ແກ໊ງຄົນຮ້າຍດັກປຸ້ນຂະບວນລົດເຈົ້າຊາຍຊາອຸດິອາຣະເບຍ ບໍລິເວນຕອນເໜືອນະຄອນຫຼວງປາຣີ ຂະນະກຳລັງ
ມຸ່ງໜ້າໄປຍັງສະໜາມບິນ ຫອບເງິນ 2,68 ຕື້ກ່ວາຫຼົບໜີລອຍນວນ ພ້ອມລັກເອົາເອກະສານສຳຄັນໄປນຳອີກ.
ສຳນັກຂ່າວຕ່າງປະເທດລາຍງານ ໂດຍອ້າງການເປີດເຜີຍຂອງເຈົ້າໜ້າທີ່ຕຳຫຼວດຝຣັ່ງ ເມື່ອວັນທີ 18 ສິງຫາ 2014
ຜ່ານມາວ່າ ເກີດເຫດແກ໊ງຄົນຮ້າຍ ດັກປຸ້ນຂະບວນລົດຂອງເຈົ້າຊາຍແຫ່ງຣາຊະອານາຈັກຊາອຸດິອາຣາເບຍ ທາງ
ຕອນເໜືອຂອງນະຄອນຫຼວງປາຣີ ປະເທດຝຣັ່ງ ເມື່ອວັນອາທິດ (17 ສິງຫາ) ທີ່ຜ່ານມາ ຫອບເງິນນັບ 250,000
ເອີໂຣ ຫຼື ປະມານ2,681,000,000 ກີບ ແລ້ວຫຼົບໜີຢ່າງລອຍນວນ ພ້ອມກັບລັກເອົາເອກະສານທີ່ມີຄວາມສຳຄັນ
ໄປອີກ.
ຕຳຫຼວດຝຣັ່ງເປີດເຜີຍວ່າ ເຫດການຂະບວນລົດເຈົ້າຊາຍແຫ່ງຊາອຸດິອາຣະເບຍຖືກປຸ້ນເງິນ ເກີດຂຶ້ນໃນຂະນະທີ່
ເດີນທາງຈາກສະຖານທູດຊາອຸດິອາຣະເບຍ ເພື່ອມຸ່ງໜ້າໄປສະໜາມບິນ ເລີ ບູເກ ໂດຍບໍ່ມີຜູ້ໃດໄດ້ຮັບບາດເຈັບ
ຈາກເຫດການປຸ້ນທີ່ຮຸນແຮງດັ່ງກ່າວ.
ຕຳຫຼວດຍັງລະບຸອີກວ່າ ລົດທີ່ຄົນຮ້າຍນຳມາໃຊ້ເປັນພາຫະນະກໍ່ເຫດນັ້ນ ເປັນລົດທີ່ຖືກລັກມາ ແລະ ຈາກນັ້ນຍັງ
ພົບວ່າຄົນຮ້າຍໄດ້ເຜົາລົດຄັນດັ່ງກ່າວເພື່ອທຳລາຍຫຼັກຖານ, ຢ່າງໃດກໍຕາມ ຕອນນີ້ຍັງບໍ່ພົບເບາະແສຂອງຜູ້ຕ້ອງ
ສົງໄສ ໃນຂະນະທີ່ການເປີດເຜີຍຂອງແຫຼ່ງຂ່າວໃນແວດວົງຕຳຫຼວດຝຣັ່ງ ໄດ້ໃຫ້ທັດສະນະວ່າ ເຫດການປຸ້ນເງິນ
ຂອງເຈົ້າຊາຍຊາອຸດິອາຣະເບຍໃນຄັ້ງນີ້ ບໍ່ແມ່ນເຫດການປົກກະຕິ ເພາະແກ໊ງຄົນຮ້າຍໄດ້ວາງແຜນກຽມກັນມາ
ເປັນຢ່າງດີ ແລະ ຖືວ່າເປັນປະຕິບັດການທີ່ເກີດຂຶ້ນໄດ້ຍາກຫຼາຍ.
ທາງດ້ານສະຖານທູດຂອງຊາອຸດິອາຣະເບຍ ຍັງບໍ່ທັນມີທ່າທີໃດໆຕໍ່ກັບເຫດການດັ່ງກ່າວນີ້ ແລະ ບໍ່ມີການເປີດ
ເຜີຍພະນາມຂອງເຈົ້າຊາຍຊາອຸດິອາຣະເບຍ ທີ່ຖືກດັກປຸ້ນໃນຄັ້ງນີ້ແຕ່ຢ່າງໃດ.