ກະຊວງແຜນການ ແລະ ການລົງທຶນ ແລະ ອົງການສະຫະປະຊາຊາດ ກອງທຶນສຳລັບປະຊາກອນ ໄດ້ຈັດພິທີເຜີຍແຜ່ບົດລາຍງານ ສະຖານະພາບປະຊາກອນໂລກ ປະຈຳປີ 2013 ພາຍໃຕ້ຫົວຂໍ້ “ການເປັນແມ່ໃນເດັກ” ບັນຫາທີ່ທ້າທາຍຂອງການຖືພາໃນໄວໜຸ່ມ ໄດ້ຈັດຂຶ້ນໃນວັນທີ 28 ພະຈິກ 2013 ທີ່ໂຮງແຮມລາວພລາຊາ ໂດຍເປັນປະທານຮ່ວມຂອງທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການ ກະຊວງແຜນການ ແລະ ການລົງທຶນ ແລະ ທ່ານນາງ ແອັສເຕີ ມຸຍ ຜູ້ຕາງໜ້າອົງການສະຫະປະຊາຊາດ ກອງທຶນສຳລັບປະຊາກອນ ໂດຍມີບັນດາທ່ານຜູ້ຕາງໜ້າຈາກບັນດາກະຊວງ ຂະແໜງການ ແລະ ພາກສ່ວນຕ່າງໆເຂົ້າຮ່ວມ.
ພິທີດັ່ງກ່າວໄດ້ຈັດຂຶ້ນ ເພື່ອເຜີຍແຜ່ບົດລາຍງານສະຖານະພາບຂອງປະຊາກອນໂລກ ເຊິ່ງໃນປີນີ້ ເນື້ອໃນຂອງບົດລາຍງານໄດ້ເນັ້ນໃສ່ ບັນຫາສິ່ງທ້າທາຍຂອງການຖືພາໃນໄວໜຸ່ມ ແລະ ບັນດາຜົນກະທົບຈາກການຖືພາທີ່ມີຕໍ່ການສຶກສາ ສຸຂະພາບ ແລະ ໂອກາດໃນການມີວຽກເຮັດງານທຳຂອງໄວໜຸ່ມຍິງ ພ້ອມນັ້ນ ກໍໄດ້ນຳສະເໜີບັນດາມາດຕະການດຳເນີນການຕ່າງໆ ເພື່ອຫຼຸດຜ່ອນທ່າອ່ຽງການຖືພາຂອງໄວໜຸ່ມ ການປົກປ້ອງສິດ ແລະ ຄຸນນະພາບຊີວິດຂອງເດັກຍິງ.
ອີງຕາມບົດລາຍງານສະຖານະພາບຂອງປະຊາກອນໂລກໄດ້ໃຫ້ຮູ້ວ່າ: ໃນທົ່ວໂລກ ເດັກຍິງທີ່ທຸກຍາກຂາດການສຶກສາ ແລະ ຢູ່ເຂດຊົນນະບົດ ແມ່ນມີທ່າອ່ຽງທີ່ຈະຖືພາຫຼາຍກວ່າເດັກຍິງທີ່ຢູ່ໃນຄອບຄົວທີ່ຮັ່ງມີ ມີການສຶກສາ ແລະ ຢູ່ໃນຕົວເມືອງ ນອກນີ້ ເດັກຍິງຊົນເຜົ່າ ກຸ່ມດ້ອຍໂອກາດ ຫຼື ຜູ້ທີ່ບໍ່ສາມາດເຂົ້າເຖິງການບໍລິການສາທາລະນະສຸກ ແລະ ສຸຂະພາບຈະເລີນພັນ ກໍ່ມີຄວາມສ່ຽງສູງເຊັ່ນກັນ ການຖືພາແມ່ນມີຜົນຕາມມາອັນຮ້າຍແຮງຕໍ່ສຸຂະພາບຂອງເດັກຍິງ ຍ້ອນຮ່າງກາຍຍັງບໍ່ທັນຂະຫຍາຍຕົວຢ່າງເຕັມສ່ວນ ມີຊາວໜຸ່ມຍິງປະມານ 70.000 ຄົນ ໃນປະເທດທີ່ກຳລັງພັດທະນາ ເສຍຊີວິດໃນແຕ່ລະປີ ຍ້ອນສາເຫດທີ່ເກີດຈາກການຖືພາ ແລະ ເກີດລູກ.
ການຖືພາຂອງໄວໜຸ່ມຍິງ ຫຼື ການຖືພາກ່ອນໄວອັນຄວນ ແມ່ນເກີດຈາກຫຼາຍປັດໄຈ ເປັນຕົ້ນແມ່ນຄວາມທຸກຍາກ ຄວາມກົດດັນຂອງສະພາບແວດລ້ອມອ້ອມຂ້າງ ການຍອມຮັບຂອງຊຸມຊົນ ແລະ ຄອບຄົວຕໍ່ກັບການແຕ່ງງານກ່ອນໄວອັນຄວນ ການຂາດຄວາມພະຍາຍາມທີ່ຈະໃຫ້ເດັກຍິງຮຽນໜັງສືຕໍ່ ແລະ ໃນຫຼາຍກໍລະນີການຖືພາ ກໍ່ແມ່ນຜົນຈາກຄວາມຮຸນແຮງ ຫຼື ການບັງຄັບຂົ່ມຂູ່ທາງເພດໃນຫຼາຍປະເທດ ແມ່ນມີວິທີການ ແລະ ມາດຕະການຕ່າງໆ ເພື່ອຫຼຸດຜ່ອນການຖືພາຂອງໄວໜຸ່ມຍິງ.