ສະມາຄົມເຟີນີເຈີລາວຮ່ວມກັບກົມສົ່ງເສີມການຄ້າ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສູນການຄ້າ ລາວ-ໄອເຕັກ ກຽມຈັດງານວາງສະແດງເຄື່ອງເຮືອນລາວ ຄັ້ງທີ 4 ປະຈຳປີ 2019 ຊຶ່ງຈະຈັດຂຶ້ນລະຫວ່າງວັນທີ 6-14 ກໍລະກົດທີ່ສູນການຄ້າລາວ-ໄອເຕັກ (ຕຶກເກົ່າ).
ທັງນີ້ ພາຍໃນງານແມ່ນຈະລວມເອົາຜະລິດຕະພັນເຄື່ອງເຮືອນລາວທີ່ຜະລິດດ້ວຍໄມ້ຫວາຍ ໄມ້ປ່ອງ ແລະ ຈາກວັດສະດຸເສດເຫຼືອຕ່າງໆທີ່ນຳມາແປຮູບໃຫ້ມີຫຼາກຫຼາຍສີສັນ ຄາດວ່າຈະມີການຈໍລະຈອນຊື້-ຂາຍສິນຄ້າປະມານ 10 ຕື້ກີບ ແລະ ຈະມີມວນຊົນເຂົ້າຊົມງານຫຼາຍກວ່າ 200.000 ຄົນ.
ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວໄດ້ກ່າວໃນງານຖະ ແຫຼງຂ່າວວາງສະແດງເຄື່ອງເຮືອນລາວວ່າ ງານວາງສະແດງໃນຄັ້ງນີ້ແມ່ນໄດ້ເຊີນເອົາບັນດາຫົວໜ່ວຍທຸລະກິດເຟີນີເຈີໄມ້ໃນນະຄອນຫຼວງ ແລະ ບັນດາແຂວງໃນທົ່ວປະເທດນຳເອົາຜະລິດຕະພັນຂອງຕົນເອງທີ່ຜະລິດດ້ວຍໄມ້ ຫວາຍ ໄມ້ປ່ອງ ແລະ ຈາກວັດສະດຸເສດເຫຼືອຕ່າງໆທີ່ນຳມາແປຮູບເປັນເຄື່ອງເຟີນີເຈີ ຜະລິດຕະພັນຫັດຖະກຳ ເຄື່ອງແກະສະຫຼັກ ເຄື່ອງປະດັບຕົບແຕ່ງ ແລະ ເອ້ຢ້ອງພາຍໃນເຮືອນ ອຸປະກອນການຮັບໃຊ້ ເຄື່ອງມື ແລະ ເຄື່ອງຈັກຕ່າງໆທີ່ກ່ຽວກັບການຜະລິດເຄື່ອງເຟີນີເຈີໄມ້ ແລະ ອື່ນໆ ນອກນີ້ ຍັງເປັນການສົ່ງເສີມການຊື້-ຂາຍສິນຄ້າ ແລະ ຊອກຫາລູກຄ້າ ທັງເປັນເວທີເປີດກວ້າງແລກປ່ຽນບົດຮຽນ ແລະ ປະສົບການລະຫວ່າງບັນດາຫົວໜ່ວຍທຸລະກິດດ້ວຍກັນ ແລະ ເປີດໂອກາດໃຫ້ຜູ້ຊື້ເຂົ້າເຖິງຜູ້ຜະລິດໂດຍກົງ.
ພາຍໃນງານຍັງມີກິດຈະກຳທີ່ໜ້າສົນໃຈຫຼາຍຢ່າງເຊັ່ນ ຝຶກອົບຮົມອອກແບບເຄື່ອງເຟີນີເຈີຈາກຊ່ຽວຊຽນຍີ່ປຸ່ນ ສາທິດການຜະລິດເຄື່ອງເຟີນີເຈີໄມ້ ແລະ ແກະສະຫຼັກໄມ້ເສດ ປະກວດຮ້ອງເພງເຍົາວະຊົນສຽງດີ ຄອນເສິດລາວ-ໄທ ແລະ ອື່ນໆ.
ໂດຍ: ສະຫະລັດ ວອນທິວົງໄຊ