ຜູ້ປະກອບການສ້າງປໍ້ານໍ້າມັນໃນທົ່ວປະເທດ ຕ້ອງເປັນຮ້ອນໆໜາວໆແນ່ນອນ ຫຼັງຈາກລັດອອກດຳລັດໃໝ່ວ່າດ້ວຍ ທຸລະກິດນໍ້າມັນເຊື້ອໄຟ ເພື່ອຄຸ້ມຄອງບັນດາປໍ້ານໍ້າມັນໃນທົ່ວປະເທດ ໃຫ້ເຂົ້າສູ່ລະບຽບການເພື່ອຜົນປະໂຫຍດຂອງຜູ້ຊົມໃຊ້.

ໃນໄລຍະຜ່ານມາ, ການສ້າງຕັ້ງ ແລະ ເປີດບໍລິການຈຳໜ່າຍນໍ້າມັນ ເຫັນວ່າຫຼາຍແຫ່ງຍັງບໍ່ເໝາະສົມ ແລະ ບໍ່ຖືກຕາມລະບຽບການຂອງລັດກຳນົດໄວ້, ໃນໄລຍະ 1 ປີທີ່ຜ່ານມາ ເຈົ້າໜ້າທີ່ໆກ່ຽວຂ້ອງກໍ່ໄດ້ຫາລືເພື່ອຮ່າງດຳລັດວ່າດ້ວຍ ທຸລະກິດນໍ້າມັນເຊື້ອໄຟ ເຊິ່ງຫຼ້າສຸດນາຍົກລັດຖະມົນຕີກໍ່ໄດ້ເຊັນອະນຸມັດດຳລັດດັ່ງກ່າວແລ້ວ ເຊິ່ງເຊື່ອວ່າຫາກເຈົ້າໜ້າທີ່ຄຸມເຂັ້ມແທ້ ຫຼາຍປໍ້າກໍ່ຈະປິດຕົວລົງ.

ດຳລັດວ່າດ້ວຍ ທຸລະກິດນໍ້າມັນເຊື້ອໄຟ ເລກທີ 331/ນຍ ນະຄອນຫຼວງວຽງຈັນ ລົງວັນທີ 27 ຕຸລາ 2017, ມີ 11 ພາກ 87 ມາດຕາ ເຊິ່ງມີເນື້ອໃນຄົບຖ້ວນລະອຽດສົມຄວນ. ໃນນັ້ນ, ຈະຂໍຍົກຕົວຢ່າງບາງມາດຕາສຳຄັນຄື: ມາດຕາທີ 7 ຂໍ້ 3 ປໍ້ານໍ້າມັນເຊື້ອໄຟ ລະບຸເພີ່ມຕື່ມໃນຂໍ້ 3.1 ສະຖານທີ່ຕັ້ງຂອງປໍ້ານໍ້າມັນເຊື້ອໄຟຕ້ອງຫ່າງຈາກເຂດຊຸມຊົນ, ໂຮງຮຽນ, ໂຮງໝໍ, ຕະຫຼາດ, ແຫຼ່ງນໍ້າ, ທາງໂຄ້ງ, ທາງແຍກ ແລະ ທາງສູງຊັນ ໜຶ່ງຮ້ອຍແມັດ ( 100 ) ແມັດ ຂຶ້ນໄປ ແລະ ຕ້ອງຫ່າງຈາກປໍ້ານໍ້າມັນເຊື້ອໄຟທີ່ສ້າງຕັ້ງແລ້ວ ໜຶ່ງພັນ ( 1,000 ) ແມັດຂຶ້ນໄປ ຕາມທິດດຽວກັນ ແລະ ບໍ່ນອນຢູ່ໃນເຂດສະຫງວນຂອງທາງຫຼວງທຸກປະເພດ.

ພ້ອມດຽວກັນນັ້ນ, ໃນໝວດທີ 4 ມາດຕາທີ 27 ໃນແຖວສຸດທ້າຍ ລະບຸວ່າ: ໃບຢັ້ງຢືນການເຄື່ອນໄຫວທຸລະກິດນໍ້າມັນເຊື້ອໄຟ ມີອາຍຸນໍາໃຊ້ 2 ປີ ແລະ ສາມາດຕໍ່ໄດ້. ມາດຕາທີ 28 ແຖວສຸດທ້າຍລະບຸວ່າ: ສຳລັບປໍ້ານໍ້າມັນເຊື້ອໄຟທີ່ໄດ້ຮັບການສ້າງຕັ້ງ ແລະ ເຄື່ອນໄຫວ ກ່ອນດຳລັດສະບັບນີ້ ຕ້ອງໄດ້ປັບປຸງເງື່ອນໄຂໃຫ້ສອດຄ່ອງກັບບົດບັນຍັດຂອງມາດຕານີ້ພາຍໃນກຳນົດເວລາສອງປີ ນັບແຕ່ວັນທີ່ດຳລັດສະບັບນີ້ມີຜົນສັກສິດເປັນຕົ້ນໄປ, ຖ້າກາຍສອງປີຍັງບໍ່ສາມາດປັບປຸງສຳເລັດແມ່ນໃຫ້ໂຈະການເຄື່ອນໄຫວ ແລະ ຮື້ຖອນປໍ້າດັ່ງກ່າວ.

ສະນັ້ນ, ຈຶ່ງໝາຍຄວາມວ່າປໍ້າໃດທີ່ຕັ້ງຫ່າງກັນບໍ່ເກີນ 1 ພັນແມັດ, ປໍ້ານໍ້າມັນຕິດຕະຫຼາດ, ຊຸມຊົນ, ທາງໂຄ້ງ ແລະ ອື່ນໆ ແມ່ນມີເວລາຢູ່ 2 ປີທີ່ລັດຈະສັ່ງໂຈະກິດຈະການ ຫຼື ຮື້ຖອນ.

ກ່ອນໜ້ານີ້, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວໃນກອງປະຊຸມປຶກສາຫາລືໃສ່ຮ່າງດຳລັດວ່າດ້ວຍ ທຸລະກິດນໍ້າມັນເຊື້ອໄຟ ທີ່ມີຂຶ້ນວັນທີ 21 ມິຖຸນາ 2016 ໂດຍທ່ານໄດ້ສະເໜີທີ່ປະຊຸມຄົ້ນຄວ້າປະກອບຄຳເຫັນໃສ່ຮ່າງດຳລັດວ່າດ້ວຍ ທຸລະກິດນໍ້າມັນເຊື້ອໄຟ ແລະ ເບິ່ງຄືນປໍ້ານໍ້າມັນທີ່ຢູ່ໃນເຂດຊຸມຊົນທີ່ມີຄວາມສ່ຽງຕໍ່ການເກີດອັກຄີໄພ, ການຕັ້ງປໍ້ານໍ້າມັນ, ການຕັ້ງສາງນໍ້າມັນຄວນກຳນົດແນວໃດ ເພື່ອເຮັດໃຫ້ການຄຸ້ມຄອງ ແລະ ດຳເນີນທຸລະກິດນໍ້າມັນເຊື້ອໄຟມີລະບຽບ, ຮັບປະກັນໄດ້ຄວາມສະຫງົບປອດໄພ ແລະ ເສດຖະກິດຂອງຊາດ.

ຢ່າງໃດກໍ່ຕາມ, ກ່ອນໜ້າດຳລັດຈະຖືກເຊັນຮັບຮອງຫ້ອງການກະຊວງອຸດສາຫະກຳ ແລະ ການຄ້າ ກໍ່ອອກແຈ້ງການເລກທີ 0509/ອຄ.ກຄພນ ລົງວັນທີ 5 ເມສາ 2017 ເຖິງຫົວໜ້າພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງໃນທົ່ວປະເທດ, ປະທານສະມາຄົມນໍ້າມັນເຊື້ອໄຟ ແລະ ອາຍແກ໊ສລາວ, ທ່ານຜູ້ອຳນວຍການບໍລິສັດນໍ້າມັນເຊື້ອໄຟ ເລື່ອງ: ຢຸດຕິການອະນຸຍາດສ້າງຕັ້ງສາງ ແລະ ປໍ້ານໍ້າມັນເຊື້ອໄຟຊົ່ວຄາວ.

ໃນແຈ້ງການແມ່ນ: 1). ໃຫ້ສືບຕໍ່ຢຸດຕິການອອກອະນຸຍາດຂຶ້ນທະບຽນວິສາຫະກິດ ສ້າງຕັ້ງສາງ ແລະ ປໍ້າຍ່ອຍນໍ້າມັນເຊື້ອໄຟ ຕາມແຈ້ງການຂອງຫ້ອງການກະຊວງອຸດສາຫະກຳ ແລະ ການຄ້າ ສະບັບເລກທີ 2800/ຫອຄ, ລົງວັນທີ 12 ຕຸລາ 2016; 2). ໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ສະຫຼຸບລາຍງານການອອກໃບອະນຸຍາດການສ້າງຕັ້ງສາງ ແລະ ປໍ້ານໍ້າມັນເຊື້ອໄຟ ກ່ອນແຈ້ງການສະບັບເລກທີ 2800/ຫຄອ; 3). ໃຫ້ເອົາໃຈໃສ່ກວດກາສະຖານທີ່ສ້າງຕັ້ງປໍ້າ ຕ້ອງໃຫ້ມີໄລຍະຫ່າງຈາກປໍ້າທີ່ມີແລ້ວ 1 ພັນແມັດ ຫ່າງຈາກເຂດຊຸມຊົນ, ຕະຫຼາດ, ໂຮງຮຽນ, ໂຮງໝໍ, ຫ້ວຍນໍ້າລຳເຊ ຕາມທີ່ໄດ້ກຳນົດໄວ້ໃນລະບຽບການ. ສຳລັບການສ້າງຕັ້ງສາງນໍ້າມັນເຊື້ອໄຟ ຕ້ອງປະຕິບັດຕາມລະບຽບການຢ່າງເຂັ້ມງວດ; 4). ໃຫ້ສະມາຄົມນໍ້າມັນເຊື້ອໄຟ ແລະ ອາຍແກ໊ສລາວ ແລະ ບັນດາບໍລິສັດນໍ້າມັນເຊື້ອໄຟ ເອົາໃຈໃສ່ໃນການຄຸ້ມຄອງປໍ້າຕົວແບບ ແລະ ປໍ້າຕົວແທນຂອງຕົນຢ່າງເຂັ້ມງວດ; ການສ້າງຕັ້ງປໍ້ານໍ້າມັນເຊື້ອໄຟທີ່ເປັນຕົວແບບ ແລະ ເປັນຕົວແທນຂອງບໍລິສັດຕົ້ນ ຕ້ອງໄດ້ມີໄລຍະຫ່າງທີ່ກຳນົດໄວ້ໃນ ຂໍ້ 3 ຂ້າງເທິງນີ້, ຖ້າລະເມີດຈະຖືກຕັດຕົວເລກແຜນຈຳໜ່າຍປະຈຳປີ ແລະ ຈະບໍ່ຂຶ້ນທະບຽນວິສາຫະກິດປໍ້ານໍ້າມັນເຊື້ອໄຟ; 5). ສຳລັບປໍ້າທີ່ກຳລັງດຳເນີນການກໍ່ສ້າງຍັງບໍ່ທັນສຳເລັດ ຖ້າບໍ່ໄດ້ຮັບອະນຸຍາດຈາກຂະແໜງການກ່ຽວຂ້ອງໃຫ້ຢຸດຕິຊົ່ວຄາວ ເພື່ອດຳເນີນການຂໍອະນຸຍາດຈຶ່ງສາມາດສືບຕໍ່, ຖ້າໄລຍະຫ່າງຂອງປໍ້າບໍ່ຖືກຕ້ອງຕາມທີ່ໄດ້ກ່າວມາຂ້າງເທິງ ແມ່ນໃຫ້ຢຸດຕິການກໍ່ສ້າງ ແລະ ເຄື່ອນໄຫວ.

ການອອກແຈ້ງການດັ່ງກ່າວ, ເພື່ອປະຕິບັດຕາມທິດຊີ້ນຳຂອງແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 140/ຫສນຍ.ກລຂ ລົງວັນທີ 25 ມັງກອນ 2017 ໃຫ້ກະຊວງອຸດສາຫະກຳ ແລະ ການຄ້າ ຄົ້ນຄວ້າດັດສົມຄືນຈຳນວນບໍລິສັດທີ່ດຳເນີນທຸລະກິດຂາເຂົ້າ – ຂາອອກ ນໍ້າມັນເຊື້ອໄຟໃຫ້ເຫຼືອພຽງ 5 ບໍລິສັດເທົ່ານັ້ນ ໂດຍໃຫ້ຖືເອົາລັດວິສາຫະກິດນໍ້າມັນເຊື້ອໄຟລາວເປັນບຸລິມະສິດ.

ຢ່າງໃດກໍ່ຕາມ, ໃນໄລຍະຜ່ານມາເຫັນວ່າການສ້າງປໍ້ານໍ້າມັນຫຼາຍແຫ່ງຢູ່ໃນນະຄອນຫຼວງວຽງຈັນ ບັນດາແຂວງໃນຂອບເຂດທົ່ວປະເທດ ເຫັນວ່າຍັງມີບາງແຫ່ງບໍ່ຖືກຕ້ອງຕາມລະບຽບທີ່ກຳນົດຄື: ການສ້າງປໍ້າຕ້ອງຫ່າງກັນ 1 ພັນແມັດ ແຕ່ຕົວຈິງມີຫຼາຍແຫ່ງຫ່າງກັນເກືອບບໍ່ຮອດ 500 ແມັດກໍ່ມີ ( ທາງກໍ້າດຽວກັນ ) ແລະ ບາງປໍ້າກໍ່ໃກ້ກັບຕະຫຼາດ, ໂຮງຮຽນ ແລະ ເຂດຊຸມຊົນ.

ແຫລ່ງຂ່າວ: ເສດຖະກິດ-ການຄ້າ.