ອົງການກວດສອບແຫ່ງລັດ ກວດສອບສາມາດພົບເຫັນບັນຫາຫຼາຍຢ່າງທີ່ເປັນການລະເມີດລະບຽບການ ໃນຫຼາຍຂະແໜງການ ແລະ ຂະແໜງການອື່ນໆ ເຮັດໃຫ້ການເກັບລາຍຮັບເຂົ້າງົບປະມານບໍ່ໄດ້ຕາມແຜນການ ວາລະດຳເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ VIII ວັນທີ 28 ຕຸລາ 2016 ໂດຍເປັນປະທານຂອງທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ.
ຜູ້ແທນກອງປະຊຸມໄດ້ຮັບຟັງບົດລາຍງານ ກ່ຽວກັບຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2014-2015 ແລະ ການຈັດຕັ້ງປະຕິບັດແຜນກວດສອບແຫ່ງລັດ ສົກປີ 2015-2016 ແລະ ທິດທາງແຜນການ ການເຄື່ອນໄຫວກວດສອບ ປະຈຳປີ 2017 ບົດລາຍງານຂອງອົງການກວດກາລັດຖະບານ ກ່ຽວກັບການແກ້ໄຂຜົນການກວດສອບແຫ່ງລັດ ສົກປີ 2013-2014 ແລະ ບົດລາຍງານຂອງອົງການກວດສອບແຫ່ງລັດ ແລະ ອົງການກວດກາລັດຖະບານ ທີ່ສະເໜີໂດຍທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ລາຍງານຜົນການກວດສອບໃນໄລຍະຜ່ານມາ ສົກປີ 2015-2016 ໄດ້ຂຶ້ນແຜນກວດສອບຈຳນວນ 89 ເປົ້າໝາຍ ດຳເນີນການກວດສອບຕົວຈິງໄດ້ 93 ເປົ້າໝາຍ ໃນນັ້ນ ສຳເລັດການກວດສອບຕາມແຜນ 89 ເປົ້າໝາຍ ແລະ ຕາມຄຳສະເໜີ 4 ເປົ້າໝາຍ ຕາມຂົງເຂດການສ້າງລາຍຮັບ ແລະ ຂະແໜງການທີ່ມີໂຄງການລົງທຶນຂອງລັດ ແລະ ລາຍຈ່າຍໃນລະບົບງົບປະມານ-ຄັງເງິນທີ່ມີຄວາມສ່ຽງ ເອົາໃຈໃສ່ຍົກລະດັບຄຸນະພາບການກວດສອບສົກປີ 2015-2016 ໄດ້ສຳເລັດສົ່ງບົດແຈ້ງຜົນກວດສອບໃຫ້ເປົ້າໝາຍ ຖືກກວດສອບ ຈຳນວນ 90 ສະບັບ ລວມທັງຜົນກວດສອບຂອງສົກປີຜ່ານມາ ເພື່ອໃຫ້ອົງການຈັດຕັ້ງລັດ ທະນາຄານ ວິສາຫະກິດ ໂຄງການເງິນກູ້ຢືມ ແລະ ຊ່ວຍເຫຼືອລ້າ ກວດກາຄືນ ແລະ ແຕ່ງຕັ້ງຄະນະຮັບຜິດຊອບແກ້ໄຂຜົນກວດສອບ ສົກປີ 2015-2016 ໄດ້ຂຶ້ນແຜນລາຍຈ່າຍງົບປະມານຈຳນວນ 44,65 ຕື້ກີບ ໄດ້ຮັບຕົວເລກງົບປະມານ ຈຳນວນ 23,40 ຕື້ກີບ ແລະ ທ້າຍປີງົບປະມານ ໄດ້ດັດແກ້ເພີ່ມເຕີມຈຳນວນ 1,50 ຕື້ກີບ ລວມທັງໝົດ 24,90 ຕື້ກີບ ໃນນັ້ນ ນຳໃຊ້ເຂົ້າໃນການດຳເນີນກວດສອບຕົວຈິງ 3,68 ຕື້ກີບ ອົງການກວດສອບສູນກາງ ແລະ ອົງການກວດສອບປະຈຳພາກກາງ ໄດ້ນຳໃຊ້ລາຍຮັບວິຊາການຈາກການກວດສອບຫົວໜ່ວຍວິສາຫະກິດ ທະນາຄານລັດ ໂຄງການເງິນກູ້ຢືມ-ຊ່ວຍເຫຼືອລ້າຈາກຕ່າງປະເທດ ຈຳນວນ 827 ລ້ານກີບ ເພື່ອດຳເນີນກວດສອບເປົ້າໝາຍ ຈາກນັ້ນ ສະມາຊິກສະພາແຫ່ງຊາດ (ສສຊ) ຫຼາຍທ່ານກໍ່ໄດ້ປະກອບຄຳຄິດຄຳເຫັນ ແລະ ຄຳຖາມເຈາະຈິ້ມໃສ່ບົດລາຍງາຍໃຫ້ສອດຄ່ອງກັບສະພາບຄວາມເປັນຈິງ.
ຂ່າວຈາກ: ສຳນັກຂ່າວເອບີຊີ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!