ໃນວັນທີ 27 ພຶດສະພາ 2021 ທີ່ຜ່ານມາ ສໍານັກງານສາທາລະນະສຸກຂອງປະເທດອັງກິດ (Public Health England – PHE) ໄດ້ເປີດເຜີຍວ່າພົບເຊື້ອໂຄວິດ-19 ກາຍພັນຊະນິດໃໝ່ທີ່ມາຈາກປະເທດໄທ ໂດຍຕັ້ງຊື່ວ່າ VUI-21MAY-02 (C.36.3). ໃນການລາຍງານຍັງໄດ້ລະບຸວ່າໂຄວິດ-19 ສາຍພັນ C.36.3 ນີ້ຖືກພົບຄັ້ງທໍາອິດຢູ່ທີ່ປະເທດໄທໃນນັກເດີນທາງທີ່ມາຈາກເອຢິບ ເຊິ່ງໃນຕອນນີ້ພົບເຫັນຜູ້ຕິດເຊື້ອສາຍພັນດັ່ງກ່າວແລ້ວຈໍານວນ 109 ຄົນ.
ສໍາລັບຄໍາວ່າ VUI ທີ່ເປັນຊື່ຂອງໂຄວິດ-19 ກາຍພັນຊະນິດນີ້ແມ່ນມາຈາກຄໍາສັບທາງວິຊາການຄໍາວ່າ Variant Under Investigation ຫຼື ສາວພັນທີ່ຢູ່ໃນລະຫວ່າງການສືບສວນ. ໃນຂະນະທີ່ຍັງບໍ່ທັນມີຫຼັກຖານບົ່ງຊີ້ວ່າສາຍພັນນີ້ເຮັດໃຫ້ເກີດມີອາການຮຸນແຮງຂື້ນຫຼືບໍ່ ຫຼື ຫຼຸດປະສິດທິພາບຂອງວັກຊີນທີ່ສັກໃນປັດຈຸບັນນີ້ຫຼືບໍ່ ໂດຍກໍາລັງເຮັດການທົດລອງໃນຫ້ອງປະຕິບັດການເພື່ອໃຫ້ເຂົ້າໃຈເຖິງຜົນກະທົບຂອງການກາຍພັນຂອງໂຄວິດ-19 ຊະນິດນີ້.
ສ່ວນທາງດ້ານສູນບໍລິຫານສະຖານະການການແຜ່ລະບາດຂອງໂຣກຕິດເຊື້ອໄວຣັສໂຄໂຣນາຂອງປະເທດໄທໄດ້ຢືນຢັນວ່າຍັງບໍ່ທັນພົບເຊື້ອໂຄວິດ-19 ກາຍພັນໃນປະເທດໄທຕາມສໍານັກຂ່າວຂອງປະເທດອັງກິດໄດ້ລາຍງານ ເຊິ່ງການກວດສອບການກາຍພັນຈະຕ້ອງໄດ້ຮັບການຢືນຢັນຫຼາຍກວ່າ 1 Lab ດັ່ງນັ້ນຂ່າວທີ່ອອກມາຈຶ່ງຕັ້ງຂໍ້ສັງເກດວ່າອາດເປັນພຽງຂໍ້ສົງໃສຂອງທາງອັງກິດເທົ່ານັ້ນ.