ລັດຖະມົນຕີວ່າການກະຊວງການຕ່າງປະເທດ ໄທ, ມາເລເຊຍ ແລະ ອິນໂດເນເຊຍ ຮ່ວມປະຊຸມສຸກເສີນ ຫາລືແກ້ບັນຫາຜູ້ອົບພະຍົບຊາວໂຣຮິຍາ ທີ່ກຳລັງຕົກເປັນເຫຍື່ອຂອງການຄ້າມະນຸດ.
ສຳນັກຂ່າວຕ່າງປະເທດ ລາຍງານໃນວັນທີ 20 ພຶດສະພານີ້ວ່າ ທ່ານ ພົນເອກ ທະນະສັກ ປະຕິມາປຣະກອນ ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດຂອງໄທ, ທ່ານ ອານິຟາ ຣາມັນ ລັດຖະມົນຕີວ່າການກະຊວງການຕ່າງປະເທດມາເລເຊຍ ແລະ ທ່ານນາງ ເຣດໂນ ມາຊູດີ ລັດຖະມົນຕີວ່າການກະຊວງການຕ່າງປະເທດອິນໂດເນເຊຍ ໄດ້ຮ່ວມປະຊຸມກັນຢູ່ນະຄອນປຸຕຣາຈາຍາ ປະເທດມາເລເຊຍ ເພື່ອຫາລືການແກ້ໄຂບັນຫາຊາວອົບພະຍົບໂຣຮິນຍາ ທີ່ຕົກເປັນເຫຍື່ອຂອງຂະບວນການຄ້າມະນຸດ.
ແຫລ່ງຂ່າວໄດ້ລາຍງານວ່າ ການຫາລືກັນຂອງ 3 ປະເທດອາຊຽນໃນຄັ້ງນີ້ ແມ່ນໄດ້ເວົ້າເຖິງບັນຫາ ທີ່ມີຜູ້ອົບພະຍົບເກືອບ 3,000 ຄົນ ຈາກປະເທດມຽນມາ ແລະ ບັງກະລາເທດ ຖືກນຳຕົວຂຶ້ນຝັ່ງຢູ່ໄທ, ມາເລເຊຍ ແລະ ອິນໂດເນເຊຍ ໃນຊ່ວງບໍ່ພໍເທົ່າໃດມື້ຜ່ານມານີ້ ຫລັງຈາກທີ່ພວກເຂົາ ໄດ້ຖືກຖິ້ມໃຫ້ລອຍລຳຢູ່ກາງທະເລ ຈາກຂະບວນການຄ້າມະນຸດ ຈົນຕ້ອງປະເຊີນກັບຊາຕາກຳອັນທຸກຍາກລຳບາກ.