ພາ​ຍຸ​ຫິ​ມະ​ຈູ​ໂນ ພັດ​ຖະ​ຫລົ່ມ​ສະ​ຫະ​ລັດ ປະ​ຊາ​ຊົນ​ໄດ້​ຮັບ​ຄວາມ​ເດືອດ​ຮ້ອນ​ກ່​ວາ 60 ລ້ານ​ຄົນ ທາງ​ການ​ສັ່ງ​ຍົກ​ເລີກ​ຖ້ຽວ​ບິນ​ເຂົ້າ-ອອກ ກ່​ວາ 6,500 ຖ້ຽວ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 27 ມັງ​ກອນ​ນີ້​ວ່າເມືອງ​ນິວຢອກ ແລະ ເມືອງ​ອື່ນໆ ໃນ​ພາກ​ຕາ​ເວັນ​ອອກ​ສຽງ​ເໜືອ​ຂອງ​ສະ​ຫະ​ລັດ ຖືກ​ປົກ​ຄຸມ​ດ້ວຍ​ພາ​ຍຸ​ຫິ​ມະ ຫລັງ​ຖືກ​ພາ​ຍຸ​ຫິ​ມະ​ຈູ​ໂນພັດ​ຖະ​ຫລົ່ມ ໂດຍ​ຄາດ​ອາດ​ມີ​ຫິ​ມະ​ໜາ​ເຖິງ 90 ຊັງ​ຕີ​ແມັດ, ທາງ​ການ​ໄດ້​ປະ​ກາດ​ເຕືອນ​ຫ້າມ​ຍານ​ພາ​ຫະ​ນະ​ທຸກ​ຊະ​ນິດ ສັນ​ຈອນ​ໃນ​ເມືອງ​ນິວຢອກ ເລີ່ມ​ແຕ່​ເວ​ລາ 23:00 ໂມງ ຂອງ​ຄືນ​ວັນ​ອັງ​ຄານ ແລະ ອາດ​ຈະ​ລວມ​ເຖິງ​ການ​ບໍ​ລິ​ການ​ລົດ​ໄຟ​ຟ້າ​ໃຕ້​ດິນ​ອີກ​ດ້ວຍ.

ຂໍ້​ຫ້າມ​ດັ່ງ​ກ່າວ​ນີ້ ໄດ້​ຖືກ​ປະ​ກາດ​ໃນ​ຫລາຍ​ລັດ ເຊິ່ງ​ໄພ​ທຳ​ມະ​ຊາດ​ທີ່​ເກີດ​ຂຶ້ນ ໄດ້​ສົ່ງ​ຜົນ​ກະ​ທົບ​ຕໍ່​ປະ​ຊາ​ຊົນ​ໃນ​ພື້ນ​ທີ່​ ປະ​ມານ 60 ລ້ານ​ຄົນ ໂດຍ​ມີ​ຖ້ຽວ​ບິນ​ຖືກ​ຍົກ​ເລີກ 6,500 ຖ້ຽວ ທີ່​ຈະ​ເດີນ​ທາງ​ເຂົ້າ​ອອກ​ສະ​ໜາມ​ບິນ ຕະ​ຫລອດ​ຊາຍ​ຝັ່ງ​ຕາ​ເວັນ​ອອກ​ຂອງ​ສະ​ຫະ​ລັດ, ຮ້ານ​ຄ້າ ແລະ ໂຮງ​ຮຽນ​ໃນ​ພື້ນ​ທີ່​ຖືກ​ສັ່ງ​ປິດ​ຕັ້ງ​ແຕ່​ຕອນ​ເຊົ້າ​ຂອງ​ມື້​ວັນ​ຈັນ​ທີ 26 ມັງ​ກອນ​ເປັນ​ຕົ້ນ​ມາ.