ສະໜາມກິລາເຕະບານຫຍ້າທຽມ ຊ້າງ ເອັຟຊີ ເປີດສະໜາມ ຮັບສະໝັກນັກກິລາເຕະບານ ຮຸ່ນສືບທອດ ຕັ້ງແຕ່ອາຍຸ 5 ປີ ຂຶ້ນໄປ ແບບບໍ່ຈຳກັດ ແລະ ເນັ້ນເອົາຜູ້ທີ່ມີໃຈມັກຮັກ ກັບການຫຼິ້ນກິລາປະເພດດັ່ງກ່າວ ເພື່ອຈະປັ້ນໃຫ້ກາຍເປັນ ນັກກິລາທີ່ມີພອນສະຫວັນດີເດັ່ນ ແລະ ສາມາດກ້າວຂຶ້ນໄປ ເປັນນັກກິລາລະດັບຊາດ ກໍ່ຄື ຕິດທີມຊາດ ໃນອະນາຄົດ ໂດຍແມ່ນ ບັນດາອະດີດນັກເຕະທີມ ຊາດລາວ ທີ່ມີຊື່ສຽງໂດ່ງດັງມາເປັນຜູ້ຖ່າຍທອດໃຫ້.
ຕາມການເປີດເຜີຍຂອງ ທ່ານ ສຸລິກັນ ຫຼວງບຸນຍັງ ເຈົ້າສະໜາມເຕະບານຫຍ້າທຽມ ຊ້າງ ເອັຟຊີ ໃຫ້ຮູ້ວ່າ: ເພື່ອເປັນການປະຕິບັດຕາມຂັ້ນເທິງ ກໍ່ຄື ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ຫ້ອງການສຶກສາທິການ ແລະ ກິລາ ເມືອງໄຊເຊດຖາ ໃນການສົ່ງເສີມ ຄົນທ້ອງຖິ່ນໃຫ້ມີການເຄື່ອນໄຫວ ຫຼິ້ນກິລາ ເພື່ອສຸຂະພາບ ແລະ ຕ້ານປາກົດຫຍໍ້ທໍ້ຕ່າງໆທີ່ເກີດຂຶ້ນ ໃນສັງຄົມປັດຈຸບັນ ກໍ່ຄື ສ້າງໂອກາດໃຫ້ເດັກນ້ອຍລາວ ໃຊ້ເວລາຫວ່າງໃຫ້ເກີດຜົນປະໂຫຍດ ລີກເວັ້ນບັນຫາຢາເສບຕິດ. ຄຽງຄູ່ກັນນັ້ນ, ກໍ່ຍັງເປັນການສົ່ງເສີມໃຫ້ມີການພັດທະນາ ແຕ່ຂັ້ນພື້ນຖານກ້າວສູ່ລະດັບເລີດ ປັ້ນໃຫ້ກາຍເປັນນັກກິລາລະດັບເມືອງ, ນະຄອນຫຼວງວຽງຈັນ ແລະ ກ້າວສູ່ລະດັບຊາດ ກໍ່ຄື ຕິດທີມຊາດໃນອະນາຄົດ. ດັ່ງນັ້ນ, ສະໜາມຊ້າງ ເອັຟຊີ ຂອງພວກເຮົາ ຈຶ່ງໄດ້ມີເຈດຈຳນົງ ໃນການສ້າງຕັ້ງສູນເຝິກແອບນັກກິລາເຕະບານຮຸ່ນສືບທອດ ເພື່ອສ້າງໃຫ້ໄປຕາມຈຸດປະສົງທີ່ໄດ້ວາງໄວ້.
ທ່ານ ສຸລິກັນ ຫຼວງບຸນຍັງ ຍັງກ່າວໃຫ້ຊາບຕື່ມອີກວ່າ: ໃນການສ້າງຕັ້ງ ສູນເຝິກແອບນັກກິລາເຕະບານ ຂັ້ນພື້ນຖານຄັ້ງນີ້ ໄດ້ເຊີນເອົາອະດີດນັກກິລາ ບານເຕະທີມຊາດລາວ ເຊິ່ງປະກອບມີ ດາວອນ ວົງສາມະນີ ນັກເຕະສາລະພັດປະໂຫຍດ ອະດີດນັກເຕະສະໂມສອນ ນະຄອນຫຼວງວຽງຈັນ, ແສງເພັດ ທອງມະຈັນ ແບັກຊ້າຍ ສະໂມສອນໂຍທາທິການ ແລະ ຂົນສົ່ງ ແລະ ແສງເພັດ ບຸນທິສານ ອະດີດຜູ້ຮັກສາປະຕູ ສະໂມສອນ ມະຫາວິທະຍາໄລແຫ່ງຊາດ ເປັນຜູ້ເຝິກສອນ ຖ່າຍທອດຄວາມຮູ້ຄວາມສາມາດໃຫ້. ດັ່ງນັ້ນ, ຫາກພໍ່-ແມ່ຜູ້ປົກຄອງທ່ານໃດ ທີ່ມີຄວາມສົນໃຈຢາກຈະສົ່ງເສີມ ລູກໃຫ້ເປັນໄປຕາມແນວທາງນະໂຍບາຍ ຊຸກຍູ້ໃຫ້ລູກຫຼານມີການພັດທະນາກິລານີ້ ກ້າວໄປຕາມ ຄວາມໄຝ່ຝັນທີ່ຕ້ອງການ ກໍ່ສາມາດພົວພັນ ແລະ ຕິດຕໍ່ໄດ້ທີ່ເບີໂທ 02022496622 ໄດ້ຕະຫຼອດເວລາ ສະໜາມເຕະບານ ຊ້າງ ເອັຟຊີ ມີຄວາມຍິນດີໃຫ້ການຕ້ອນຮັບສະເໝີ ແລະ ສະໜາມພວກເຮົາ ຕັ້ງຢູ່ເຂດບ້ານໜອງໜ່ຽງ ເມືອງໄຊເຊດຖາ ນະຄອນຫຼວງວຽງຈັນ.
ຂ່າວຈາກ:
ຕິດຕາມຂ່າວເສດຖະກິດລາວ ກົດໄລຄ໌ເລີຍ!