ກອງປະຊຸມສະພາທີ່ຜ່ານມາ ສະມາຊິກສະພາແຫ່ງຊາດ (ສສຊ) ເປັນຫ່ວງກ່ຽວກັບຈຳນວນຜູ້ຕ້ອງຂັງໄດ້ເພິ່ມຂຶ້ນ ໂດຍສ່ວນຫຼາຍເປັນໄວໜຸ່ມແລະກຳລັງແຮງງານຂອງປະເທດ.
ທ່ານ ສະຫວັນຄອນ ຣາດມົນຕີ ຮອງລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ແລະເປັນ ສສຊ ປະຈຳແຂວງສະຫວັນນະເຂດກ່າວວ່າ “ຈຳນວນຜູ້ຖືກຈັບກຸມຄຸມຂັງແມ່ນນັບມື້ນັບຫຼາຍຂຶ້ນທຸກແຂວງ ແລະໃນນັ້ນສ່ວນຫຼວງຫຼາຍແມ່ນໜຸ່ມສາວທີ່ເປັັນກຳລັງແຮງງານທີ່ມີຄວາມສຳຄັນກັບການພັດທະນາປະເທດ”.
“ໃນຂະນະດຽວກັນພວກເດັກນ້ອຍ ກໍເປັນເຫຍື່ອຂອງການເກີດອຸບັດເຫດເທິງທ້ອງຖະໜົນນັບມື້ຫຼາຍຂຶ້ນ ເຊິ່ງມີທັງກາຍເປັນຄົນພິການແລະເສຍຊີວິດ ເຊິ່ງເປັນຄວາມສູນເສຍທີ່ຍິ່ງໃຫຍ່ຂອງປະເທດ”.
ທ່ານ ສະຫວັນຄອນ ຊີ້ໃຫ້ເຫັນວ່າການດຳເນີນນະໂຍບາຍທີ່ເໝາະສົມເພື່ອແນະນຳສັ່ງສອນເຍົາວະຊົນທີ່ຖືກຄຸມຂັງໂດຍຢຶດຖືຫຼັກການດ້ານມະນຸດສະທຳແລະໃຫ້ໂອກາດພວກເຂົາໄດ້ກັບອອກມາເປັນພົນລະເມືອງທີ່ດີທີ່ສາມາດຊ່ວຍເຫຼືອໃນຂະບວນການພັດທະນາປະເທດໄດ້.
ທ່ານຮອງລັດຖະມົນຕີຯ ໄດ້ເນັ້ນວ່າຈຳເປັນຕ້ອງທົບທວນແນວທາງການຟື້ນຟູແລະຈັດການເຝິກອົບຮົມທີ່ມີປະສິດທິພາບເພື່ອໃຫ້ໝັ້ນໃຈວ່າຜູ້ຕ້ອງຂັງສາມາດກັບເຂົ້າສູ່ສັງຄົມໄດ້ອີກແລະເຝິກຝົນວິຊາຊີບແລະການໃຊ້ຊີວິດໃຫ້ກັບຜູ້ຕ້ອງຂັງ ໂດຍໃຫ້ສອດຄ່ອງກັບຄວາມຮຽກຮ້ອງຕ້ອງການຂອງຕະຫຼາດແຮງງານ.
ທ່ານ ວິໄລສຸກ ພິມມະສອນ ສະມາຊິກສະພາແຫ່ງຊາດປະຈຳແຂວງຊຽງຂວາງ ໄດ້ຮຽກຮ້ອງໃຫ້ໜ່ວຍງານບັງຄັບໃຊ້ກົດໝາຍກວດສອບວ່າລາຍໄດ້ແລະຊັບສິນທີ່ຢຶດມາຈາກຂະບວນການຄ້າຢາເສບຕິດແລະອາຊະຍາກຳອື່ນໆ ໄດ້ເອົາເຂົ້າໃນຄັງງົບປະມານຂອງປະເທດຫຼືບໍ່?.
ທ່ານ ວິໄລສຸກ ລະບຸວ່າຄວາມຮັບຜິດຊອບຂອງເຈົ້າໜ້າທີ່ ໂດຍສະເພາະຢ່າງຍິ່ງໃນລະດັບແຂວງບໍ່ໄດ້ປະຕິບັດຕາມກົດໝາຍຢ່າງເຄັ່ງຄັດຫຼືບາງເທື່ອກໍບໍ່ສອດຄ່ອງກັບກົດໝາຍ ເຊັ່ນວ່າ: ການຈັບກຸມເກີດຂຶ້ນໂດຍບໍ່ມີໃບສັ່ງຈັບ, ຕາມທຳມະດາແລ້ວ ເຈົ້າໜ້າທີ່ຕ້ອງປ່ອຍໂຕຜູ້ຕ້ອງສົງໄສພາຍໃນ 48 ຊົ່ວໂມງຖ້າບໍ່ມີຫຼັກຖານພຽງພໍທີ່ຈະແຈ້ງຂໍ້ຫາແກ່ຈຳເລີຍ. ແຕ່ວ່າເຈົ້າໜ້າທີ່ມັກບໍ່ປະຕິບັດຕາມກົດນີ້ແລະຜູ້ຕ້ອງສົງໄສກໍຖືກຄຸມໂຕໄວ້ເກີນໄລຍະເວລາຕາມກົດໝາຍກຳນົດ.
ເບິ່ງຕາມສະພາບຕົວຈິງແລ້ວ, ນັບມື້ນັບມີຄະດີຫຼາຍຂຶ້ນ ມີການຈັບກຸມຫຼາຍຂຶ້ນ ເຮັດໃຫ້ຈຳນວນຜູ້ຕ້ອງຂັງອັ່ງອໍ ຈຶ່ງຈຳເປັນຕ້ອງທົບທວນເຖິງວິທີການແກ້ໄຂບັນຫາ ເຮັດແນວໃດໃຫ້ການເກີດຄະດີໜ້ອຍລົງ ເຊິ່ງອາດຈະຕ້ອງນຳໃຊ້ກົດໝາຍຢ່າງເຄັ່ງຄັດ, ເຜີຍແພ່ຄວາມຮູ້ທາງດ້ານກົດໝາຍໃຫ້ປະຊາຊົນໄດ້ຮັບຮູ້ຢ່າງກວ້າງຂວາງ ແລະຕ້ອງມີກິດຈະກຳອົບຮົມບົ່ມສອນແລະປູກຈິດສຳນຶກທີ່ດີແກ່ເຍົາວະຊົນໃຫ້ຫຼາຍເທົ່າທີ່ຈະຫຼາຍໄດ້.
ແຫຼ່ງຂ່າວ: laotiantimes.com