ໂຄງການກໍ່ສ້າງສະໜາມບິນອັດຕະປືທີ່ມີມູນຄ່າການກໍ່ສ້າງທັງໝົດ 289 ຕື້ກວ່າກີບ ຫຼື ປະມານ 36,19 ລ້ານໂດລາສະຫະລັດໄດ້ເລີ່ມຈັດຕັ້ງປະຕິບັດມາແຕ່ວັນທີ 10 ພຶດສະພາ 2013 ແລະການກໍ່ສ້າງໄດ້ສຳເລັດແລະເປີດນຳໃຊ້ຢ່າງເປັນທາງການໃນເດືອນພຶດສະພາ 2015 ເຊິ່ງຕັດແຖບຜ້າເປີດພິທີໂດຍ ທ່ານ ຈຸມມະລີ ໄຊຍະສອນ ໃນຂະນະດຳລົງຕຳແໜ່ງປະທານປະເທດ ແລະ ທ່ານ ເຈືອງເຕີນຊາງ ປະທານປະເທດແຫ່ງ ສສ.ຫວຽດນາມ.
ໂຄງການກໍ່ສ້າງສະໜາມບິນອັດຕະປືແມ່ນໂຄງການໜຶ່ງຂອງລັດຖະບານ ເພື່ອຮອງຮັບເຮືອບິນທັງພາຍໃນ ແລະຕ່າງປະເທດທັງເປັນການຊຸກຍູ້ສົ່ງເສີມການພັດທະນາເສດຖະກິດ – ສັງຄົມ ແລະ ການທ່ອງທ່ຽວຂອງແຂວງອັດຕະປື ກໍຄືຂອບເຂດທົ່ວປະເທດ ໂດຍສະເພາະແມ່ນວຽກງານຂົນສົ່ງທາງອາກາດ ທັງນີ້ ໃນໄລຍະຍາວເພື່ອຜັນຂະຫຍາຍແຜນພັດທະນາເສດຖະກິດ – ສັງຄົມຂອງລັດຖະບານລາວ ປີ 2010 – 2020 ຕາມທິດນະໂຍບາຍຫັນ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລ ມາເປັນປະເທດບໍລິການທາງຜ່ານ ແລະ ມີຄວາມມຸ່ງໝັ້ນເພື່ອນຳພາປະເທດຫຼຸດພົ້ນອອກຈາກປະເທດດ້ອຍພັດທະນາໃນປີ 2020.
ແນວໃດກໍຕາມ, ການນຳໃຊ້ສະໜາມບິນດັ່ງກ່າວບໍ່ໄດ້ເປັນໄປຕາມແຜນການຂອງລັດຖະບານໄດ້ວາງໄວ້ ຕໍ່ມາກໍໄດ້ຢຸດໃຫ້ການບໍລິການ ຫລັງຈາກເຫັນວ່າ ຖ້ຽວບິນສຸດທ້າຍໃນວັນທີ 26 ຕຸລາ 2016 ບໍ່ມີຜູ້ໂດຍສານພໍເທົ່າໃດຄົນ ແລະໄດ້ປ່ອຍໃຫ້ມີຄວາມຮົກເຮື້ອຂຶ້ນ ສ່ວນເສັ້ນທາງເຂົ້າສູ່ສະໜາມບິນກໍເຕັມໄປດ້ວຍຂີ້ງົວ, ຍັງຄົງມີແຕ່ໜ່ວຍຮັກສາຄວາມປອດໄພເວນຍາມຢູ່ເທົ່ານັ້ນ.
ໜ້າເຟັດບຸກຂອງການບິນລາວ Aero Laos ລາຍງານວ່າ “ການບິນລາວບໍ່ສາມາດແບກຫາບພາລະໜີ້ສິນໃນເສັ້ນທາງບິນ ສູ່ແຂວງອັດຕະປື ໂດຍທີ່ບໍ່ມີຜົນກໍາໄລ ຕາມທີ່ລັດຖະບານຕ້ອງການໄດ້ “.
ແຫຼ່ງຂ່າວທີ່ບໍ່ປະສົງອອກນາມລາຍງານວ່າ ແຜນການສ້າງສະໜາມບິນອັດຕະປືນັ້ນ ບໍ່ແມ່ນແຜນຂອງການບິນລາວ ແຕ່ຫາກເປັນແຜນການຂອງຂັ້ນເທີງຮ່ວມກັບບໍລິສັດຮວງແອງຢາລາຍທີ່ຢາກພັດທະນາໃຫ້ແຂວງດັ່ງກ່າວ ມີຄວາມຈະເລີນ ທັນສະໄໝ ທຽບທັນກັບແຂງອື່ນໆ ແລະ ແຫຼ່ງຂ່າວໄດ້ລາຍງານຕື່ມວ່າ ທາງການບິນລາວໄດ້ສະເໜີໃຫ້ລັດຖະບານຊ່ວຍຖົມຂຸມຈາກການຂາດທຶນໃນເສັ້ນທາງການບິນ ວຽງຈັນ-ອັດຕະປື, ອັດຕະປື-ວຽງຈັນ ບໍ່ດັ່ງນັ້ນກໍບໍ່ສາມາດດຳເນີນການບິນຕໍ່ໄປໄດ້.
ລາຍງານລະບຸຕື່ມອີກວ່າ ສະໜາມບິນແຫ່ງນີ້ໄກຈາກ ຫ້ອງການຂອງບໍລິສັດຮວງແອງຢາລາຍ 6 ກິໂລແມັດ, ໄກຈາກຕົວເມືອງຂອງແຂວງອັດຕະປື 26 ກິໂລແມັດ ແລະຍັງບໍ່ມີລົດໂດຍສານໃຫ້ການບໍລິການເທື່ອ.