ຂ່າວ: ບຸນນິກ
ເກີດຂຶ້ນມາໃຫ້ເຫັນອີກແລ້ວເລື່ອງຂົວຫັກຍ້ອນລົດບັນທຸກໜັກເກີນມາດຖານ ຊຶ່ງໃນເວລາປະມານ 11:10 ໂມງຂອງວັນທີ 2 ເມສາ ຂົວຫ້ວຍງົວທີ່ຫຼວງນ້ຳທາ ຕ້ອງຍຸບຄາກົງຍ້ອນລົດແກ່ໄມ້ດູ່.
ຕາມການສອບຖາມທ່ານ ສຸວັນເພັງ ວົງໄຊ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫຼວງນ້ຳທາໃຫ້ຮູ້ວ່າ: ໃນວັນທີ 2 ເມສາ 2014 ໃນເວລາ 11:10 ໂມງ ຢູ່ແຂວງຫຼວງນ້ຳທາ, ເມືອງຫຼວງນ້ຳທາຫາເມືອງນາແລ
ໄດ້ມີລົດບັນທຸກຂອງບໍລິສັດສິງດົງບັນ ທຸກໄມ້ດູ່ສຳເລັດຮູບຈຳນວນ 54 ໂຕນ ບວກກັບນ້ຳໜັກລົດ 15,8 ໂຕນ ລວມທັງໝົດແມ່ນ 69,8 ໂຕນ ແລ່ນເຂົ້າຂົວນ້ຳຫ້ວຍງົວ ຊຶ່ງເປັນຂົວເບເລຍາວ 33,5 ແມັດ ຢູ່ກິໂລແມັດ 11+500 ໃນເສັ້ນທາງຂອງແຂວງເລກທີ 1501 ທີ່ສ້າງມາຮັບນ້ຳໜັກໄດ້ພຽງ 20 ໂຕນຕ້ອງຫັກຄາທີ່.
ຕໍ່ກັບເຫດການທີ່ເກີດຂຶ້ນຄັ້ງນີ້ທ່ານ ສຸວັນເພັງ ວົງໄຊ ກ່າວວ່າ: ໃນຂະນະນີ້ແມ່ນໄດ້ເຮັດທາງເວັ້ນຊົ່ວຄາວ ເພື່ອບໍ່ໃຫ້ການສັນຈອນຖືກຕັດຂາດ ແຕ່ຜົນການເສຍຫາຍທັງໝົດແມ່ນມອບໃຫ້ບໍລິສັດສິງດົງ (ຜູ້ກະທຳຜິດ) ຮັບຜິດຊອກທັງໝົດ ໂດຍກຳນົດເວລາໃຫ້ 45 ວັນ ເລີ່ມຈາກ 3 ເມສາ 2014 ຫາ 18 ພຶດສະພາ 2014 ໃຫ້ສຳເລັດ ແລະ ໄດ້ນຳໃຊ້ເປັນປົກກະຕິ.
ຢ່າງໃດກໍດີ ເຫດການໃນຄັ້ງນີ້ແມ່ນບໍ່ມີຄົນໄດ້ຮັບບາດເຈັບ ຫຼື ເສຍຊີວິດ ແຕ່ຈະສາມາດນຳມາເປັນສະຕິເຕືອນໃຈໃຫ້ຜູ້ທີ່ຊົມໃຊ້ລົດບັນທຸກທັງຫຼາຍຈົ່ງເພີ່ມຄວາມລະມັດລະວັງຂຶ້ນຕື່ມໃນການຂົນສົ່ງໃຫ້ຢູ່ລະດັບທີ່ພໍເໝາະ ທັງນີ້ ກໍ ເພື່ອເປັນການບໍ່ໃຫ້ເສຍຫາຍຂອງຊັບສິນຂອງຕົນ ແລະ ຂອງລວມໝູ່.
ທີ່ມາ http://www.sedthakid.la/khao/18408.spc