ໃນຫຼາຍປີມານີ້ ພັກ – ລັດ ໄດ້ອະນຸຍາດໃຫ້ສົ່ງອອກໄມ້ໄປຍັງຕະຫຼາດຕ່າງປະເທດ ທີ່ເປັນພຽງຜະລິດຕະພັນ
ສຳເລັດຮູບເທົ່ານັ້ນ ສ່ວນໄມ້ທ່ອນແມ່ນໄດ້ສັ່ງຢຸດ ເພື່ອໃຫ້ແປຮູບສ້າງມູນຄ່າເພີ່ມຂອງສິນຄ້າກ່ອນ, ຢ່າງໃດ
ກໍຕາມ ຂະນະດຽວກັນຢູ່ຕາມດ່ານ ກໍປາກົດຍັງມີສະພາບການສົ່ງອອກໄມ້ທ່ອນຢູ່ ອັນໄດ້ສ້າງຄວາມສັບສົນ
ແກ່ກັບປະຊາຊົນ ຕໍ່ບັນຫານີ້ການນຳຂັ້ນສູງຂອງກະຊວງອຸດສາຫະກຳ ແລະ ການຄ້າໄດ້ໃຫ້ຄຳຕອບວ່າ:
ປະຈຸບັນແມ່ນຢູ່ໃນໄລຍະການທົດລອງເພື່ອກວດກາໄມ້ເກົ່າຢູ່ສອງແຂວງ ເພື່ອທີ່ຈະກ້າວໄປສູ່ການປິດປ່າ
ທົ່ວປະເທດໃນອານາຄົດ.
ເມື່ອເຊົ້າວັນທີ 23 ກໍລະກົດຜ່ານມາ ພາຍຫຼັງສຳເລັດການຕອບຄຳຖາມໂທລະສັບສາຍດ່ວນຂອງປະຊາຊົນ
ທີ່ສະພາແຫ່ງຊາດ ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້
ໃຫ້ສຳພາດຕໍ່ທີມຂ່າວເສດຖະກິດວ່າ: ສະພາບການຍັງປາກົດມີການສົ່ງອອກໄມ້ເປັນທ່ອນຢູ່ ແມ່ນປະຈຸບັນ
ກຳລັງຢູ່ໃນໄລຍະທີ່ລັດຖະບານກຳລັງທົດລອງການສົ່ງອອກຢູ່ສອງແຂວງຄື: ແຂວງສະຫວັນນະເຂດ ແລະ
ສາລະວັນ ທັງນີ້ ກໍເພື່ອເປັນການຕິດຕາມກວດກາຄືນ ບັນດາໂຮງງານ ເກັບກຳຈຳນວນໄມ້ ເກົ່າທີ່ຍັງຄ້າງ
ແລະ ທີ່ມາວ່າມີຫຼາຍປານໃດ ພ້ອມຈະມີການເຮັດສັນຍາກັນໄວ້ກັບບໍລິສັດ ໂດຍການທົດລອງຈະໃຫ້ສຳເລັດ
ພາຍໃນເດືອນກໍລະກົດນີ້ ຖ້າປະເມີນໄດ້ຜົນດີແມ່ນຈະສືບຕໍ່ປະຕິບັດໄປແຂວງອື່ນໆ ໃນຂອບເຂດທົ່ວປະເທດ
ເພື່ອກ້າວສູ່ການປິດປ່າໃນອານາຄົດ.
ທ່ານ ບຸນມີ ມະນີວົງ ໃຫ້ຮູ້ອີກວ່າ: ມີພຽງລັດຖະບານເທົ່ານັ້ນທີ່ມີສິດອອກອະນຸຍາດໃຫ້ຕັດ ແລະ ຂຸດຄົ້ນໄມ້
ຊຶ່ງປະຈຸບັນພັກ – ລັດໄດ້ອະນຸຍາດໃຫ້ຕັດໃນສະເພາະເຂດໂຄງການແລວທາງ, ແລວສາຍໄຟຟ້າ, ຂຸດຄົ້ນແຮ່
ທາດ ແລະ ໂຄງການສ້າງເຂື່ອນ ໂດຍໄດ້ມີການຈັດແບ່ງພະນັກງານວິຊາການລົງປະຈຳແຕ່ລະໂຄງການ ເພື່ອ
ເກັບໄມ້ໃຫ້ຖືກຕ້ອງຕາມກົດໝາຍ ຂະນະທີ່ໃນອານາຄົດຫາກກ້າວສູ່ການປິດປ່າ ຫາກຈະຂຸດຄົ້ນນອກຈາກ
ໂຄງການ ແລະ ສົ່ງອອກໄມ້ເປັນທ່ອນແມ່ນປະຕິບັດໄດ້ກໍລະນີດຽວ ຄືຄວາມຈຳເປັນໃນແຕ່ລະໄລຍະຂອງລັດ
ຖະບານເທົ່ານັ້ນ.
ແຫຼ່ງຂ່າວ: http://www.sedthakid.la/khao/19794.spc