ນັກວິໄຈໃນບຣາຊິວພົບເຫັນ ຫິນທີ່ມີປລາສະຕິກເປັນສ່ວນປະກອບ ທີ່ເກາະຕຣິນດາຈີ ເຊິ່ງເປັນແຫຼ່ງວາງໄຂ່ຂອງເຕົ່າຕະນຸ (Green sea turtle) ແລະ ຢູ່ຫ່າງຈາກແຜ່ນດິນໃຫຍ່ເປັນພັນກິໂລແມັດ ນີ້ເປັນສິ່ງເຕືອນເຖິງມົນລະພິດ ຫຼື ຂີ້ເຫຍື້ອທີ່ຄົນເຮົາສ້າງ ເຊິ່ງມັນໄດ້ກະຈາຍໄປທຸກມຸມຂອງໂລກ.
ກ້ອນຫິນທີ່ມີບາງສ່ວນເປັນສີຂຽວສົດ ຄື ຫິນທີ່ມີປລາສະຕິກລະລາຍປົນເປັນສ່ວນໜຶ່ງຂອງກ້ອນຫິນ ຖືກພົບເຫັນໃນເກາະຕຣິນດາຈີ ທີ່ເປັນເກາະພູເຂົາໄຟບຣາຊິວ.
ນັກວິໄຈເອີ້ນສິ່ງນີ້ວ່າ “plastiglomerates” ແມ່ນຫິນຊະນິດໃໝ່ທີ່ ສະມາຄົມທໍລະນີວິທະຍາອາເມຣິກາ ຄົ້ນພົບໃນປີ 2013 ມັນກໍ່ຕົວມາຈາກປລາສະຕິກເມື່ອຖືກຄວາມຮ້ອນ ແລະ ລະລາຍຮວມຕົວກັບ ຊາຍ ຫິນ ເປືອກຫອຍ ແລະ ປະກາຮັງ ເຊິ່ງປລາສະຕິກຈະຕິດເອົາສິ່ງຕ່າງໆເຫຼົ່ານີ້ມາຕິດກັນ.
ເກາະແຫ່ງນີ້ຕັ້ງຢູ່ລັດ Espirito Santo ຂອງບຣາຊິວ ມັນໄກເຖິງ 1.140 ກິໂລແມັດ ເຮັດໃຫ້ການຄົ້ນພົບນີ້ສະທ້ອນເຖິງລະດັບຄວາມຮຸນແຮງຈາກມົນລະພາວະຂອງຄົນເຮົາທີ່ສ້າງຂຶ້ນມາ ແລະ ກຳລັງສົ່ງກະຈາຍໄປທຸກບ່ອນ.
ຈາກການກວດສອບຂອງ “ຫິນປລາສະຕິກ” ໄດ້ຮູ້ວ່າ ມັນມາຈາກປລາສະຕິກທົ່ວໄປທີ່ຖືກທະເລພັດມາສະສົມຢູ່ເທິງແຄມຝັ່ງ ແລະ ເມື່ອອຸນຫະພູມສູງຂຶ້ນ ປລາສະຕິກ ກໍລະລາຍຈົນມາຮວມເປັນອັນດຽວກັນ.
ເກາະແຫ່ງນີ້ເປັນສະຖານທີ່ໃນການອະນຸລັກເຕົ່າຕະນຸ ທີ່ສຳຄັນຂອງໂລກ ໃນແຕ່ລະປີຈະມີເຕົ່າຫຼາຍພັນຕົວ ມາໄຂ່ຢູ່ເທິງເກາະ ແລະ ເທິງເກາະນີ້ມັນປອດໄພເພາະບໍ່ມີປະຊາຊົນອາໄສຢູ່ ແຕ່ມີພຽງທະຫານທີ່ມາຕັ້ງຖານເພື່ອເຝົ້າລະວັງເຕົ່າເຫຼົ່ານີ້.
ແຫຼ່ງຂ່າວ Reuter