ວິທີເບິ່ງແຍງຜົມໃນລະດູຝົນ ຖືເປັນເລື່ອງສຳຄັນສຳລັບຜູ້ຍິງ ຖ້າຫາກສາວໆຄົນໃດບໍ່ຢາກໃຫ້ຜົມສວຍງາມຕ້ອງກາຍເປັນຜົມຍຸ້ງໆຟູໃນຊ່ວງລະດູຝົນແບບນີ້ ຮີບເອົາເຄັດລັບທີ່ເອົາມາຝາກ ໄປເບິ່ງແຍງຜົມງາມຮັບໜ້າຝົນກັນ
ໃນຊ່ວງໜ້າຝົນແບບນີ້ ສາວໆຫລາຍຄົນຕ້ອງຜະເຊີນກັບເມັດຝົນທີ່ຕົກລົງມາເກືອບບໍ່ເວັ້ນແຕ່ລະມື້ ເຮັດໃຫ້ຊົງຜົມອັນສວຍງາມ ທີ່ເຮັດກ່ອນອອກຈາກເຮືອນມາເປັນຢ່າງດີຕ້ອງຍຸ້ງໄປກັບສາຍຝົນແລະທີ່ຮ້າຍໄປກວ່ານັ້ນກໍຄືຜົມອັບຊື້ນ ອັນເປັນສາເຫດໃຫ້ເກີດອາການຄັນ ເຊື້ອລາເທິງໜັງຫົວ ແລະ ລັງແຄ ລວມໄປເຖິງສາລະພັດສິ່ງທີ່ຈະນຳມາເພາະຝົນ ເຫັນແບບນີ້ແລ້ວສາວໆ ຫລາຍຄົນຍອມບໍ່ໄດ້ ຈຶ່ງຕ້ອງຫາວິທີເບິ່ງແຍງຜົມຮັບມືໜ້າຝົນກັນ
- ເລືອກຊົງຜົມໃຫ້ເໝາະກັບລະດູຝົນ ລະດູຝົນແບບນີ້ ສຳລັບສາວໆຄົນໃດທີ່ບໍ່ຢາກຖືກຝົນແລ້ວຜົມຟູ ແນະນຳໃຫ້ເລືອກເຮັດຊົງຜົມທີ່ເໝາະສຳລັບລະດູຝົນເຊັ່ນ ຊົງຖັກເປຍ, ມັດຜົມຫາງມ້າ ຫລືມັດສູງດີທີ່ສຸດ ເພາະເວລາຖືກຝົນ ຜົມກໍຈະຍັງຄົງຢູ່ຊົງແລະງາມໄດ້ຕະຫລອດມື້
- ເມື່ອຜົມປຽກ ຕ້ອງເຊັດຜົມໃຫ້ແຫ້ງ ຫລັງຈາກຖືກຝົນ ເສັ້ນຜົມຈະປຽກແລະເກີດການອັບຊື້ນ ດັ່ງນັ້ນທຸກເທື່ອທີ່ຖືກຝົນ ຈະຕ້ອງເຊັດຜົມໃຫ້ແຫ້ງທຸກເທື່ອ ໂດຍຊ່ວງນີ້ແນະນຳໃຫ້ມີຜ້າເຊັດໜ້າຫລືຜ້າຂົນໜູຜືນນ້ອຍໆຕິດຕົວໄວ້ຈະດີທີ່ສຸດ
- ສະຜົມທຸກເທື່ອເມື່ອຖືກຝົນ ນ້ຳຝົນທຸກມື້ນີ້ມີສິ່ງປົນເປື້ອນຢູ່ຫລວງຫລາຍ ດັ່ງນັ້ນເມື່ອໃດທີ່ຖືກຝົນກັບຮອດເຮືອນມາສາວໆ ຈະຕ້ອງສະຜົມໃຫ້ສະອາດທຸກເທື່ອ ເພື່ອລ້າງເອົາສິ່ງສົກກະປົກອອກໄປ ນອກຈາກນີ້ຍັງຈະຊ່ວຍປ້ອງກັນການເກີດເຊື້ອລາແລະລັງແຄເທິງໜັງຫົວໄດ້ດ້ວຍ
- ບຳລຸງຜົມຢ່າງນ້ອຍອາທິດລະ 1-2 ຄັ້ງ ໜ້າຝົນແບບນີ້ ເສັ້ນຜົມຈະຕ້ອງເຈີກັບຄວາມອັບຊື້ນແລະສິ່ງສົກກະປົກຫລວງຫລາຍ ຊຶ່ງສິ່ງເຫລົ້ານີ້ເປັນຕົວການສຳຄັນທີ່ເຮັດໃຫ້ຜົມເສຍໄດ້ງ່າຍ ດັ່ງນັ້ນໃນແຕ່ລະອາທິດສາວໆ ຈຶ່ງຕ້ອງບຳລຸງຜົມ ເພື່ອຟື້ນຟູສະພາບເສັ້ນຜົມໃຫ້ແຂງແຮງເຊັ່ນ ການໝັກຜົມດ້ວຍສະໝຸນໄພພື້ນບ້ານເຊັ່ນໝາກຂີ້ກູດ ຫລືຈະໃຊ້ນ້ຳມັນໝັກຜົມທີ່ມີວາງຂາຍຢູ່ທົ່ວໄປວິທີນີ້ຈະຊ່ວຍໃຫ້ຜົມແຂງແຮງຂຶ້ນແລະສາມາດມີຜົມງາມເງົາງາມໄດ້ຕະຫລອດໜ້າຝົນ
- ບຳລຸງເສັ້ນຜົມຈາກພາຍໃນ ດ້ວຍການຮັບປະທານອາຫານທີ່ມີປະໂຫຍດ ການຮັບປະທານອາຫານທີ່ມີປະໂຫຍດ ເປັນອີກວິທີໜຶ່ງທີ່ຈະຊ່ວຍບຳລຸງເສັ້ນຜົມໃຫ້ແຂງແຮງໄດ້ຈາກພາຍໃນ ໂດຍໃນຊ່ວງໜ້າຝົນນີ້ໃຫ້ເນັ້ນຮັບປະທານອາຫານຈຳພວກຜັກແລະຫມາກໄມ້ທີ່ມີວິຕາມິນເອ ບີ ຊີ ແລະອີ ເພາະວິຕາມິນເຫລົ່ານີ້ມີປະໂຫຍດຕໍ່ເສັ້ນຜົມແລະຈະຊ່ວຍບຳລຸງຜົມໃຫ້ແຂງແຮງເງົາງາມຂຶ້ນໄດ້