ນັບແຕ່ປີ 1990 ເປັນຕົ້ນມາ ລັດຖະບານລາວໄດ້ອະນຸຍາດໃຫ້ ບໍລິສັດທັງພາຍໃນແລະຕ່າງປະເທດ ເຂົ້າມາສຳຫຼວດ, ຂຸດຄົ້ນ ແລະພັດທະນາແຮ່ທາດ ເຊິ່ງມາຮອດປັດຈຸບັນ ມີບໍລິສັດທີ່ໄດ້ຮັບອະນຸຍາດແລ້ວ 229 ບໍລິສັດ ໃນນັ້ນ, ໄດ້ດຳເນີນການຂຸດຄົ້ນແລະຜະລິດ 81 ບໍລິສັດ. ແລະຄາດວ່າມີ 2 ບໍລິສັດໃຫຍ່ ຄື ບໍ່ຄຳເຊໂປນແລະບໍ່ຄຳພູເບ້ຍ ຈະປິດລົງໃນປີ 2020.

ປະເພດແຮ່ທາດທີ່ເຂົ້າສູ່ການຂຸດຄົ້ນແລະຜະລິດຈຳໜ່າຍມີ 18 ແຮ່ທາດ ເປັນຕົ້ນແມ່ນ: ແຮ່ຄຳ, ເງິນ, ທອງ, ກົ່ວ, ຊືນ, ສັງກະສີ, ອັງຕີມອນ, ຖ່ານຫີນ, ບາຣິດ, ຫີນກາວ, ຫີນປູນ, ບົກຊິດ, ເກືອໂປຕາສ, ເກືອກິນ, ດິນໜຽວ, ໂບຣມ ແລະອື່ນໆ

ທ່ານ ປອ ຄຳມະນີ ອິນທິລາດ ລັດຖະມົນຕີກະຊວງພະລັງງານແລະບໍ່ແຮ່ລາຍງານຕໍ່ກອງປະຊຸມສະພາວ່າງບໍ່ດົນມານີ້ວ່າ: “ຕະຫຼອດ 10 ປີຜ່ານມາ (2005-2015) ບັນດາບໍລິສັດຂຸດຄົ້ນແຮ່ທາດໄດ້ປະຕິບັດພັນທະທາງດ້ານການເງິນໄດ້ປະມານ 1.89 ຕື້ໂດລາສະຫະລັດ. ໃນນັ້ນ, ພົ້ນເດັ່ນແມ່ນປີ 2011 ໄດ້ 292 ລ້ານໂດລາສະຫະລັດ ແລະປີ 2012 ໄດ້ 293.6 ລ້ານໂດລາສະຫະລັດ. ຫຼັງຈາກນັ້ນ, ລາຍຮັບທາງດ້ານນີ້ກໍຄ່ອຍຫຼຸດລົງຕາມລຳດັບ ຍ້ອນວ່າແຮ່ທາດເລິ່ມໜ້ອຍລົງແລະລາຄາແຮ່ທາດໃນຕະຫຼາດໂລກກໍຖືກລົງ”. ແລະຄາດວ່າຮອດປີ 2020-2021 ສອງບໍລິສັດຂຸດຄົ້ນແຮ່ຄຳ ເຊໂປນ ແລະ ພູເບ້ຍ ຕ້ອງປິດໂຕລົງ ຍ້ອນແຮ່ທາດຈາກ 2 ບໍ່ນີ້ໝົດ.