LFF LAO FORD CUP 2022 ຈະເປີດສາກການແຂ່ງໃນເດືອນສິງຫານີ້

0
1391

ການແຂ່ງຂັນເຕະບານຊິງຂັນ ສຕລ ລາວຟອດ 2022 ຫຼື ລາຍການ LFF LAO FORD CUP 2022 ລາຍການດັ່ງກ່າວ ກຳນົດເອົາ 7 ສະໂມສອນ ທີ່ແຂ່ງຂັນໃນ ເປບຊີ ລາວລີກ 1 ລະດູການ 2022 ມາແຂ່ງຂັນຊີງໄຊກັນໃນເດືອນສິງຫານີ້.

ລາຍການດັ່ງກ່າວ ມີການຈັບສະຫຼາກ ປະກົບຄູ່ແຂ່ງຂັນ ໂດຍກຳນົດສະໂມສອນໃດຈັບຖືກເບີ 7 ແມ່ນຈະໄດ້ເນີດ ຫຼື ໄປຢືນລໍຖ້າໃນຮອບ 4 ທີມສຸດທ້າຍທັນທີ່ ແລະ ໃນຮອບຮອງຊະນະເລີດກໍຈະມີການຈັບສະຫຼາກອີກຄັ້ງໜຶ່ງ ພິເສດການແຂ່ງຂັນລາຍການນີ້ ສະໂມສອນໃດທີ່ມີສະໜາມບ້ານເປັນຂອງຕົນເອງ ກໍຈະໄດ້ສິດນຳໃຊ້ສະໜາມນັ້ນ ເປັນຫຼັກ ສ່ວນທີມໃດບໍ່ມີສະໜາມບ້ານ ແມ່ນຈະໄດ້ໄປເຢື່ອນ.

ຜ່ານການຈັບສະຫຼາກ ຜົນການປະກົດວ່າ ສະໂມສອນ ຈຳປາສັກ ເອັບຊີ ຖືກຈົກໄດ້ເບີ 7 ເປັນທີມເນີດ ຜ່ານເຂົ້າໄປຢືນລໍຖ້າໃນຮອບ 4 ທີມສຸດທ້າຍ.
ສ່ວນຜົນການຈົກສະຫຼາກອີກ 6 ສະໂມສອນ
ສະໂມສອນ ຫຼວງພະບາງ ພົບກັບ ມາສເຕີ ເຊເວັ້ນ ເອັບຊີ ຈະໄດ້ແຂ່ງຂັນທີ່ແຂວງຫຼວງພະບາງ, ວຽງຈັນ ເອັບຊີ ພົບກັບ ເອສຣາ ເອັບຊີ ແຂ່ງຂັນທີ່ສະໜາມກິລາແຫ່ງຊາດ (ຫຼັກ16), ກອງທັບ ພົບກັບ ຊ້າງນ້ອຍແຂ່ງຂັນທີ່ສະໜາມກິລາ ກອງທັບ (ຫຼັກ5)

ລາຍການນີ້ໄດ້ຮັບການສະໜັບສະໜູນຫຼັກໂດຍ ບໍລິສັດ ລາວຟອດ ຊີຕິ້ ຈຳນວນ 35,000 ໂດລາສະຫະລັດ ຕາງໜ້າມອບໂດຍທ່ານ ເວນ ເມັກອິນ ທ໋ອດ ຜູ້ບໍລິຫານ ຈັດການທົ່ວໄປ ບໍລິສັດ ລາວຟອດ ຊີຕິ້ ແລະ ຕາງໜ້າຮັບຂອງທ່ານ ວີເພັດ ສີຫາຈັກ ປະທານ ສຕລ ພິທີມອບ-ຮັບເງິນດັ່ງກ່າວ ແລະ ຈັບສະຫລາກ ໄດ້ຈັດຂຶ້ນໃນວັນທີ 27 ມິຖຸນານີ້ ທີ່ຫ້ອງການ ສຕລ.

ຂໍ້ມູນ: KickoffLaos