຮົບຕີພິເສດ ໄດ້ສະແດງໃຫ້ເຫັນວິຊາຕໍ່ສູ້ປ້ອງກັນຕົວເອງດ້ວຍມືເປົ່າ 35 ຈັ່ງຫວະ ການຕໍ່ສູ້ປະຈັນບານ ສ່ວນເຫຼົ່າຮົບທະຫານອາກາດກອງພັນໃຫຍ່ 703 ກໍ່ໄດ້ມີການສະແດງໂດດຈ້ອງເທິງອາກາດ ຈຳນວນ 8 ຈຸ ຈຸລະ 5 ຄົນ ລວມທັງໝົດ 40 ຄົນ ຍິງ 26 ຄົນ ນອກນີ້ກໍ່ຍັງມີກິດຈະກຳອື່ນໆ ອັນໄດ້ສ້າງບັນຍາເຮັດໃຫ້ພາຍໃນງານ ມີຄວາມໝາຍຄວາມສຳຄັນທາງປະຫວັດສາດ ແລະ ມີຄວາມເບີກບານມ່ວນຊື່ນ ພ້ອມທັງໄດ້ສ້າງຄວາມສົນໃຈໃຫ້ແກ່ຜູ້ເຂົ້າຮ່ວມເຂົ້າຊົມ.
ທີ່ມາ http://www.vientianemai.net/teen/khao/1/11007