ສຳນັກຂ່າວຕ່າງປະເທດລາຍງານເມື່ອວັນທີ 29 ຕຸລາ 2018 ວ່າ ສຳນັກງານການບິນພົນລະເຮືອນແຫ່ງຊາດອິນໂດເນເຊຍອອກຖະແຫຼງການວ່າ ເຮືອບິນໂບອິ້ງ 737 Max8 ທ້ຽວບິນ JT610 ຂອງສາຍການບິນ Lion Air ທີ່ອອກເດີນທາງຈາກນະຄອນຫຼວງຈາກາຣ໌ຕາ ມຸ່ງໜ້າໄປສູ່ເມືອງ Pangkal Pinang ທາງພາກເໜືອຂອງອິນໂດເນເຊຍ ເມື່ອເວລາ 06.33 (ຕາມເວລາທ້ອງຖິ່ນ) ໄດ້ເກີດອຸບັດເຫດຕົກລົງກາງທະເລ ຫຼັງຈາກຂຶ້ນບິນໄດ້ພຽງ 13 ນາທີ.
ໂດຍລະຫວ່າງບິນທີ່ລະດັບ 1,524 ແມັດ ນັກບິນໄດ້ຕິດຕໍ່ມາທີ່ຫໍບັງຄັບການເພື່ອຂໍອະນຸຍາດວົນກັບຄືນສະໜາມບິນ ແຕ່ຍັງບໍ່ທັນດຳເນີນການເຮືອບິນລຳດັ່ງກ່າວກໍ່ຫາຍໄປຈາກຈໍເລດ້າ ແລະ ຫໍບັງຄັບການບິນບໍ່ສາມາດຕິດຕໍ່ໄດ້ອີກເລີຍ ເຊິ່ງຕໍ່ມາກໍ່ໄດ້ຮັບການຢືນຢັນວ່າເຮືອບິນດັ່ງກ່າວເກີດອຸບັດເຫດຕົກລົງທະເລນອກຝັ່ງເມືອງເບຄາຊີ ແຂວງ ຊວາຕາເວັນຕົກ ຂອງອິນໂດເນເຊຍ.
ຕົກລົງກາງທະເລເລິກປະມານ 30-40 ແມັດ ປະຈຸບັນຍັງບໍ່ມີລາຍງານເພີ່ມເຕີມ ສ່ວນທີມກູ້ໄພແມ່ນກຳລັງດຳເນີນການຄົ້ນຜູ້ສູນຫາຍ.
ຕອນນີ້ໜ້າເວັບໄຊສ໌ຂອງ Lion Air ແມ່ນໄດ້ປ່ຽນໄປເປັນສີດຳ ແລະ ໄດ້ເປີດສາຍດ່ວນໃຫ້ຍາດພີ່ນ້ອງຂອງຜູ້ປະສົບໄພໄດ້ຕິດຕໍ່ເຂົ້າມາໄດ້ທີ່ +62-21-8082-0002.
Lion Air ເປັນສາຍການບິນເອກະຊົນທີ່ໃຫຍ່ທີ່ສຸດຂອງອິນໂດເນເຊຍ ແລະ ຍັງເປັນລູກຄ້າລາຍໃຫຍ່ຂອງເຮືອບິນ Boeing Airbus ແຫ່ງອາຊີອີກດ້ວຍ.
ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: BBC, BLOOMBERG
ຮູບປະກອບ: twitter/flightradar24, khaosod