ສຳນັກຂ່າວ BBC ລາຍງານໃນວັນທີ 7 ພະຈິກ 2024 ນີ້ວ່າ: ໂດໂນ ທຣັມ ກຽມກັບເຂົ້າສູ່ທຳນຽບຂາວອີກຄັ້ງ ພ້ອມໃຫ້ຄຳໝັ້ນໃນປະເດັນຕ່າງໆ ບໍ່ວ່ານະໂຍບາຍກ່ຽວກັບຜູ້ອົບພະຍົບຍ້າຍຖິ່ນຖານ, ເສດຖະກິດ ແລະ ສົງຄາມໃນຍູເຄຣນ.
ຫຼັງຈາກທົ່ວໂລກໄດ້ຮັບຊາບຜົນການເລືອກຕັ້ງປະທານາທິບໍດີສະຫະລັດຄົນທີ 47 ແລ້ວໃນວັນທີ 6 ພະຈິກ 2024 ຜ່ານມາ, ໂດໂນ ທຣັມ ອາດີດປະທານາທິບໍດີຄົນທີ 45 ຂອງສະຫະລັດຈາກພັກ ລີພັບລິກັນ ໄດ້ກັບມາເປັນປະທານາທິບໍດີຄົນທີ 47 ໄດ້ສຳເລັດ ແລະ ມາຕິດຕາມໄປພ້ອມມໆກັັນວ່າ 7 ສິ່ງທີ່ ໂດໂນ ທຣັມ ຈະເຮັດຫຼັງຂຶ້ນເປັນປາທານາທິບໍດີສະໄໝທີ 2 ມີຫຍັງແນ່?
- ເນລະເທດຜູ້ອົບພະຍົບຜິດກົດໝາຍໃຫ້ກັບຄືນສູ່ປະເທດ
ຈຳນວນການຂ້າມພົມແດນທາງໃຕ້ຂອງສະຫະລັດ ເປັນສະຖິຕິສູງທີ່ສຸດໃນຊ່ວງປາຍປີທີ່ແລ້ວ ສະໄໝລັດຖະບານພາຍໃຕ້ການນຳພາຂອງປະທານາທິບໍດີ ໂຈ ໄບເດັນ ແລະ ຮອງປະທານາທິບໍດີ ຄາມາລາ ແຮຣິສ ກ່ອນຈະຫຼຸດລົງໃນປີ 2024. - ຂັບເຄື່ອນເສດຖະກິດ ແລະ ພາສີ
ທຣັມໃຫ້ສັນຍາວ່າຈະຢຸດ ພາວະເງິນເຟີ້ ເຊິ່ງພຸ່ງຂຶ້ນສູງເປັນປະຫວັດສາດ ນອກຈາກນີ້ຍັງໃຫ້ຄຳໝັ້ນວ່າຈະ ຫຼຸດພາສີຢ່າງກວ້າງຂວາງ ໂດຍສານຕໍ່ການປະຕິຮູບທີ່ເລີ່ມໃນປີ 2017 ໂດຍການສະເໜີໃຫ້ຍົກເວັ້ນພາສີລາຍໄດ້ທີ່ຈັດເກັບຈາກການໄດ້ທິບ ຫຼື ເງິນພິເສດທີ່ໄດ້ຮັບຈາກການບໍລິການ, ຍົກເລີກພາສີການຈ່າຍປະກັນສັງຄົມ ແລະ ຫຼຸດພາສີບຸກຄົນ, ການນຳເຂົ້າສິນຄ້າຈາກຈີນອາດຕ້ອງເສຍພາສີເພີ່ມອີກ 60%. - ໃຫ້ອະໄພຜູ້ກໍ່ຄວາມວຸ່ນວາຍໃນວັນທີ 6 ມັງກອນ 2021
ທຣັມກ່າວວ່າ: ຈະໃຫ້ອິດສະຫຼະພາບ ແກ່ຜູ້ກະທຳຜິດບາງຄົນທີ່ຖືກຕັດສິນວ່າມີຄວາມຜິດຈາກເຫດການກໍ່ຄວາມວຸ່ນວາຍໃນນະຄອນຫຼວງວໍຊິງຕັນ ດີຊີ ເມື່ອວັນທີ 6 ມັງກອນ 2021 ເຊິ່ງໃນຕອນນັ້ນຜູ້ສະໜັບສະໜູນຂອງທຣັມ ເຂົ້າໄປໃນອາຄານລັດທະສະພາສະຫະລັດ ເພື່ອພະຍາຍາມຂັດຂວາງໄຊຊະນະການເລືອກຕັ້ງຂອງໂຈໄບເດັນ ໃນປີ 2020. - ກຽມຈະປົດຄົນເຮັດຄະດີ
ທຣັມກ່າວວ່າ ພາຍໃນ 2 ນາທີຫຼັງຈາກທີ່ໄດ້ເປັນປະທານາທິບໍດີ ເຂົາຈະເຊັນສັ່ງປົດ ໄອຍະການມີປະສົບການ ທີ່ເປັນຜູ້ນຳການສອບ-ສວນ ຄະດີອາຍາ 2 ຄະດີຕໍ່ຕົວເຂົາ. - ຢຸດສົງຄາມໃນຍູເຄຣນ
ທຣັມໃຫ້ຄຳໝັ້ນວ່າ: ຈະຢຸດຕິຄວາມຂັັດແຍ່ງລະຫວ່າງຣັດເຊຍ ກັບ ຍູເຄຣນ ພາຍໃນ 24 ຊົ່ວໂມງ ຜ່ານການເຈລະຈາ. - ບໍ່ສັ່ງຫ້າມການທຳແທ້ງ
ທຣັມກ່າວວ່າ: ແຕ່ລະລັດຄວນມີເສລີພາບໃນການກຳນົດກົດໝາຍກ່ຽວກັບການທຳແທ້ງ ຕາມກົດໝາຍຂອງລັດນັ້ນໆ. - ຕັດກົດເກນດ້ານສິ່ງແວດລ້ອມ
ຈະເພີ່ມການຜະລິດເຊື້ອໄຟໃນສະຫະລັດ ໂດຍສັນຍາວ່າໃນມື້ທຳອິດໃນການເຂົ້າຮັບຕຳແໜ່ງ ຈະສັ່ງໃຫ້ມີການເຈາະນ້ຳມັນ ແທນການສະໜັບສະໜູນພະລັງງານໝູນວຽນ ເຊັ່ນ: ພະລັງງານລົມ ນອກຈາກນີ້ຍັງຕ້ອງການເປີດພຶ້ນທີ່ເຂດອາກຕິກເພື່ອການຂຸດເຈາະນ້ຳມັນ ໂດຍອ້າງວ່າຈະຊ່ວຍຫຼຸດຄ່າໃຊ້ຈ່າຍດ້ານພະລັງງານ.
ທີ່ມາ: BBC