ບົດລາຍງານທະນາຄານໂລກສະບັບອອກໃໝ່ ໄດ້ລະບຸວ່າ ສປປ ລາວ ແລະ ປາປົວ ນິວກີນີ ທີ່ຍັງມີຄວາມທຸກ ຍາກທີ່ຮ້າຍແຮງໃນລະດັບສູງ, ຄວນສູ້ຊົນເພື່ອຫຼຸດຜ່ອນຄວາມທຸກຍາກໃຫ້ໄວກວ່າເກົ່າດ້ວຍການລົງທຶນໃສ່ການສຶກສາຂັ້ນພື້ນຖານ ແລະສົ່ງເສີມການແຈກຢາຍທາງດ້ານການເງິນໃຫ້ທົ່ວເຖິງ ພ້ອມທັງເສີມຂະຫຍາຍການຊ່ວຍເຫຼືອ ແລະສ້າງຄວາມເຂັ້ມແຂງທາງດ້ານສັງຄົມ.
ໃນບົດລາຍງານໄດ້ນໍາໃຊ້ການຈັດ ປະເທດເປັນຫ້າກຸ່ມ ແລະໃຫ້ຂໍ້ສະເໜີ ແນະກ່ຽວກັບນະໂຍບາຍທີ່ເໝາະສົມ ສະເພາະສໍາລັບແຕ່ລະກຸ່ມເຊັ່ນ: ມາເລເຊຍ ແລະໄທ ຊຶ່ງເປັນກຸ່ມປະເທດທີ່ມີຄວາມອຸດົມຮັ່ງມີທີ່ກ້າວໜ້າ; ຈີນ ແລະ ຫວຽດນາມ ຊຶ່ງເປັນກຸ່ມປະເທດທີ່ຫຼຸດພົ້ນຈາກຄວາມທຸກຍາກໄປສູ່ຄວາມອຸ ດົມຮັ່ງມີ; ອິນໂດເນເຊຍ, ຟີລິບປີນ ແລະກໍາປູເຈຍ ໄດ້ຖືກຖືວ່າເປັນກຸ່ມປະເທດ ທີ່ມີລະດັບຄວາມທຸກຍາກທີ່ຮ້າຍແຮງຕໍ່າ, ແຕ່ກໍຍັງມີຊັ້ນຄົນລະດັບປານກາງ ຈໍານວນໜ້ອຍ; ພວກເຂົາຄວນໃຫ້ບູລິ ມະສິດແກ່ການປັບປຸງຄວາມຄ່ອງຕົວ ທາງດ້ານເສດຖະກິດ ແລະການເຊື່ອມ ສານແຜນງານປ້ອງກັນສັງຄົມ. ບັນດາປະເທດທີ່ມີຄວາມກ້າວໜ້າຊັກຊ້າເຊັ່ນ: ສປປ ລາວ ແລະປາປົວນິວກີນີ ທີ່ຍັງມີຄວາມທຸກ ຍາກທີ່ຮ້າຍແຮງໃນລະດັບສູງ. ສ່ວນບັນດາປະເທດໃນເກາະປາຊີຟິກມີຄວາມແຕກຕ່າງກັນ ແລະຄວນສຸມນະໂຍບາຍຂອງຕົນໃສ່ການຂຸດຄົ້ນກາລະໂອກາດທາງດ້ານເສດຖະກິດທີ່ມີຢູ່ໃນປະຈຸບັນ, ເປັນຕົ້ນແມ່ນການທ່ອງທ່ຽວ ແລະການປະມົງ, ສະໜັບສະໜູນໂອກາດ ຂອງການເຄື່ອນຍ້າຍແຮງງານ ແລະລົງທຶນເຂົ້າໃສ່ການຫຼຸດຜ່ອນ ແລະສະກັດກັ້ນໄພພິບັດ.
ທ່ານນາງ ວິກທໍເຣຍ ກະວາກະວາ ຮອງປະທານທະນາຄານໂລກ ປະຈໍາພາກພື້ນອາຊີຕາເວັນອອກ ແລະປາຊີຟິກ ໄດ້ກ່າວວ່າ: “ມັນແມ່ນການບັນລຸຜົນສໍາເລັດທີ່ເປັນປະຫວັດສາດ, ຊຶ່ງປະຊາກອນເກືອບໜຶ່ງຕື້ຄົນຢູ່ອາຊີຕາເວັນອອກໄດ້ຫຼຸດພົ້ນອອກຈາກຄວາມທຸກຍາກທີ່ຮ້າຍແຮງພາຍໃນຊ່ວງໄລຍະອາຍຸຄົນ ຮຸ່ນດຽວເທົ່ານັ້ນ. ແຕ່ເພື່ອໃຫ້ພາກພື້ນນີ້ ສືບຕໍ່ຮັກສາການເຕີບໂຕຢ່າງກວ້າງຂວາງ, ບັນດາປະເທດຈະຕ້ອງໄດ້ແກ້ໄຂສິ່ງທ້າທາຍຄືລົບລ້າງຄວາມທຸກຍາກ ທີ່ຮ້າຍແຮງໃຫ້ໄດ້ຢ່າງເຕັມສ່ວນ, ເສີມຂະຫຍາຍໂອກາດສໍາລັບຄວາມຄ່ອງຕົວທາງດ້ານເສດຖະກິດ ແລະຮັບປະກັນ ຄວາມປອດໄພທາງດ້ານເສດຖະກິດສໍາລັບທຸກຄົນ”.
ທ່ານ ສູເດຍ ເຊັດຕີ ຫົວໜ້ານັກ ເສດຖະສາດ ຂອງທະນາຄານໂລກປະຈໍາພາກພື້ນອາຊີຕາເວັນອອກ ແລະປາຊີຟິກ, ໄດ້ກ່າວວ່າ: “ວາລະດ້ານນະໂຍບາຍເພື່ອການເຕີບໂຕຢ່າງກວ້າງຂວາງສາມາດປະກອບເປັນສັນຍາທາງດ້ານ ສັງຄົມໃໝ່ສໍາລັບລັດຖະບານໃນທົ່ວພາກພື້ນ. ອົງປະກອບຂອງມັນຈະແກ້ໄຂຄວາມຕ້ອງການຂອງແຕ່ລະລະດັບເສດ ຖະກິດ ພ້ອມທັງມີຄວາມຮັບຜິດຊອບທາງດ້ານການເງິນ ແລະການລະດົມ ລາຍຮັບຢ່າງມີປະສິດທິພາບ ແລະຍຸຕິທໍາ.”
ຢ່າງໃດກໍຕາມ, ພາກພື້ນອາຊີຕາ ເວັນອອກທີ່ກໍາລັງພັດທະນາ ໄດ້ນໍາໜ້າ ໂລກໃນການສະແດງໃຫ້ເຫັນວ່າການ ເຕີບໂຕທີ່ວ່ອງໄວ ແລະກວ້າງຂວາງສາມາດເຮັດໃຫ້ປະຊາກອນຫຼາຍລ້ານຄົນຫຼຸດພົ້ນຈາກຄວາມທຸກຍາກ. ດ້ວຍນະໂຍບາຍທີ່ໄດ້ສະເໜີແນະມານັ້ນ, ບັນດາປະເທດໃນທົ່ວພາກພື້ນນີ້ ຈະສາມາດປະເຊີນໜ້າໄດ້ຢ່າງມີປະສິດທິຜົນກັບສິ່ງທ້າທາຍໃໝ່ ຊຶ່ງພວກເຂົາກໍາລັງປະເຊີນຢູ່ໃນປະຈຸບັນ.
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ