ປີໃໝ່ 2018 ກຳລັງຊິມາເຖິງ ລັດຖະບານເລັງເຫັນວ່າ ປີໃໝ່ສາກົນຂອງທຸກມີ ມັກຈະມີການຈັດຕັ້ງການອວຍພອນຜູ້ໃຫຍ່, ຈັດພິທີສະເຫຼີມສະຫຼອງແລະນັບຖອຍຫຼັງເປັນການໃຫຍ່, ມີການຖ່າຍທອດສົດທາງໂທລະພາບ ແລະຈັດງານຂາຍໂຕະອາຫານຫາລາຍໄດ້. ແລະນອກຈາກໃນນາມການຈັດຕັ້ງແລ້ວ ໃນນາມສ່ວນບຸກຄົນກໍມັກຈະຊື້ ກະຕ່າຂອງຂວັນໄປມອບໃຫ້ຫົວໜ້າ. ເຊິ່ງນັ້ນ ລັດຖະບານເຫັນວ່າບໍ່ມີຄວາມຈຳເປັນແລະເປັນການສີ້ນເປືອງເກີນຄວາມຈຳເປັນ.

ດັ່ງນັ້ນ, ກ່ອນຈະຮອດປີໃໝ່ສາກົນ 2018 ປີນີ້ ຫ້ອງວ່າການສຳນັກງານນາຍົກລັດຖະມົນຕີ ຈຶ່ງໄດ້ອອກແຈ້ງການເຖິງທຸກອົງການຈັດຕັ້ງພັກ-ລັດ ເລື່ອງ: ເລື່ອງເຮັດບັດອວຍພອນປີໃໝ່ສາກົນ ໃນນາມການນຳ.

ເນື້ອໃນລະບຸວ່າ ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງດັ່ງນີ້: ເພື່ອເປັນການປະຕິບັດໃຫ້ສອດຄ່ອງກັບນະໂຍບາຍປະຢັດ ແລະຕ້ານການຟູມເຟືອຍຂອງພັກ-ລັດ. ສະນັ້ນ, ການເຮັດບັດອວຍພອນໃນໂອກາດປີໃໝ່ສາກົນ ໃນນາມການນຳຂັ້ນສູນກາງ ກໍຄືການນຳຂັ້ນກະຊວງ, ອົງການ ແລະທ້ອງຖິ່ນ, ຖ້າມີຈຸດປະສົງຈະເຮັດບັດອວຍພອນ ແມ່ນໃຫ້ເຮັດສົ່ງສະເພາະແຕ່ເປົ້າໝາຍເພື່ອນມິດຕ່າງປະເທດ, ສ່ວນບັນດາການນຳພາຍໃນ ແມ່ນບໍ່ຈຳເປັນສົ່ງບັດອວຍພອນໃຫ້ກັນອີກ.

ແນວໃດກໍຕາມ, ແຈ້ງການດັ່ງກ່າວນັ້ນກໍບໍ່ໄດ້ຫ້າມໃນການຈັດງານລ້ຽງສະເຫຼີມສະຫຼອງແຕ່ປະການໃດ.