ບໍລິສັດ ວຽງຈັນເຊັນເຕີ ລາວ ມະຫາຊົນ ຮ່ວມກັບ ບໍລິສັດ ຫຼັກຊັບລາວ-ຈີນ ຈຳກັດ ໄດ້ຈັດງານເຜີຍແຜ່ຂໍ້ມູນການອອກຈຳໜ່າຍຫຸ້ນແກ່ມວນຊົນຄັ້ງທຳອິດ (IPO) ເພື່ອເຜີຍແຜ່ ແລະ ໃຫ້ຂໍ້ມູນການອອກຈຳໜ່າຍຫຸ້ນຂອງບໍລິສັດແກ່ບັນດານັກລົງທຶນທັງພາຍໃນ ແລະ ຕ່າງປະເທດ.
ງານດັ່ງກ່າວ ໄດ້ມີຂຶ້ນໃນວັນທີ 10 ເມສາ 2019 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານນາງ ສາຍສະໝອນ ຈັນທະຈັກ ຫົວໜ້າສຳນັກງານ ຄະນະກຳມະການຄຸ້ມຄອງຫຼັກຊັບ, ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ, ທ່ານ ນາງ ອໍລະໄທ ສັນຕິຄົງຄາ ຮອງປະທານ ບໍລິສັດ ວຽງຈັນ ເຊັນເຕີ ລາວ ມະຫາຊົນ, ທ່ານ ພອນເພັດ ລິນລີ ຜູ້ອຳນວຍການບໍລິສັດຫຼັກຊັບລາວ-ຈີນ ຈຳກັດ ແລະ ມີບັນດານັກທຸລະກິດທີ່ຖືກເຊີນເຂົ້າຮ່ວມ.
ທ່ານ ນາງ ອໍລະໄທ ສັນຕິຄົງຄາ ກ່າວວ່າ: ບໍລິສັດ ວຽງຈັນເຊັນເຕີລາວ ມະຫາຊົນ ສ້າງຕັ້ງຂຶ້ນໃນປີ 2017 ເປັນຜູ້ບໍລິຫານ ແລະ ຜູ້ພັດທະນາ ອະສັງຫາສູນການຄ້າ ແລະ ສຳນັກງານໃນ ສປປ ລາວ. ໃນປັດຈຸບັນ ບໍລິສັດ ເປັນເຈົ້າຂອງພື້ນທີ່ການຄ້າ ແລະ ພື້ນທີ່ຫ້ອງການຢູ່ສູນການຄ້າ ວຽງຈັນເຊັນເຕີ, ໜຶ່ງໃນພື້ນທີ່ທີ່ເປັນທ່າແຮງທາງການຄ້າ ແລະ ຫ້ອງການຢູ່ ສປປ ລາວ. ທີ່ລວມເອົາຮ້ານຂາຍເຄື່ອງຍ່ອຍທີ່ມີຊື່ສຽງ, ແລະ ເຄື່ອງໝາຍການຄ້າ ບໍລິສັດທີ່ມີຊື່ສຽງທີ່ມີຫ້ອງການ ແລະ ອາຄານສຳນັກງານສູນການຄ້າ. ບໍລິສັດ ດັ່ງກ່າວ ສ້າງຂຶ້ນດ້ວຍການຮ່ວມມືກັນລະຫວ່າງ ກຸ່ມບໍລິສັດກໍ່ສ້າງ ລົງທຶນ ແລະ ຖືຫຸ້ນແຂວງຢຸນນານ ຈຳກັດ ແລະ ບໍລິສັດ ລົງທຶນຕ່າງປະເທດແຂວງຢຸນນານ ຈຳກັດ ຖືຫຸ້ນ 60% ແລະ ບໍລິສັດ ກຣິດຕະພົງ ກຣຸບ ຈຳກັດ ຖືຫຸ້ນ 40%.
ທ່ານ ນາງ ອໍລະໄທ ສັນຕິຄົງຄາ ກ່າວຕື່ມວ່າ: ຈຸດເດັ່ນດ້ານການລົງທຶນຂອງ IPO ວຽງຈັນເຊັນເຕີ ລາວ ມະຫາຊົນ ເປັນບໍລິສັດທີ່ຕັ້ງຢູ່ສູນການຄ້າໃຈກາງເມືອງ, ບັນຍາກາດອ້ອມຂ້າງ ແມ່ນມີຄວາມຄືກຄັກ, ເຊິ່ງສະຖານທີ່ດັ່ງກ່າວໃນເມື່ອກ່ອນນັ້ນ ເປັນເຂດໃນຕະຫຼາດຊຸມຊົນດັ່ງເດີມທີ່ມີຊື່ສຽງ, ມີຄວາມໜາແໜ້ນ ແລະ ເກົ່າແກ່ໃນນະຄອນຫຼວງວຽງຈັນ.
ບໍລິສັດ ວຽງຈັນເຊັນເຕີລາວ ມະຫາຊົນ ມີແຜນອອກຈຳໜ່າຍຫຸ້ນທັງໝົດ 63.998.700 ຫຸ້ນ, ໃນລາຄາ 1.050 ກີບ ຕໍ່ຫຸ້ນ ແລະ ຄາດມູນຄ່າການລະດົມທຶນ IPO 60 ຕື້ກີບ ເປີດໃຫ້ຈອງຊື້ຫຸ້ນໃນລະຫວ່າງວັນທີ 18 ມີນາ ຫາ ວັນທີ 26 ເມສາ 2019. ສຳລັບເປົ້າໝາຍໃນການນຳໃຊ້ທຶນ ແມ່ນຈະຊື້ຊັບສິນອະສັງຫາລິມະຊັບທີ່ມີຄຸນນະພາບສູງ, ຕົກແຕ່ງອະສັງຫາລິມະຊັບທີ່ມີຢູ່ ແລະ ພັດທະນາຫ້າງຊັບພະສິນຄ້າຊຸມຊົນ.
ຂຽນໂດຍ: ສະຫະລັດ ວອນທິວົງໄຊ